ޑައިވިނަށް ގޮސް އުޅެނިކޮށް މަރުވި އިޓަލީގެ ޑައިވަރުން ތާށިވި ކަނޑުއަޑީގެ ކޭވް -- ހޮހޮޅައިގެ ފޮޓޯތަކެއް ޑޭން ޔޫރަޕް ރެސްކިއު ޓީމުން އާންމުކޮށްފި އެވެ.

މުޅި ދުނިޔޭގެ ނަޒަރު ހުއްޓުނު މި ހާދިސާ ހިނގި ހޮހޮޅައިގެ މަންޒަރުތަކެއް އާންމުކުރި މިއީ ފުރަތަމަ ފަހަރެވެ. ޖުމްލަ ތިން ފޮޓޯގަނޑު ވަނީ އާންމުކޮށްފަ އެވެ.

އެ ފޮޓޯތަކުން ފެންނަނީ ހޮހޮޅައިގެ ވަންނަ ސަރަޙައްދެވެ. އެ ފޮޓޯތަކާއެކު އެ ޓީމުން ބުނީ އެތަނުގެ އެތެރެއަށް ވަންނަ ވަރަކަށް އަނދިރިކަން ގަދަވަމުންދާ ކަމަށެވެ. 

ޑޭން ޔޫރަޕުން ނެރުނު ބަޔާނުގައި ބުނީ އިއްޔެ ކުރިއަށްގެންދިޔަ އެންމެ ފަހު ޑައިވްއަކީ އެ ޖަމިއްޔާގެ އިރުޝާދުގެ ދަށުން ފިންލޭންޑްގެ މާހިރުންގެ ޓީމާއި، އެމްއެންޑީއެފް ކޯސްޓްގާޑާއި، ފުލުހުންގެ ޑައިވިން ޔުނިޓްތަކުގެ އިތުރުން މާލޭގައި ހުންނަ އިޓަލީގެ ކަމާބެހޭ އިދާރާތަކާ ގުޅިގެން ކުރިއަށްގެންދިޔަ ހަރަކާތެއް ކަމަށެވެ.

މި ޑައިވް ކުރިއަށްދިޔަ ވަގުތު މޫސުން ގޯސްވެ، ވައި ބާރުވުމާއި އޮއިގަދަވުމުގެ ސަބަބުން މަސައްކަތް ފެށުން ގަޑިއެއްހާއިރު ލަސްވިނަމަވެސް ގާތްގަނޑަކަށް ތިން ގަޑިއިރު ހޭދަވި މި ޑައިވްގައި ހޮހަޅައިގެ ތެރޭގައި 50 މިނެޓުގެ މަސައްކަތް ފުރިހަމަކޮށްފައިވާކަމަށް ބުންޏެވެ.

މި ޑައިވްގެ ބޭނުމަކީ ހޮހޮޅައިގެ ތެރޭގައި ހަރުކޮށްފައި ހުރި ގައިޑް ލައިންތަކާއި، އޮޕަރޭޝަނުގައި ބޭނުންކުރި ސާމާނު ނަގައި، ހޮހޮޅައިގެ ތެރެ ކުރިން އޮތް ހާލަތަށް ރުޖޫއަކުރުމުގެ މަސައްކަތް ކުރުމެވެ. އަދި ތަޙުޤީޤާ ގުޅުން ހުރި ތަކެތި ނަގައި ދިވެހި ފުލުހުންނާ ހަވާލުކޮށްފައިވާކަމަށް ވެސް ބަޔާނުގައި ބުނެފައި ވެއެވެ. 

އެމީހުންގެ ހަށިތައް ނެގުމަށް ހިންގި ރިކަވަރީ އޮޕަރޭޝަނުގެ ތެރެއިން ސާޖަންޓް ފަސްޓް ކްލާސް މުޙައްމަދު މަހުދީ ގެ ފުރާނަ ވެސް ވަނީ ގެއްލިފަ އެވެ. 

މި ހާދިސާއާ ގުޅިގެން އިޓަލީ ސަރުކާރުން ވެސް އަދި ދިވެހި ސަރުކާރުން ވެސް އަންނަނީ ހާދިސާގެ ތަހުގީގެއް ހިންގަމުން ނެވެ.