މޯލްޑިވްސް އެއަރޕޯޓްސް ކޮމްޕެނީ (އެމްއޭސީއެލް) ގެ ދަށަށް ރީޖަނަލް އެއަރޕޯޓްސް ބަދަލުކުރުމުގެ ޢަމަލީ މަސައްކަތް މިހާރު ހިނގަމުންދާ ކަމަށް، ރީޖަނަލް އެއަރޕޯޓްސްގެ މެނޭޖިން ޑިރެކްޓަރ އަޙްމަދު މުބީން މިރޭ ވިދާޅުވެއްޖެއެވެ.

އެމްއެމްޓީވީގެ "ބޮޑު ޚަބަރު" ޕްރޮގްރާމުގައި ވާހަކަދައްކަވަމުން މުބީން ވިދާޅުވީ ވެލާނާ އިންޓަނޭޝަނަލް އެއަރޕޯޓު ހިންގާ އެމްއޭސީއެލް އާއި ރީޖަނަލް އެއަރޕޯޓްސް އެއްކޮށްލައިގެން ހިންގަން ކެބިނެޓުން ނިންމި ނިންމުމާ ގުޅިގެން އެ މަސައްކަތް ކުރިއަށްދާ ކަމަށެވެ.

"ރިޖަނަލް އެއަރޕޯޓްސްއިން ވެސް އެމްއޭސީއެލްއިން ވެސް ސޮއިކޮށްފައި މިހާރު އެގްރިމެންޓް ފޮނުވިފައިވާނީ ފިނޭންސް މިނިސްޓްރީއަށް. ފިނެންސް މިނިސްޓްރީ ގޮތެއް ނިންމުމާ އެކު، ކުރިއަށް ގެންދާނެ  މޮޑެލްއެއް ނިންމާނީ،" އޭނާ ވިދާޅުވިއެވެ.

މުބީން ވިދާޅުވީ ރީޖަނަލް އެއަރޕޯޓްތަކަކީ މި ސަރުކާރު ހަވާލުވުމާއި ހަމައަށް އައިއިރު ވެސް ގެއްލުމުގައި ހިނގަމުން އައި ތަންތަން ކަމަށެވެ. ނަމަވެސް މިހާރު، ރީޖަނަލް އެއަރޕޯޓްސްގެ އަށް އެއާޕޯޓާއި އެ ކުންފުންޏާއި ހިންގުން ހަވާލުކޮށްފައިވާ ދެ އެއަރޕޯޓް ފައިދާހުރި ގޮތުގައި ތަރައްޤީކުރުމަށް ކޮންމެ އެއާރޕޯޓަކަށް މާސްޓަޕެލޭނެއް ހައްދަވާފައިވާނެ ކަމަށް އޭނާ ވިދާޅުވިއެވެ.

"އަޅުގަނޑުމެނާއި ހަމައަށް އައިއިރުވެސް ގެއްލުމުގައި ހިންގަމުން އަންނަ ތަންތަން. އެތަންތަން ސެލްފް ސަސްޓެއިން ކުރުމަށްޓަކައި މި ތަންތަނުގައި ހުރި ބިމާއި އެކިއެކި ވަސީލަތްތައް ބޭނުންކޮށްގެން، އާމްދަނީ ހޯދައިގެން އެއަރޕޯޓަކީ އަމިއްލަ ފައިމައްޗަށް ތެދުވެ ޚަރަދުތައް ހަމަޖެއްސޭނެ ޕްލޭންތައް ހަދާފައި އޮންނާނީ،" އޭނާ ވިދަޅުވިއެވެ.

މުބީން ވިދާޅުވީ ބިން އޮތް މިންވަރަކަށް ބިނާކޮށް، އެއާރޕޯޓްތަކުގައި ފިއުލް ވިއްކުމާއި ޓޫރިޒަމާއި ދަނޑުވެރިކަން ފަދަ މަސައްކަތައް ކުރައްވާނެ ކަމަށެވެ. އޭނާ ވިދާޅުވީ މި އަހަރު ތެރޭގައި ވަރަށް ގިނަ ޕްލޭންތައް ކުރެވިފައިވާ ކަމަށާއި އިންވެސްޓަރުން ހޯދުމަށް ވެސް މަސައްކަތް ކުރައްވާފައިވާ ކަމަށެވެ. އަދި އަންނަ އަހަރުތެރެގައި ރީޖަނަލް އެއަރޕޯޓްސްގެ ގިނަ މަސައްކަތް ހިނގައިގަންނާނެ ކަމަށް މުބީން ވިދާޅުވިއެވެ.