ގައުމީ އެއާލައިން، މޯލްޑިވިއަނަށް ވައިޑް ބޮޑީ އެއާކްރާފްޓް ގެނެސް އަންނަ ޖެނުއަރީ މަހު، ޗައިނާގެ ހަތަރު ސިޓީއަކަށް ދަތުރުތައް ފަށަން ހަމަޖެހިފައިވާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.

މޯލްޑިވިއަންގެ ދަތުރުތައް ފެށުމާ ގުޅޭ ގޮތުން ޗައިނާގެ ބެއިޖިންގައި ބޭއްވި ރަސްމިއްޔާތުގައި މިނިސްޓަރ އަމީން ވަނީ ވައިޑް ބޮޑީ އެއާކްރާފްޓްގެ ދަތުރުތައް ކުރުމުގެ ގާބިލުކަން ގައުމީ އެއާލައިންގައި ގާއިމުކޮށްދިނުމުގެ ވަޢުދު ފުއްދަވައި ދެއްވާފައިވާތީ، ރައީސް ޑރ. މުހައްމަދު މުއިއްޒަށް ޝުކުރު އަދާކުރައްވައިފަ އެވެ. އަދި ޗައިނާގެ ވެރިރަށް ބެއިޖިންގެ އިތުރުން މޯލްޑިވިއަން އިން ދެން ދަތުރުތައް ފަށާނީ ޝަންހާއީ، ޗެންޑޫ އަދި ޒިޔާންއަށް ކަމަށް އަމީން ވިދާޅުވިއެވެ. މި ހަތަރު ސިޓީއަށް ކުރަން ހަމަޖެހިފައިވާ ދަތުރުތަކުގައި މޯލްޑިވިއަން އިން ބޭނުން ކުރާނީ އޭ330-200 ވައިޑް ބޮޑީ މަތިންދާބޯޓެވެ. މި މަރުކާގެ ބޯޓު ފަހަރުން 264 ފަސިންޖަރުންނަށް ދަތުރު ކުރެވޭނެ އެވެ.

ޗައިނާގެ އިތުރުން، ޔޫރަޕުގެ މަންޒިލްތަކަށް ވެސް މޯލްޑިވިއަންގެ ވައިޑް ބޮޑީ އެއާކްރާފްޓުގެ ދަތުރުތައް ފަށާނެ ކަމަށް ރައީސް މުޢިއްޒު ވަނީ މީގެކުރިން ވިދާޅުވެފަ އެވެ.

މޯލްޑިވިއަނުން ބައިނަލްއަޤްވާމީ ދަތުރުތައް މިހާރު ކުރަމުންދަނީ ބަންގްލަދޭޝްގެ ޑާކާ، އިންޑިއާގެ ޓްރިވެންޑްރަމް، ކޮޗިން އަދި ބެންގަލޫރުގެ އިތުރުން ސްރީ ލަންކާގެ ކޮލޮމްބޯއަށެވެ.