ނަސްރުގެ ދުވަހުގެ ހުރިހާ ހަރަކާތެއްގައި ރައީސުމްހޫރިއްޔާ ބައިވެރިވެވަޑައިގެންނެވުމަކީ ނޮވެމްބަރު ތިނެއްގެ އުދުވާނުގައި ދިވެހިން ހޯދި މަތިވެރި ނަސްރުގެ އަގުވަޒަން ކުރެއްވުން ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާޙިމް ޙިލްމީ ވިދާޅުވެއްޖެއެވެ.

ޗީފް އޮފް ޑިފެންސް ފޯސް މިހެން ވިދާޅުވީ ނަސްރުގެ ދުވަސް ފާހަގަކުރުމަށް ބޭއްވި "ދިވެހި ސިފައިންގެ އަސްކަރީ ހުށައެޅުން" ރަސްމިއްޔާތުގައި ވާހަކަދައްކަވަމުންނެވެ.

ޗީފް އޮފް ޑިފެންސް ފޯސްގެ ވާހަކަފުޅުގައި ވަނީ ނަސްރުގެ ދުވަސް ޤައުމީ ފެންވަރެއްގައި ފާހަގަކުރެއްވުމަށް ނިންމަވާ، އެ ހުރިހާ ހަރަކާތެއްގައިވެސް ރައީސުލްޖުމްހޫރިއްޔާ ބައިވެރިވެވަޑައިގެންނެވިކަން ފާހަގަކުރައްވާފައެވެ. އަދި އެއީ އުދުވާނީ ޙަމަލާގައި ދިވެހިން ހޯދި ނަސްރުގެ އަގުވަޒަންކުރެއްވުމުގައި ވެރިއެއްގެ ޙައިސިއްޔަތުން ދެއްވާ އަހަމިއްޔަތުކަން ހާމަވާކަމެއްކަމަށްވެސް ޗީފް އޮފް ޑިފެންސް ފޯސް ވިދާޅުވިއެވެ.

"ސަރުކާރުން މި ދުވަސް ޤައުމީ ލެވެލްއެއްގައި ކުލަގަދަކޮށް ފާހަގަކުރަމުންދާތަން މި ފެންނަނީ. ޤައުމީ ފެންވަރުގައި އެ ޤުރުބާމީގެ އަގު ވަޒަންކުރަމުންދާތަން. ނަސްރުގެ ދުވަހުގެ ހުރިހާ ހަރަކާތްތަކުގައި ރައީސުލްޖުމްހޫރިއްޔާ އެ ގެންދަވަނީ ބައިވެރިވެވަޑައިގަންނަވަމުން." ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާޙިމް ޙިލްމީ ވިދާޅުވިއެވެ.

ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާޙިމް ޙިލްމީގެ ވާހަކަފުޅުގައި ވަނީ ޤައުމީ ދިފާޢީ ބާރުގެ ޚިދުމަތްތައް ކުރިއަރުވާ އަސްކަރިއްޔާގެ އާ ގޮތްތައް، ޤައުމީ ދިފާއީ ބާރުގެ ޚިދުމަތަށް ތަޢާރަފުކުރައްވުމަށް ރައީސުލްޖުމްހޫރިއްޔާ އަދި ދިފާޢީ ވަޒީރު ކުރައްވަމުންދާ މަސައްކަތުގެ ކާމިޔާބީ ފާހަގަކުރައްވާފައެވެ.

އަދި ވެރިކަމުގެ ފުރަތަމަ އަހަރުގައިވެސް ގެންނެވި ކުރިއެރުން ފާހަގަކުރެއްވިއެވެ."އަސްކަރިއްޔާގެ ވައިގެ ޤާބިލުކަން އިތުރުކުރުމަށް "ވައިގެ އަސްކަރިއްޔާ" އުފެއްދެވި. އަދި މިހާރު މިވަނީ ކަނޑު އަޑީގެ ޚާއްސަ އޮޕަރޭޝަންތަކަށް "ސްޕެޝަލް ބޯޓް ސްކޮޑްރަން" އިފްތިތާޙުކޮށްދެއްވާފައި" ޗީފް އޮފް ޑިފެންސް ފޯސް ވިދާޅުވިއެވެ.

ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާޙިމް ޙިލްމީ ވިދާޅުވީ ދިވެހިންގެ ތެރެއިން 19 ސިފައިން ޝަހީދުވި ނޮވެމްބަރު 3ގެ ޙާދިސާއާއި މިނިވަންކަމުގެ ދިފާޢުގައި ސިފައިން ވެވަޑައިގެންނެވި ޤުރުބާނީއަކީ އަބަދަށްމެ ހަނދާންކުރަންޖެހޭ ޙާދިސާއެއްކަމަށެވެ.

ދިވެހިރާއްޖޭގެ އަސްކަރިއްޔާއިން އަބަދުވެސް ތިބޭނީ، ދިވެހި ޤައުމަށް ކުރިމަތިވާ ކޮންމެ ޙާލަތަކަށް ތައްޔާރުވެ އަދި ޙާލަތުގެ ވަގުތުގައި ކެރިގެން ނިކުމެ ކުރިމަތިލާ އަސްކަރިއްޔާއެއްގެ ގޮތުގައިކަމަށް ޗީފް އޮފް ޑިފެންސް ވިދާޅުވިއެވެ.

"ދިވެހި ސިފައިން ތިބޭނީ ޤައުމާ ދީނަށްޓަކާ ފުރާނައިން ޤުރުބާންވާން ތައްޔާރަށް. ޤައުމުދެކެ ލޯބިވާ، ޤައުމުގެ މިނިވަންކަމުގެ ދިފާޢުގައި އަސްކަރިއްޔާ އިތުރު ހަރުފަތަކަށް ގެންދަން. ކޮންމެ ސިފައިންގެ މީހެއްގެ ހިއްވަރާ އަދި ރައްޔިތުންނަށް އަރުވާ ޔަގީންކަމަކީ މިއީ." ޗީފް އޮފް ޑިފެންސް ފޯސް ވިދާޅުވިއެވެ.