ފީފާ ވޯލްޑް ކަޕް 2026 ގެ މެޗުތައް ކުޅުމަށް އެމެރިކާއަށް ދަތުރުކުރުމުގައި ކުރިމަތިވަމުންދާ ހުރަސްތަކާ ގުޅިގެން، ފުޓްބޯޅައިގެ މައި އިދާރާ، ފީފާއަށް ރަސްމީކޮށް ޝަކުވާ ހުށަހެޅުމަށް އީރާނުން ނިންމައިފިއެވެ.

ވިސާގެ ދަތިތަކާއި އެމެރިކާއާ ދެމެދު އޮތް ސިޔާސީ ނުތަނަވަސްކަމުގެ ސަބަބުން، އީރާނު ޓީމު މިވަގުތު މަޑުކޮށްގެން ތިބީ މުބާރާތް ބާއްވާ އަނެއް ގައުމު ކަމަށްވާ މެކްސިކޯގައެވެ. އެމެރިކާގައި ކުޅޭ ގްރޫޕް ސްޓޭޖުގެ ތިން މެޗަށްވެސް އެ ޓީމުން ދަތުރުކުރަން ޖެހެނީ މެކްސިކޯއިންނެވެ.

އެމެރިކާގެ ކަމާ ބެހޭ އިދާރާތަކުން އަންގާފައިވަނީ، މެޗު ފެށުމުގެ 24 ގަޑިއިރު ކުރިން ނޫނީ އެމެރިކާއަށް އެތެރެނުވެވޭނެ ކަމަށާއި، މެޗު ނިމޭ ދުވަހު ގައުމުން ބޭރުވާންޖެހޭނެ ކަމަށެވެ. މިކަމާ ގުޅިގެން އީރާނުގެ ކޯޗު އާމިރު ގަލެނޮއީ ބުނީ، މިއީ މި މުބާރާތުގައި ޓީމަކަށް ކުރިމަތިވާނެ އެންމެ ބޮޑު ބޭއިންސާފު ކަމަށެވެ.

އީރާނުގެ ފުޓްބޯޅަ ފެޑެރޭޝަނުން މިއަދު ނެރުނު ބަޔާނެއްގައި ބުނީ، މިފަދަ ހަރުކަށި ހުރަސްތަކަކީ މުބާރާތުގައި ބައިވެރިވާ ހުރިހާ ޓީމަކަށް ހަމަހަމަ ފުރުސަތުތަކެއް ދިނުމުގެ އުސޫލާ ޚިލާފު ކަމެއް ކަމަށެވެ. އަދި މީގެ ސަބަބުން ޓީމުގެ ތައްޔާރީތަކަށް ނޭދެވޭ އަސަރުކުރާނެ ކަމަށްވެސް އެ ފެޑެރޭޝަނުން ފާހަގަކުރިއެވެ.

ކޯޗު ގަލެނޮއީ އިތުރަށް ބުނި ގޮތުގައި، މި ދަތިތަކުގެ ސަބަބުން ނިއުޒިލެންޑާ ދެކޮޅަށް ކުޅުނު މެޗު 2-2 ގެ ނަތީޖާއަކުން އެއްވަރުވުމުގައި ޓީމަށް ގޮންޖެހުންތަކެއް ކުރިމަތިވިއެވެ. ފެޑެރޭޝަނުން ހާމަކުރި ގޮތުގައި، ކޯޗު ރާވާފައިވަނީ ކޮންމެ މެޗެއްގެ ދެ ދުވަސް ކުރިން އެ ސިޓީއަކަށް ގޮސް، މެޗަށްފަހު އަނެއް ދުވަހު އެނބުރި ދިއުމަށެވެ. އެއީ ކުޅުންތެރިންގެ ފިޒިކަލް އަދި ޓެކްނިކަލް ފެންވަރު އެންމެ ރަނގަޅު ހާލަތެއްގައި ބެހެއްޓުމަށެވެ. ނަމަވެސް ފުރަތަމަ މެޗަށް އެ ހުއްދަ އެމެރިކާއިން ދީފައެއް ނުވެއެވެ.

އީރާނުން ދެން ކުޅޭ މެޗުގައި މި މަހުގެ 21 ގައި ލޮސް އެންޖެލިސްގައި ބައްދަލުކުރާނީ ބެލްޖިއަމްއާއެވެ. އަދި ގްރޫޕް ޖީގެ ފަހު މެޗުގައި މި މަހުގެ 27 ގައި ސިއެޓްލްގައި ބައްދަލުކުރާނީ މިސްރާއެވެ.