އައްޑޫ ސިޓީގެ މޭޔަރުކަމާއި އެ ސިޓީ ކައުންސިލުގެ އަޣުލަބިއްޔަތު ވެރިކަންކުރާ ޕީޕަލަސް ނޭޝަނަލް ކޮންގެރެސްއަށް އެ ސިޓީ ރައްޔިތުން ދެއްވައިފިނަމަ ތަފާތު ފެނިވަޑައިގަންނަވާނެ ކަމަށް އެ ޕާޓީގެ ނައިބުރައީސް އަދި މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމު ވިދާޅުވެއްޖެއެވެ. 

ޕީޕަލް ނޭޝަނަލް ކޮންގްރެސް ޕާޓީގެ މާލޭ ސަރަހައްދުގެ އައްޑޫ ސިޓީ ކެމްޕެއިން ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ދެއްކެވި ވާހަކަފުޅުގައި ޝިޔާމު ވިދާޅުވީ އައްޑޫ ސިޓީގައި އެމްޑީޕީގެ މޭޔަރަކާއި އެ ޕާޓީގެ އަޣުލަބިއްޔަތު އޮންނަ ކައުންސިލެއް އޮންނަތާ 15 އަހަރުވީއިރު، މިހާރު ހުންނެވި މޭޔަރާއި އެއޮތް ކައުންސިލަކީ ނިމުނު އެމްޑީޕީ ވެރިކަމުގައިވެސް ތިއްބެވި ބޭފުޅުންކަމަށެވެ. އަދި އެ ބޭފުޅުންނަށް ރައްޔިތުންނަށް ކޮށްދެއްވުނު ކަމެއް ހާސިލުކޮށްދެއްވުނު ތަރައްގީއެއް ނެތްކަން ފާހަގަކުރައްވަނީ ހިތާމައާއެކު ކަމަށްވެސް ވަޒީރު ވިދާޅުވިއެވެ. 

އަދި ކުރިއަށް އޮތް ލޯކަލް ކައުންސިލު އިންތިހާބުގެ ކެމްޕެއިނުގައި ކުރިން ޕީއެންސީގެ ފިކުރުގެ މަންސަތަކުން ނުފެންނަ އެތައް ބަޔަކު އައްޑޫގެ ކެމްޕެއިން ހަރކާތްތަަކުން މިއަދު ފެންނަމުންދަނީ އައްޑޫ ސިޓީގެ ރައްޔިތުންގެ ހިތްތަކުން ރައީސް ޑރ.މުހައްމަދު މުއިއްޒު ޖާގަ ހޯއްދެވުމާ ގުޅިގެންކަމަށް ޝިޔާމު ވިދާޅުވިއެވެ. އެ ތާއީދާއި ލޯބި ރައީސަށް ލިބިވަޑައިގަތުމުގެ އެއް ސަބަބެއްގެ ގޮތުގައި ޝިޔާމު ފާހަގަކުރެއްވީ މުޅި ރާއްޖޭގެ ތަރައްގީއާމެދު އެމަނިކުފާނު ގެންގުޅުއްވާ ތަސައްވުރުގައި އައްޑޫ ސިޓީއަށް ދެއްވާފައިވާ އިސްކަމެވެ. 

"އަޅުގަނޑުމެންނަށް އެބަ އެނގޭ ރައީސް ޑރ.މުޙައްމަދު މުޢިއްޒުގެ އެބައޮތްކަން ތަސައްވުރެއް މުޅި ގަައުމުގެ ތަރައްގީއަށް، މުޅި ގައުމުގެ ކުރިމަގަށް، ރައްޔިތުންގެ ލާބައާ މަންފާއަށް ވަރަށް ބޮޑު ތަސައްވުރެއް އެބައޮތް. އޭގައި އެންމެ ބޮޑު އިސްކަމެއް ދީފައި އޮތް އެއް ސިޓީއަކީ މާލެ ފިޔަވައި އެންމެ ބައިބޯ ގިނަ މީހުން ދިރިއުޅޭ އައްޑޫ ސިޓީ،" ވަޒީރު ވިދާޅުވިއެވެ. 

އައްޑޫ ސިޓީގައި ހުރި ޒަމާންވީ މައްސަލަތައް ހައްލުކުރުމަށް ބޭނުންވާ ގިނަގުނަ ސިޔާސަތުތައް ރައީސްގެ މެނިފެސްޓޯގައި ހިމަނުއްވާފައިވާ ކަމަށާއި، ނަމަވެސް އެމްޑީޕީގެ ވެރިކަން ނިންމާލާފައި ދިޔައިރު، ދައުލަތުގެ ވަތްގަނޑު ހުސްކޮށްލާފައި އޮތުމުގެ ސަބަބުން އެކަަންކަން ތަންފީޒުކުރުމުގައި ގޮންޖެހުންތަކެއް ކުރިމަތިވިކަމަށް ޝިޔާމު ވިދާޅުވިއެވެ. ރައީސަށް ޖެހިވަޑައިގަތީ އެމްޑީޕީން ގައުމު ވައްޓައިލި މާލީ ބޮޑު ތުރާލުން ސަލާމަތްކުރެއްވުމުގެ މަސައްކަތްކުރައްވަންކަަން ފާހަގަކުރައްވައި ޝިޔާމު ވިދާޅުވީ އެކަން ކާމިޔާބުކުރައްވައި މި އަހަރަކީ ރާއްޖޭގެ ހުރިހާ ސަރަހައްދަކަށް އެމަނިކުފާނު ވެވަޑައިގަތް ތަރައްގީގެ ވައުދުތައް ފުދިގެންދާނެ އަަަހަރުކަމަށެވެ. 

"އައްޑޫ ސިޓީގެ ތަރައްގީއާއި ސިޓީއަށް ބޭނުންވާ އެހެނިހެން ކަންކަން ކުރިއަށްގެންދެވޭނެ ގޮތަށް އެމަަނިކުފާނު ކަންކަން ހަމަޖެއްސެވި. ފައިސާ އެއްކުރެއްވި. މިއަދު އަޅުގަނޑުމެން މިދަނީ އެ މަސައްކަތްކުރައްވަމުން. އަޅުގަނޑުމެންނަށް އެނެގޭ ކަމަކީ އައްޑޫ ސިޓީއަށް ވެވަޑައިގެންފައިވާ ވައުދުތައް ފުއްދަވާނެކަން،" ޝިޔާމު ވިދާޅުވިއެވެ. 

ރައީސް ރައްޔިތުންގެ އަރިހަށް ވަޑައިގެން ރައްޔިތުންނާ ބައްދަލުކުރައްވާ ސަބަބަކީ އެމަނިކުފާނުގެ ހިތްޕުޅުގައި ރައްޔިތުންނަށް ވެވަޑައިގަތް ވައުދުފުޅުތައް ފުއްދެވުމަށް ބޭނުންފުޅުވާަތީކަން ފާހަގަކުރައްވަމުން ޝިޔާމު ވިދާޅުވީ އައްޑޫ ސިޓީ ކައުންސިލާ ބައްދަލުކުރައްވައި އެ ސިޓީއަށް ކޮށްދެއްވާނެ ކަންކަން ކައުންސިލާ ލިޔުމުން ރައީސް ހިއްސާކުރެއްވި ކަމަށެވެ. 

ޝިޔާމު ވިދާޅުވި ގޮތުގައި އައްޑޫ ސިޓީގެ މޭޔަރަކީ ސަރުކާރުން ހިންގަމުންދާ ތަރައްގީގެ މަސައްކަތްތަކަށް ހުރަސްއެޅުމުގެ އެންމެ ކުރީ ސަފުގައި ހުންނަވާ ބޭފުޅެކެވެ. އަދި ސަަރުކާރުން އައްޑޫއަށް ތަރައްގީ ގެނައުމުގައި އެމްޑީޕީގެ އަޣުލަބިއްޔަތު އޮތް ކައުންސިލުތަކުގެ އެހީތެރިކަން ނުލިބޭނެ ކަމަށްވެސް ޝިޔާމު ވިދާޅުވިއެވެ.