އޮޅު ހިޔާއަށް ގެންދާ ފުރަތަމަ ބެޗްގެ ބުޅާތައް މިހަފްތާގައި ނަގަން ފަށާނެކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ.އައިޝަތު ރަމީލާ ވިދާޅުވެއްޖެއެވެ.

މާލެ ސަރަހައްދުގެ މަގުތަކުގައި 4000 އަށްވުރެ ގިނަ ބުޅާ އުޅޭ ކަމަށާއި މިބުޅާތަކުގެ ތެރޭގައި އެކި ހާލަތްތަކުގައި ތިބި ބުޅާތަައް ފާހަގަ ކުރެވޭ ކަމަށާއި، މިބުޅާތައް އެއްފަހަރާ ނެގުމަކީ ފަސޭހަ އަދި އެންމެ ރައްކާތެރި ކަމެއް ނޫން ކަމަށް ވެސް ވިދާޅުވެފައިވެއެވެ. 

ފެސިލިޓީއަށް ބުޅާތައް ގެންދިޔުމަށް ޚާއްސަ ޕްލޭނެއް ހަދައި މިޕްލޭންގެ ދަށުން ބުޅާތައް ނަގަމުންދާނީ ބެޗް ބެޗަށެވެ. އަދި ފެސިލިޓީއަށް ގެންދާ ބުޅާތަކުގެ ސިއްޙީ މައްސަލަ ދެނެގަނެ ފަރުވާ ދިނުމުގެ ވަސީލަތްތައްވަނީ އިންތިޒާމުކުރެވިފައެވެ. މީގެއިތުރުން ފެސިލީޓީއަށް ގެންދެވޭ ހިސާބުން ބުޅާތައް ރަޖިސްޓްރީ ކުރެވި ވެރިފަރާތެއް ނެތް ބުޅަލުގެ އާބާދީ ދައްކުރުމުގެ ގޮތުން މަސައްކަތްތަކެއް ކުރެވިގެންދާނެއެވެ.

މިހާރު ޤާއިމް ކުރެވިފައިވާ ފެސިލިޓީން އެއްފަހަރާ 4000 ބުޅަލަށް ގެންގުޅެވޭނެއެވެ. މިފެސިލިޓީން ފަރުވާދޭނީ އެތަނަށް ގެންދާ ބުޅަލުގެ އިތުރުން ޕެޓްގެ ގޮތުގައި އާންމުން ގެންގުޅޭ ބުޅާތަކަށެވެ. އާންމުންގެ ތެރެއިން ބުޅާ އެޑޮޕްޓް ކުރަން ބޭނުންވާ ފަރާތްތަކަށް އެފުރުސަތު ހުޅުވާލާނެކަމަށް ވަޒީރު ވިދާޅުވެފައިވެއެވެ. 

މިފެސިލީޓީގައި ބުޅަލުގެ ގްރޫމިންއަށް ސެލޫނަކާއި ބުޅާ ގެންގުޅޭ ފަރާތްތަކުން ދަތުރުދާނަމަ އެނބުރި އަންނަންދެން ފެސިލިޓީއަށްލުމުން ބަލަހައްޓައި ދިނުމުގެ ޚިދުމަތްވެސް ދެނޭކަމަށްް ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ.އައިޝަތު ރަމީލާ ވިދާޅުވިއެވެ.