ރިޔާސީ އިންތިހާބާއި، ރައްޔިތުންގެ މަޖިލީހުގެ އިންތިހާބުގެ އިތުރުން ލޯކަލް ކައުންސިލުތަކުގެ އިންތިހާބު އެއް ދުވަހެއްގައި ބޭއްވުމަކީ އެންމެ ރަނގަޅު ގޮތް ކަން ފާހަގަކުރެއްވުމާއެކު ސަރުކާރުން މައި ދެ އިންތިހާބު އެއް ދުވަހެއްގައި ބޭއްވުމާމެދު ގެންގުޅުއްވާ ވިސްނުމަށް އިލެކްޝަން ކޮމިޝަނުގެ ކުރީގެ ރައީސް ފުއާދު ތައުފީގު ތާއީދުކުރައްވައިފި އެވެ. 

"އެމްއެމްޓީވީ" އަށް ދެއްވި ބަސްދީގަތުމެއްގައި އިލެކްޝަން ކޮމިޝަނުގައި ގިނަ ދުވަސްތަކެއް ވަންދެން މަސައްކަތް ކުރެއްވި ފުއާދު ވިދާޅުވީ ދެ އިންތިހާބު އެއް ދުވަހެއްގައި ބޭއްވުމުން މުޅި ގައުމަށް އޭގެ ފައިދާ ލިބިގެންދާކަމަށެވެ. 

ތާރީހަށް ބަލާއިރު ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބާ ދެެމެދު ހޭދަވާ ހަ މަހުގެ މުއްދަތުގައި އޭރަކު އޮންނަ ސަރުކާރަކަށް އިދިކޮޅު މަޖިލީސްތަކުން ދުއްތުރާ ކުރާކަމަށާއި ނަތީޖާއަކީ ސަރުކާރުން ކުރިއަށްގެންދަން ބޭނުންވާ ތަރައްގީއަށް ހުރަސްއެޅިގެން ދިއުންކަމަށް ފުއާދު ވިދާޅުވި އެވެ. 

ރިޔާސީ ނިޒާމުން ވެރިކަން ހިންގާ ހުރިހާ ގައުމެއް ގައި ދެ އިންތިހާބު ބާއްވަނީ އެއް ދުވަހެއްގައި ކަން ފުއާދު ފާހަގަކުރެއްވި އެވެ. އަދި މީގެ ކުރިން އެމްޑީޕީ ސަރުކާރުގައި ދެ އިންތިހާބު އެއް ދުވަހެއްގައި ބާއްވަން މަޝްވަރާތަކެއް ކުރެވުނުކަން ފާހަގަކުރެއްވި އެވެ. 

ފުއާދު ވިދާޅުވީ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްދުވަހެއްގައި ބޭއްވުމުގައި ހުރި ފައިދާތައް ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކުރަމް ކަމާލުއްދީން ވަރަށް ތަފްސީލީ ގޮތެއްގައި ވިދާޅުވެދެއްވާފައިވާކަމަށާއި އަކުރަމުގެ ވާހަކަފުޅަށް ފުރިހަމައަށް ތާއީދުުކުރައްވާ ކަމަށެވެ. 

ދެ އިންތިހާބު އެއްކޮށްލުުމުން ލިބޭނެ ފައިދާތައް އަކުރަމުގެ ދުލުން: 

1 ވެރިކަމަށް ކުރިމަތިލާ ފަރާތުން ނުވަތަ ވެރިކަމުގައި ހުރެ އިތުރު ދައުރަކަށް ކުރިމަތިލާ ފަރާތުން މަޖިލިސް ހޯދުމަށް ފޯކަސް ކުރާ މިންވަރު ކުޑަވުމުން ނުފޫޒުން އެއްކިބާވެ ރައްޔިތުން ބޭނުންވާ މަޖިލީހެއް ނެގުމަށް މަގުފަހިވުން.

2 މަޖިލިސް މެންބަރު ހޮވުމަށް ވޯޓްދޭ ފަރާތަށް، އެ ވޯޓު ދޭ އިރު ވެރިކަމަށް އާންނާނީ ވޯޓް ދިން ކެނޑިޑޭޓު ނިސްބަތްވާ ޕާޓީކަން ނޭނގުން، އެހެންވުމުން މަޖިލީހަށް ކުރިމަތިލާ ކެނޑިޑޭޓުންގެ ތެރެއިން ރައްޔިތު މީހާ ހިތް އެދޭ ފަރާތެއް ހިޔާރުކުރަން ފަސޭހާވާނެ ކަމަށް ބެލެވޭ.

3 އިންތިހާބުގެ ފްރެޝަރަށް ސަރުކާރުގެ މެއިން ފޯކްސް އަބަދު ބަދަލުކުރަންޖެހޭ ޖެހުން ނިމުމަކަށް އައުން، އޭގެ ސަބަބުން ސަރުކާރަށް އެ ސަރުކާރެއްގެ މައިގަނޑު އަމާޒަށް މަސައްކަތް ކުރާނެ މާހުލެއް ގާއިމްވެގެންދާނެ.

4 އިންތިހާބު ތައް ދައުރުގެ ގިނަ ދުވަސްތަކެއްގައި ބޭއްވުމުން ދައުލަތުން ނުވަތަ އެއިރެއްގަ އޮންނަ ސަރުކާރަކުން ކުރާ ހޭދަ، އިންތިހާބު ބާއްވާ ދުވަހުހުގެ އަދަދު މަދުވުމުން ކުޑަވެގެން ދިއުން.

5 ދެ އިންތިހާބެއް އެއްދުވަހެއްގައި ބޭއްވުމުން ކުޑަވެގެންދަނީ އިންތިހާބުތައް 2 ދުވަހު ބާއްވާނަމަ އިލެކްޝަނުން ކުރާ ހޭދަ އެކަނި ނޫންކަން، އޭގެ ބަދަލުގައި އިންތިހާބު ކާމިޔާބުކުރުމަށް ސަރުކާރުތަކުން ވަޒީފާ އިތުރުކުރާ ނިސްބަތް މަދުވެ، ޕާޓީތަކުން ކުރާ ހޭދަވެސް ކުޑަވުން.

6 އެންމެ މުހިންމު އިންތިހާބު ބާއްވާ ދުވަހު ރައްޔިތުންގެ މަޖިލިސް އިންތިހާބުވެސް ބޭއްވުމުން ވޯޓުލާ މީހުންގެ އަދަދު އެތައް ގުނައަކުން އިތުރުވުން.