ވިހި އަހަރުން ދަށުގެ ސާފް މުބާރާތުގައި ވާދަކުރާ ރާއްޖޭގެ ޒުވާން ޤައުމީ ޓީމުން ޓްރެއިނިންގ ކޭމްޕަކަށް ސިންގަޕޫރަށް ފުރައިފިއެވެ.

މިއީ މި މަހުގެ 23 އިން އޭޕްރީލް މަހުގެ 3 ގެ ނިޔަލަށް މާލޭގައި ކުރިއަށްދާ ސާފް 20 އަހަރުން ދަށުގެ މުބާރާތުގައި ވާދަކުރުމުގެ ކުރީން ޒުވާން ޤައުމީ ޓީމުން ހަފްތާއެއްގެ މުއްދަތަކަށް ޓްރެއިނިންގ ކޭމްޕެއް ފުރިހަމަކުރުމަށް ކުރާ ދަތުރެއް ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީ ބުނެފައެވެ.

މި ތަމްރީނު ދަތުރުގެ ތެރެއިން، މި މަހުގެ 8 އަދި 11 ވަނަ ދުވަހު ސިންގަޕޫރުގެ 19 އަހަރުން ދަށުގެ ޓީމާ ދެކޮޅަށް އެކުވެރިކަމުގެ ދެ މެޗެއް ކުޅުމަށް ހަމަޖެހިފައިވާ ކަމަށް އެފްއޭއެމް އިން ބުންޏެވެ.

މުބާރާތަށް ތައްޔާރުވުމުގެ ގޮތުން ޒުވާން ޤައުމީ ޓީމުގެ ފަރިތަކުރުންތައް ކުރިއަށްގެންދަނީ ސީނިއާ ޤައުމީ ފުޓްބޯޅަ ޓީމުގެ ހެޑް ކޯޗު އަދި އެފްއޭއެމްގެ ޓެކްނިކަލް ޑިރެކްޓަރު، ހަންގޭރީގެ އިސްޓަވާން އުރްބާނީގެ ބެލުމުގެ ދަށުންނެވެ.

ރާއްޖޭން ފުރަތަމަ ފަހަރަށް ސާފްގެ އުމުރުފުރާގެ މުބާރާތެއް ހޯސްޓްކުރުމަށް ތައްޔާރުވުމަށް އަންނައިރު، ރާއްޖޭގެ ޒުވާން ޤައުމީ ޓީމު ހިމެނެނީ ނޭޕާލްއާއި ބޫޓާން އަދި ސްރީ ލަންކާއާއެކު ގްރޫޕް އޭ ގައެވެ. މުބާރާތުގެ ގްރޫޕް ބީ ގައި ހިމެނެނީ؛ ބަންގްލަދޭޝް އާއި އިންޑިއާގެ އިތުރުން ޕާކިސްތާން އެވެ.

މި މުބާރާތުގައި ރާއްޖޭން ކުޅޭ ފުރަތަމަ މެޗުގައި މި މަހުގެ 23 ވަނަ ދުވަހުގެ ރޭ ނިކުންނާނީ ސްރީ ލަންކާއާ ދެކޮޅަށެވެ. އޭގެ ދެ ދުވަސް ފަހުން، މި މަހުގެ 25 ވަނަ ދުވަހު ބޫޓާނާ ދެކޮޅަށް ކުޅުމަށް ހަމަޖެހިފައިވާއިރު، ގްރޫޕް ސްޓޭޖުގެ ފަހު މެޗުގައި މި މަހުގެ 27 ވަނަ ދުވަހު ނިކުންނާނީ ނޭޕާލްއާ ދެކޮޅަށެވެ.