ނިމިދިޔަ ސަރުކާރުގައި މުޅި ދައުލަތް ބަންޑުން ޖަހާލައިގެން ރައްޔިތުންގެ މަޖިލިސް އިންތިޚާބަށް ނުފޫޒު ފޯރުވަމުން ދިޔަ ކަމަށާއި، ސަރުކާރުގެ އަމާޒަކީ ކުރިއަށްއޮތްތަނުގައި މިކަން މިގޮތަށްވިޔަ ނުދިނުން ކަމުގައި ހެންވޭރު އުތުރު ދާއިރާގެ މެމްބަރު އަހުމަދު އައިފާން ވިދާޅުވެއްޖެއެވެ. 

އެމްއެމްޓީވީގެ ދިވެހީންގެ ރާއްޖެ ޕްރޮގްރާމުގައި ބައިވެރިވެވަޑައިގެން ވާހަކަފުޅުދައްކަވަމުން އައިފާން ވަނީ ރިޔާސީ އިންތިޚާބާއި، މަޖިލިސް އިންތިޚާބު އެއް ދުވަހެއްގައި ބޭއްވުމަށް ނަގާ ރިފަރެންޑަމް ވޯޓަށް އިދިކޮޅުން އަމާޒުކުރާ ފާޑުކިޔުންތަކަށް ރައްދު ދެއްވާފައެވެ.

އައިފާން ވިދާޅުވީ އިދިކޮޅުން ވަރަށް ޒިންމާދާރުކަން ކުޑަކޮށް ރައްޔިތުންނަށް އޮޅުވާލުމުގެ ނިޔަތުގައި ދެ އިންތިކާބު އެއް ދުވަހެއްގައި ބޭއްވުމާ ގުޅޭގޮތުން ވާހަކަ ދައްކަމުންދާކަމަށާއި، ސަރުކާރުން މަސައްކަތް ކުރަނީ ދެ އިންތިޚާބު އެއްކޮށްލަން ނޫން ކަމަށެވެ. މި ދެ އިންތިޚާބު އެއްކޮށްލެވޭނެ އެއްވެސް ގޮތެއް ނެތްކަން ވިސްނާލައިފިނަމަ އެނގޭނެ ކަމަށް މެމްބަރު ވިދާޅުވިއެވެ. 

އައިފާން އިތުރަށް ވިދާޅުވީ ދިވެހިރާއްޖޭގައި ޑިމޮކްރަސީ ނިޒާމު ގާއިމްކުރެވުނު ހިސާބުން ފެށިގެން މަޖިލިސް އިންތިޚާބު ބާއްވަމުން އައީ ރިޔާސީ އިންތިޚާބު ބާއްވާތާ ހަމަސް ދުވަސް ފަހުންކަމަށެވެ. އެހެންނަމަވެސް މިގޮތަށް އަމަލުކުރުމުގެ ސަބަބުން ސަރުކާރުން އިންތިޚާބުތަކަށް ނުފޫޒު ފޯރުވާ ކަމުގެ ތުހުމަތުތައް ރައްޔިތުން ސަރުކާރަށް ކުރާ ކަމަށެވެ. 

ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެރިކަމާ ހަވާލުވެވަޑައިގެންނެވިއިރު މަޖިލީހުގައި އޮތް އެމްޑީޕީގެ ސުޕަރ މެޖޯރިޓީއިން ކަންކަން ކުރިގޮތް ފާހަގަކުރައްވައި އައިފާން ވިފާޅުވީ މަޖިލީހުން ސަރުކާރަށް ޖެއްސުންކުރުމަށް ކުރި މަސައްކަތްތައްވެސް ރައްޔިތުންނަށް ވަރަށް ސާފު ކަމަށެވެ. މިކަންކަމަކީ ރައްޔިތުންނަށް ކިޔައިދޭންޖެހޭ ކަންކަމެއް ނޫން ކަމަށް އައިފާން ވިދާޚުވިއެވެ. 

ރާއްޖޭގެ އެންމެ ގިނަ ވޯޓުލުމަށް ނިކުންނަ އިންތިޚާބަކީ ރިޔާސީ އިންތިޚާބަށް ވާއިރު، ދެ އިންތިޚާބު އެއް ދުވަހެއްގައި ބޭއްވުމުން މަޖިލީހަށް އިންތިޚާބުކުރާނެ ބަޔަކު ނިންމަންވެސް ރައްޔިތުންނަށް ފަސޭހަވާނެ ކަމަށް އައިފާން ވިދާޅުވިއެވެ. ޑިމޮކްރަސީގެ މައިގަނޑު އަސާސަކީ ރައްޔިތުން ނިކުމެ ކަންކަން ނިންމުން ކަމަށްވާއިރު، ސަރުކާރުގެ އަމާޒަކީ ރައްޔިތުންނަށް އެކަން ފަހިކޮށްދިނުން ކަމަށް އައިފާން ވިދާޅުވިއެވެ.  

އަންނަ މަހުގެ ހަތަރު ވަނަ ދުވަހު ލޯކަލް ކައުންސިލް އަދި ޑަބްލިއުޑީސީ އިންތިޚާބު ބާއްވަން ނިންމާފައިވާއިރު، ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމާގުޅޭ ރިފަރެންޑަމް ވޯޓެއް ނެގުމަށްވެސް ވަނީ ނިންމާފައެވެ. އެހެންނަމަވެސް އިދިކޮޅުން ދަނީ މިކަނަށް ފާޑުކިޔުންތައް އަމާޒުކުރަމުންނެވެ.