ޗައިނާ އާއެކު ވެފައިވާ މިނިވަން ވިޔަފާރީގެ އެއްބަސްވުމަށް ކުރިއަށް އޮތް 20 ދުވަސް ތެރޭގައި އަމަލު ކުރަން ފެށޭނެ ކަމަށް އިކޮނޮމިކް ޑިވެލޮޕްމަންޓް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ. 

އެމްއެމްޓީވީގެ "ރައްޔިތުންގެ ދިފާޢުގައި" ޕްރޮގްރާމުގައި ވާހަކަ ދައްކަވަމުން ސައީދު ވިދާޅުވީ ޗައިނާ އާއެކު ވެފައިވާ އެއްބަސްވުމަށް އަމަލުކުރަން ފެށުމުން ޗައިނާއިން އެތެރެކުރާ ވަރަށް ގިނަ ބާވަތްތަކުގެ ޑިއުޓީ ސުން ރޭޓަށް ވާނެ ކަމަށެވެ.

"މިއަދުން ފެށިގެން ބަރާބަރު 20 ދުވަސް ތެރޭގައި މިނިވަން ވިޔަފާރީގެ އެއްބަސްވުން ތަންފީޒު ކުރެވެން ފަށާނެ ޗައިނާ އާއެކު، ޗައިނާއިން ރައްޖެއަށް އިމްޕޯޓުކުރާ ގާތްގަނޑަކަށް 70 އާއި 90 ޕަސެންޓާ ދެމެދުގެ މުދަލުން، ސުން ޕަސެންޓުން ޑިޔުޓީ ކުޑަވެގެންދާނެ،" އޭނާ ވިދާޅުވިއެވެ.

ސައީދު ވިދާޅުވީ އިންޑިޔާއެކު ވެފައިވާ ކަރަންސީ ސްވޮޕް އެއްބަސްވުމުގެ ދަށުން، ދިވެހި ރުފިޔާއިން އަގު ދައްކައިގެން އިންޑިޔާ އިން މުދާ އެތެރެ ކުރަން އަންނަ އަހަރު ފެށޭނެ ކަމަށެވެ. ސަރުކާރުން ވަނީ އިންޑިއާގެ އިންސްޓެންޓް ޕޭމެންޓް ސިސްޓަމް، ޔުނިފައިޑް ޕޭމެންޓްސް އިންޓަ ފޭސް (ޔޫޕީއައި)ގެ ދަށުން ރޫޕޭ ކާޑު ވެސް ރާއްޖެއަށް ތައާރަފްކޮށްފައެވެ.

ސަޢީދު ވިދާޅުވީ ރާއްޖެއަށް ދިމާވެފައިވާ ބޭރު ފައިސާގެ މައްސަލައަށް ކުރިއަށް އޮތް ތަނުގައި ދާއިމީ ހައްލެއް ލިބިގެންދާނެ ކަމަށާއި، އެކަމުގެ ސަބަބުން ވިޔަފާރިވެރިންނާއި އާންމުންނަށް ވެސް ވަރަށް ބޮޑު ފަސޭހައެއް ލިބިގެން ދާނެ ކަމަށެވެ.