ސްޓެލްކޯގެ މެނޭޖިން ޑިރެކްޓަރުގެ މަޤާމަށް ޑރ. އަލީ އަޒްވަރު މިއަދު އައްޔަނުކުރައްވައިފި އެވެ.

ޕީސީބީން ބުނީ ‏ސްޓޭޓް އިލެކްޓްރިކް ކޮމްޕެނީ ލިމިޓެޑްގެ މެނޭޖިންގ ޑިރެކްޓަރުގެ މަޤާމަށް، ސ. ފޭދޫ / ނެސްޕްރޯވިލާ، ޑރ. އަލީ އަޒްވަރު، 28 އެޕްރިލް ވަނަ ދުވަހުން ފެށިގެން ވަނީ އައްޔަނުކޮށްފައިވާ ކަމަށެވެ.

ސްޓެލްކޯގެ އެމްޑީގެ މަގާމު ހުސްކޮށް އޮތް ދުވަސްތަކުގައި ވެސް އެ ކުންފުނި ހިންގެވީ އަޒްވަރުގެ ބެއްލެވުމުގެ ދަށުންނެވެ. އޭނާ ހުންނެވީ ޑީއެމްޑީގެ މަޤާމުގަ އެވެ.

ޑރ. ޢަލީ އަޒްވަރަކީ ހަކަތައިގެ ދާއިރާގައި ދިގު މުއްދަތަކަށް ޚިދުމަތް ކުރައްވާފައިވާ، އަދި ހަކަތައިގެ ދާއިރާގެ ސިޔާސަތުތައް އެކުލަވައިލުމުގެ ތަޖުރިބާކާރު ބޭފުޅެކެވެ. ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގައި ވިހި އަހަރަށްވުރެ ގިނަ ދުވަހު ޚިދުމަތް ކުރައްވާފައިވާ ޑރ. އަޒްވަރު މިހާރު ހުންނެވީ އެ ކުންފުނީގެ ޑެޕިއުޓީ މެނޭޖިންގ ޑައިރެކްޓަރުގެ މަޤާމުގަ އެވެ. 

ސްޓެރެޓެޖިކް ލީޑަރޝިޕް، އޮޕަރޭޝަންސް، ފައިނޭންސް، އަދި ބިޒްނަސް ޑިވެލޮޕްމަންޓްގެ ދާއިރާއިން އޭނާ ހާސިލުކުރައްވާފައިވާ ތަޖުރިބާގެ އަލީގައި، ރާއްޖޭގެ މައިގަނޑު ކަރަންޓު ޚިދުމަތްދޭ ކުންފުނީގެ މިސްރާބު ކަނޑައެޅުމުގައި އޭނާ ވަނީ މުހިންމު ދައުރެއް އަދާކުރައްވާފަ އެވެ.

ޑރ. އަޒްވަރު ސްޓެލްކޯއާ ގުޅިވަޑައިގަތީ 1997 ވަނަ އަހަރު ޓްރޭނީއެއްގެ ގޮތުގަ އެވެ. އެއަށްފަހު، ކުންފުނީގެ ފަންނީ އަދި އިދާރީ އެކި ފަންތީގެ މަޤާމުތައް ފުރުއްވަމުން ގޮސް، އޭނާ ވަނީ ސޭލްސް އެންޑް މާކެޓިންގ، ބިލިންގ ސާވިސަސް، އަދި ބިޒްނަސް ޑިވެލޮޕްމަންޓް ފަދަ މުހިންމު ދާއިރާތައް އިސްވެ ހިންގަވާފަ އެވެ. ޑެޕިއުޓީ މެނޭޖިންގ ޑައިރެކްޓަރުގެ މަޤާމާއި، އޭގެ ކުރިން އަދާކުރެއްވި ޗީފް އޮޕަރޭޓިންގ އޮފިސަރުގެ (ސީއޯއޯ) މަޤާމުގައި ހުންނަވައިގެން، ކުންފުނީގެ ހިންގުން ހަރުދަނާކުރުމަށާއި، ރާއްޖޭގެ ހަކަތައިގެ ބޭނުންތަކަށް އެކަށޭނަ ސިޔާސަތުތައް އެކުލަވައިލުމަށް އޭނާ ގިނަގުނަ މަސައްކަތްތަކެއް ކުރައްވާފައިވެ އެވެ.

ކުންފުނީގެ އިސް ހިންގުންތެރިއެއްގެ ޒިންމާގެ އިތުރުން، ޑރ. އަޒްވަރު ވަނީ ރައީސުލްޖުމްހޫރިއްޔާ އައްޔަންކުރައްވާ އެގްޒެކެޓިވް ޑައިރެކްޓަރެއްގެ ހައިސިއްޔަތުން ސްޓެލްކޯގެ ބޯޑު މެންބަރުކަން ވެސް ކުރައްވާފައެވެ. މީގެ އިތުރުން، ފިއުލް ސަޕްލައި މޯލްޑިވްސް (އެފްއެސްއެމް) ގެ ނޮން-އެގްޒެކެޓިވް ޑައިރެކްޓަރުގެ މަޤާމު ފުރުއްވައި، އެ ކުންފުނީގެ ހިންގުމާއި އިސްތިރާތީޖީ މަސައްކަތްތަކުގައި ވެސް އޭނާ ލަފާދެއްވާފައިވެ އެވެ.

ތަޢުލީމީ ދާއިރާއަށް ބަލާއިރު، ޑރ. އަޒްވަރު ވަނީ ނިއުޒީލެންޑުގެ ވިކްޓޯރިއާ ޔުނިވަރސިޓީ އޮފް ވެލިންގޓަނުން ޑޮކްޓަރ އޮފް ފިލޯސަފީ (ޕީއެޗްޑީ) ހާސިލުކުރައްވާފަ އެވެ. އޭނާގެ ޕީއެޗްޑީ ދިރާސާ ބިނާކުރެއްވީ ކުދި ޖަޒީރާ ޤައުމުތަކުގައި އިއާދަކުރަނިވި ހަކަތައިގެ ވަސީލަތްތައް ފެތުރުމާ ގުޅޭގޮތުންނެވެ. އޭނާ ވަނީ ނޭޝަނަލް ޔުނިވަރސިޓީ އޮފް ސިންގަޕޫރުން މާސްޓަރ އިން ޕަބްލިކް ޕޮލިސީ ހާސިލުކުރައްވައި، އިނގިރޭސިވިލާތުގެ ޔުނިވަރސިޓީ އޮފް ޝެފީލްޑުން ބިޒްނަސް ސްޓަޑީޒްގެ ދާއިރާއިން އޮނަރސްއާއެކު ބެޗްލަރސް ޑިގްރީ ހާސިލުކުރައްވާފައެވެ. އޭނާގެ ތަޢުލީމީ އަދި މަސައްކަތުގެ ތަޖުރިބާ ބިނާވެފައިވަނީ ދެމެހެއްޓެނިވި ހަކަތަ ކުރިއެރުވުމާއި، ޖަޒީރާ ޤައުމުތަކަށް އެކަށޭނަ ސިޔާސަތުތަކުގެ އެހީގައި ދާއިރާ ހަރުދަނާކުރުމުގެ މައްޗަށެވެ.

ރަސްމީ މަޤާމުތަކުގެ އިތުރުން، ޑރ. އަޒްވަރު ވަނީ އޭޝިއާ، މެދުއިރުމަތި، އަދި އެމެރިކާގައި ބޭއްވުނު އިއާދަކުރަނިވި ހަކަތަ، ކާރިސާތަކުގެ ނުރައްކާ ކުޑަކުރުން، އަދި މުއާސަލާތީ އުކުޅުތަކާ ގުޅޭ ބައިނަލްއަޤްވާމީ ސެމިނާރތަކާއި ވަރކްޝޮޕްތަކުގައި ބައިވެރިވެވަޑައިގެންފައެވެ. އަދި ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އިން ބާއްވާ ބޯޑު މެންބަރުން ތަމްރީނުކުރުމުގެ ޕްރޮގްރާމްތައް ފުރިހަމަކުރައްވައި، ކޯޕަރޭޓް ގަވަރނަންސްގެ ދާއިރާއިން ވެސް ތަޖުރިބާ ހާސިލުކުރައްވާފައިވެ އެވެ.