ENGLISH
04 އޭޕްރީލު 2025
'ކުމެވި ޕޯޓަލް' އާ އެކު ބީސީސީން ފޯރުކޮށްދޭ ހުރިހާ ޚިދުމަތެއް އެއް މަންސައަކުން
11 ޑިސެމްބަރު 2024
|
ބީސީސީން ތަޢާރަފްކުރި ޕޯޓަލް
އެންމެ މަޤްބޫލު
ކުދި އަދި މެދު ފަންތީގެ ވިޔަފާރިތަކަށް ހާއްސަކޮށްގެން އުފައްދާފައިވާ ކުންފުނި، ބިޒްނަސް ސެންޓާ ކޯޕަރޭޝަން (ބީސީސީ) އިން ދޭ ހުރިހާ ޚިދުމަތްތަކެއް އޮންލައިންކޮށް އެއް ޕްލެޓްފޯމަކުން ދޭން 'ކުމެވި' ޕޯޓަލް އިފުތިތާޙުކޮށްފި އެވެ.
'ކުމެވި ޕޯޓަލް' ގެ ނަމުގައި އިފްތިތާޙު ކުރި މި ޕޯޓަލް މެދުވެރިކޮށް، ބީސީސީން ދެމުން އަންނަ ޚިދުމަތްތައް ކަމަށްވާ، އޮތެންޓިކް މޯލްޑިވްސް، ސީޑް ބައި ބީސީސީ، މަހަ ޕޯޓަލް، އަދި ކްރިއޭޓިވް އިކޮނޮމީ ފަންޑާއި އަމިއްލަ މަސައްކަތް ކުރައްވާ ފަރާތްތަކުގެ ދަފްތަރުގައި ރަޖިސްޓަރ ކުރުމުގެ އިތުރުން ވިޔަފާރި ކޮންސަލްޓެންސީގެ ޚިދުމަތަށް އެދެވޭނެއެވެ.
އެގޮތުން ބީސީސީން ފޯރުކޮށްދޭ މި ޚިދުމަތްތަކުގެ ތެރެއިން، ދިވެހި އުފެއްދުންތެރިން އުފައްދާ ތަކެތި ވިއްކުމަށް ޚާއްޞަކޮށްފައިވާ، އޮތެންޓިކް މޯލްޑިވްސްގެ ސަޕްލަޔަރަކަށް ވާންއެދޭ ފަރާތްތަކަށް އެކަމަށް އެދި ހުށަހެޅުމާއި، ސީޑް ބައި ބީސީސީންދޭ ޚިދުމަތްތައް ކަމަށްވާ، މަސައްކަތު ޖާގަތައް ހޯދުމަށް އެދި ހުށަހެޅުމާއި، ވިޔަފާރި ފެށުމަށް ނުވަތަ ވިޔަފާރިއާ ބެހޭ ކަންކަމުގައި ތަޖުރިބާކާރުންގެ ޚިޔާލާއި މަޝްވަރާ ހޯދުމަށް ބޭނުންވާ ކޮންސަލްޓެންސީގެ ޚިދުމަތް މި ޕޯޓަލް މެދުވެރިކޮށް ވަރަށް ފަސޭހައިން ލިބޭނެއެވެ.
މީގެ އިތުރުން، މަސްވެރި އުފެއްދުންތައް ވިއްކުމަށް ޚާއްޞަ "މަހަ" ޕޯޓަލްގެ ޚިދުމަތްތައް ހޯދުމަށާއި، އަމިއްލަ މަސައްކަތް ކުރާ ފަރާތްތަކުގެ ދަފްތަރުގައި ރަޖިސްޓަރ ކުރުމުގެ އިތުރުން، ބީސީސީން ދާދިފަހުން ފެށި ކްރިއޭޓިވް އިކޮނޮމީ ފަންޑުގެ ދަށުން ފޯރުކޮށްދޭ ޚިދުމަތްތައް ވެސް މި ޕޯޓަލް މެދުވެރިކޮށް ލިބޭނެއެވެ. މި ޚިދުމަތްތަކަކީ ކުރިން ވަކިވަކި ވެބްސައިޓްތަކެއް މެދުވެރިކޮށް ބީސީސީން ދެމުންދިޔަ ޚިދުމަތްތަކެކެވެ.
'ކުމެވި ޕޯޓަލް'ގެ ޚިދުމަތް ހޯދާ ފަރާތްތަކަށް ފަސޭހަ ކުރުމުގެ ގޮތުން މި ޕޯޓަލް ޤާއިމް ކޮށްފައިވަނީ، ބީސީސީގެ ވެބްސައިޓް www.bcc.mv ގައެވެ. ބީސީސީން ކުދި އަދި މެދުފަންތީގެ ވިޔަފާރިތަކަށް ފަސޭހަކޮށްދިނުމުގެ މަޤުޞަދުގައި އިފްތިތާޙްކުރި މި ޕޯޓަލްގެ މަސައްކަތަކީ ޔޫ.އެން.ޑީ.ޕީ އާއި ޖަޕާން ސަރުކާރުގެ އެހީތެރިކަމާއެކު ކުރެވުނު މަސައްކަތެކެވެ.
ކުމެވި ޕޯޓަލް އިފްތިތާޙް ކުރުމަށް ބީސީސީގައި އިއްޔެ ބޭއްވި ރަސްމިއްޔާތެއްގައި މި ޕޯޓަލް އިފްތިތާޙް ކޮށްފައިވަނީ ބީސީސީގެ ފޭސްބުކް ޕޭޖު މެދުވެރިކޮށް އޮންލައިން ކޮށެވެ.