ރާއްޖޭގެ ސިފައިންގެ ތަމްރީންތައް ކުރިއަށްގެންްދާ މައި މަރުކަޒު ކަމުގައިވާ ގިރިފުށި ހިއްކައި ބޮޑުކުރުމުގެ މަޝްރޫޢެއް ކުރިއަށް ގެންދިއުމަށް ސަރުކާރުން ނިންމައިފިއެވެ. މި ނިންމުން ހާމަކުރެއްވީ ނަޞްރުގެ ދުވަހުގެ ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒެވެ.

ރައީސް މުޢިއްޒު ވިދާޅުވި ގޮތުގައި، އެމް.އެން.ޑީ.އެފްގެ ޕްރޮގްރާމްތައް ހިންގުމަށް ބޭނުންވާ ވަސީލަތްތައް ޤާއިމުކުރުމަށްޓަކައި ގިރިފުށި ބޮޑުކުރަންޖެހެއެވެ. ގިރިފުށީގައި މިހާރު ވަނީ ޖާގަ ކުޑަވެފައި ކަމަށާއި އަދި ވަސީލަތްތައް ބޮޑަށް ބޮޑަށް ހަލާކުވެފައިވާކަން ރައީސް މުޢިއްޒު ފާހަގަކުރެއްވިއެވެ. އެހެންކަމުން، އަލުން ގިރިފުށި ޑިޒައިންކޮށް، ޕްލޭން ހެދުމުގެ މަސައްކަތް މިހާރު ވަނީ ފަށާފައިކަމަށް އެމަނިކުފާނު ވިދާޅުވިއެވެ.

ރައީސް އިތުރަށް ވިދާޅުވި ގޮތުގައި، ގިރިފުށީގެ ފަޅުތެރެއިން 13 ހެކްޓަރު ހިއްކުމަށް ވަނީ ރޭވިފައެވެ. މިއީ ވަރަށް ބޮޑު ސަރަޙައްދެއް ކަމަށާއި، މި ސަރަޙައްދު ހިއްކުމަށްފަހު ޝޯ ޕްރޮޓެކްޝަން ވެސް ޖަހާނެ ކަމަށް ރައީސް ވިދާޅުވިއެވެ. އަދި ބޭނުންވާ ބަނދަރު ހެދުމަކީ މި އަންނަ އަހަރުގެ ތެރޭގައި އައު ޕޮލިސީ އިނީޝިއޭޓިވްގެ ދަށުން ކުރިއަށް ގެންދާނެ ކަމެއް ކަމަށް ވެސް ރައީސް ފާހަގަކުރެއްވިއެވެ.

މީގެ އިތުރުން، ބޭނުންވާ ވަސީލަތްތައް ޤާއިމުކުރުމުގެ މަގު ވެސް ފަހިވެގެންދާނެ ކަމަށް ރައީސް ވިދާޅުވިއެވެ. މި މަޝްރޫޢުގެ ސަބަބުން ސިފައިންނަށް ލިބޭނެ ފައިދާތަކުގެ ވާހަކަ ދައްކަވަމުން ރައީސް ވިދާޅުވީ، މިކަމުން ސިފައިންގެ ޚިދުމަތް އިތުރަށް ހަރުދަނާވެ، ޤައުމީ ސަލާމަތާއި ރައްކާތެރިކަން ކަށަވަރުކުރުމަށް އެހީތެރިވެދޭނެ ކަމަށެވެ.މީގެ އިތުރުން ސަރުކާރުން ފެށުމަށް ނިންމާފައިވާ ޤައުމީ ޚިދުމަތުގެ ޕްރޮގްރާމަށް ކުދިން ތަމްރީނުކުރާނެ ޖާގައާއި ވަސީލަތްތައް ލިބިގެންދާނެކަން އެމަނިކްފާންވަނީ ފާހަގަ ކުރެއްވިއެވެ.