ޗައިނާ އާއި ރާއްޖެއާ ދެމެދު ޤާއިމްކޮށްފައިވާ މިނިވަން ވިޔަފާރީގެ އެއްބަސްވުމަށް ޢަމަލުކުރަން ފެށުމުން، ޗައިނާއިން ރާއްޖެއަށް އެތެރެކުރާ ވަރަށް ގިނަ ބާވަތްތަކުން ޑިއުޓީ މަޢާފުވާނެކަމަށް، އިކޮނޮމިކް ޑިވެލޮޕްމަންޓް އެންޑް ޓްރޭޑް މިނިސްޓްރީން ވިދާޅުވެއްޖެއެވެ.

އެ މިނިސްޓްރީގެ އެކްސް ޕޯސްޓެއްގައި ވިދާޅުވެފައިވާ ގޮތުގައި އަންނަ އަހަރުގެ ފުރަތަމަ ދުވަހުން ފެށިގެން ޢަމަލުކުރަންފަށާ އެއްބަސްވުމުގެ ސަބަބުން، ކުދި ވިޔަފާރިތަކާއި ފަންނުވެރި މަސައްކަތްތައް ކުރާ ފަރާތްތަކަށް ގިނަ ފުރުސަތުތަކެއް ފަހިވެގެންދާނެއެވެ.

މިނިވަން ވިޔަފާރީގެ އެއްބަސްވުމަށް ޢަމަލުކުރަން ފެށުމުން ތުރީޑީ ޕްރިންޓަރާއި ލޭބަލް ޕްރިންޓަރާއި ފޮޓޯކޮޕީ ނެގުމަށް ބޭނުންކުރާ އިކުއިޕްމަންޓްސްގެ ޑިއުޓީ މަޢާފުވާނެކަމަށް އިކޮނޮމިކް މިނިސްޓްރީން ވިދާޅުވެއެވެ. އަދި ގަހަނާ ހެދުމަށް ބޭނުންކުރާ ޓޫލްސް އާއި ރޯ މެޓީރިއަލްސްގެ ޑިއުޓީ މަޢާފުވާނެކަމަށް އެ މިނިސްޓްރީން ވިދާޅުވެއެވެ.

"ބަރާބަރު 20 ދުވަސް ތެރެގޭގައި މިނިވަން ވިޔަފާރީގެ އެއްބަސްވުން ތަންފީޒުކުރަން ފެށޭނެ ޗައިނާއާ އެކީގައި. މާނަ އަކީ ރާއްޖެއަށް ޗައިނާ އިން އިމްޕޯޓުކުރާ ގާތްގަނޑަކަކަށް 70 އާއި 90 ޕަސެންޓާ ދެމެދުގެ ހުރިހާ މުދަލުން ސުން ޕަސެންޓަށް ޑިއުޓީ ކުޑަވެގްނަދާނެ،" އެމްއެމްޓީވީގެ "ބޮޑު ޚަބަރު" ޕްރޮގްރާމުގައި ވަހަކަ ދައްކަވަމުން، އިކޮނިމިކް މިނިސްޓަރު މުޙައްމަދު ސަޢީދު، މި މަހުގެ 10 ވަނަ ދުވަހު ވިދާޅުވިއެވެ.

އިމާރާތްކުރުމުގެ ދާއިރާގައި ބޭނުންކުރާ ވަރަށް ގިނަ ބާވަތްތަކުގެ މުދަލާއި ތަފާތު މެޝިނަރީ އާއި އެނޫން ބަވަތްތަކުގެ މުދާ ޗައިނާއިން ރާއްޖެއަށް އެތެރެކުރެއެވެ.