ޤާނޫނީ އިޖުރާއަތްތައް ފުރިހަމަކޮށްގެން ގާނޫނު އަސާސީގެ ކޮންމެ މާއްދާއަކަށް ވެސް ބަދަލުގެނެވޭނެކަމަށް ގާނޫނީ ވަކީލު އަދި  ރައްޔިތުންގެ މަޖިލީހުގެ ފޮނަދޫ ދާއިރާގެ ކުރީގެ މެމްބަރު މޫސާ ސިރާޖު ވިދާޅުވެއްޖެ އެވެ. 

ގާނޫނު އަސާސީއަށް މި ސަރުކާރުން މިފަހުން ގެނެސްފައިވާ ބަދަލުތަކަކީ ޤާނޫނުއަސާސީގެ ރޫހާ ޚިލާފު ބަދަލުތަކެއްކަމަށް ބުނެ ވާދަވެރި އެމްޑީޕީން ދައްކަމުން އަންނަ ވާހަކަތަކަށް ރައްދު ދެއްވައި އެކްސް ގައި ޝާއިއު ކުރެއްވި ޕޯސްޓެއްގައި ސިރާޖު ވިދާޅުވީ ޤާނޫނުއަސާސީއަކީ ބަދަލުކުރެވޭނެ އެއްޗެއް ކަމަށެވެ.

ޤާނޫނުއަސާސީއަށް އިސްލާހު ގެނައުމުގެ އިޖުރާއަތްތައް ބަޔާންކޮށްފައިވަނީ، ޒަމާނާއި ހާލަތަށް ރިއާޔަތްކޮށް ބަދަލުތައް ގެނައުމުގެ މަގު ފަހިކުރުމުގެ ބޭނުމުގައިކަން ފާހަގަކުރައްވަމުން ސިރާޖު ވިދާޅުވި ބަދަލު ގެނައުމުގައި މުހިންމީ އިޖުރާއަތްތައް ފުރިހަމަ ކުރުން ކަމަށެވެ.

ކަނޑައެޅިފައިވާ ޤާނޫނީ އިޖުރާއަތްތައް ފުރިހަމަކޮށްގެން، ޤާނޫނުއަސާސީގެ ކޮންމެ މާއްދާއަކަށް ވެސް ބަދަލު ގެނައުމުގެ ފުރުސަތު ދިވެހިރާއްޖޭގެ ޤާނޫނުއަސާސީގައި ދީފައިވާކަން ފާހަގަކުރައްވައި ސިރާޖު ވަނީ ރިޔާސި އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމަށް ހުށަހެޅުނު އިސްލާހަކީ ޤާނޫނުއަސާސީގެ އަސާސީ އޮނިގަނޑަށް ނުވަތަ މައިގަނޑު އުސޫލުތަކަށް ބަދަލު އަންނާނެ ކަމެއް ނޫންކަަށް ވިދާޅުވެފަ އެވެ. 

ގާނޫނު އަސާސީއަށް ގެންނަ ވަކި ބަދަލަކަށް ވަކި ބަޔަކު ނުވަތަ ސިޔާސީ ޕާޓީއަކުން ނުރުހުމަކީ، އެ ބަދަލަކީ ޤާނޫނުއަސާސީގެ ރޫހާ ޚިލާފު ކަމެއް ކަމަށް ބެލެވޭނެ ސަބަބެއް ނޫންކަމަށް އޭނާ ވިދާޅުވި އެވެ.

ޕޯސްޓު ނިންމަވާލައްވަމުން ސިރާޖު ވިދާޅުވީ ނުރުހޭ ބަޔަކު ނުރުހުނަސް ޑިމޮކްރެޓިކް ނިޒާމެއްގައި އަބަދުވެސް އޮންނާނީ ގިނަމީހުން ބޭނުންވާގޮތް ކަން ހަނދާންކުރަންޖެހޭ ކަމަށެވެ.