އިގުތިސާދު ސިންދަފާތުކުރުމަށްޓަކައި ގާނޫނުތަކަށް ގެންނަންޖެހޭ އިސްލާހީ ބަދަލުތައް ގެނައުމާއެކު، ދިހަ ވަރަަކަށް އަހަރުވެފައި އޮތް އެސްއީޒެޑްގެ ގާނޫނުގެ ދަށުން އިންވެސްޓުމެންޓަކަށް ފުރަތަމަ ފަހަރަށް ލައިސެންސް ދޫކޮށް، ދިވެހި އިގުތިސާދު ސިންދަފާތުކުރުމުގެ މަސައްކަތް ހަލުއިކޮށް ކުރަމުންދަނީ މިއަދުގެ ސަރުކާރުންކަމަށް އިގުތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ. 

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ދެއްކެވި އިގުތިސާދު ސިންދަފާތުކުރުމުގެ މަސައްކަތްތަކާ ގުޅޭ ގޮތުން ނޫސްވެރިޔަކު ކުރި ސުވާލަކަށް ޖަވާބުދެއްވަމުން ސައީދު ވިދާޅުވީ ފަތުރުވެރިކަމުގެ ތެރެއިން އިތުުރު ފައިދާތައް ހޯދިދާނެ ގޮތްތައް ބެއްލެވުމަށް ކެބިނެޓުގެ ކޮމިޓީއެއްގެ ގޮތުގައި ވިޒިޓަރ އިކޮނޮމީ ކައުންސިލު ރައީސް އުފެއްދެވި ކަމަށެވެ. 

ފަތުރުވެރިކަން ސިންދަފާތުކޮށް އެ ސިނާއަތުގެ ތެރެެއިން އައު އުފެއްދުންތަކާއި ތަޖުރިބާތައް ބާޒާރަށް ނެރުމަށް ކުރެވޭ މަސައްކަަތްތަކުގެ ތެރެއިން ސައީދު ފާހަގަކުރެއްވީ ރާއްޖޭގެ ރަށްރަށުގައި ސަގާފީ ތަރިކަތަކާއި ގުދުރަތީ މަންޒިލުތައް ފަދަ ތަންތަން ރާއްޖޭގެ ފަތުރުވެރިކަމުގެ ތެރެއަށް އެތެރެކުރުމުގެ މަސައްކަތްކުރެވެމުންދާ ކަމަށެވެ. އަދި ހަލާލު ޓޫރިޒަމްގެ މަފުހޫމު ތައާރަފުކޮށް އެ މަފުހޫމާ އެއްގޮތަށް ރިސޯޓު ތަރައްގީކުރުމަށް ރަށްތައް ދޫކުރަން ހުޅުވާލާފައިވާކަން ސައީދު ފާހަގަކުރެއްވިއެވެ. 

ފަތުރުވެރިކަން ސިންދަފާތުކުރުމަށް ހިންގަމުންދާ މަސައްކަތްތަކުގެ ތެރެއިން އެންމެ އެންމެ ބޮޑު މަސައްކަތަކީ ސަސްޓެއިނަބަލް ޓައުންޝިޕްކަން ފާހަގަކުރައްވަމުން ސައީދު ވިދާޅުވީ އެ ބާވަތުގެ ފުރަތަމަ މަޝްރޫއު ނ.އަތޮޅުގައި ފެށިފައިވާއިރު އެއީ މިހާތަނަށް ރާއްޖޭގައި ތަންފީޒުކުރާ ބޭރުގެ އެންމެ ބޮޑު އިންވެސްޓުމެންޓު ކަމަށެވެ. އެ މަޝްރޫއަށް 800 މިލިއަނެއްހައި އެމެރިކާ ޑޮލަރު ހަރަދުވާނެއެވެ. 

މިފަދަަ ޓައުންޝިޕްގައި ދުނިޔޭގެ ފެންވަރުގެ ސިއްހީ ފަރުވާ ލިބޭނެ ވަސީލަތްތަކާއި، ތައުލީމު ލިބޭނެ މަރުކަޒެއް ގާއިމުކުރެވިފައި ހުރުމުގެ އިތުރަށް، އެ ތަނުގައި ބޭނުންކުރާ ހަކަތައިގެ 60 އިންސައްތައަކީ އިއާދަކުރަނަވި ހަކަތައަށްވާނެކަން ވަޒީރު ފާހަގަކުރެއްވިއެވެ. އަދި ރާއްޖެއަށް އެތެރެކުރާ ކާބޯތަކެތީގެ ތެރެއިން ކޮންމެވެސް ބާވަތެއް އެތަނުގައި އުފައްދާނެ ކަމުގައި ސައީދު ވިދާޅުވިއެވެ. 

އެތަނުގެ އިންތިޒާމު ހަމަޖައްސާފައިވަނީ ރިއަލް އެސްޓޭޓު ވިޔަފާރިއަށް މަގުފަހިވާނެ ގޮތަށް ކަމަށާއި، އެތަނުގެ ޕްރޮޕަޓީތައް ވިއްކާއިރު ނަގާނެ ޓެކުހުތަކުގެ ރޭޓުތައް ކަނޑައަޅާފައިވަނީ މެދުއިރުމައްޗާއި އޭޝިޔާގެ ރިއަލް އެސްޓޭޓު މާކެޓުތަކުގައި ކަނޑައަޅާފައިވާ އަގުތަކާ ވާދަކުރެވޭ މިންވަރުގެ އަގެއް ކަމުގައި ވަޒީރު ފާހަގަކުރެއްވިއެވެ. 

އަދި މި ސަރުކާރު އައިއިރު އޮތް ފޮރިން އިންވެސްޓުމެންޓު ގާނޫނަކީ ޒަމާނާ ނޭކަށޭނެ ގާނޫނަކަށްވާތީ ރާއްޖޭގައި މުޅިން އައު ޒަމާނީ ފޮރިން އިންވެސްޓުމެންޓު ގާނޫނެއް ގާއިމުކޮށް މިހާރު އެއަށް އަމަލުކުރަން ފަށާފައިވާކަމަށް ސައީދު ވިދާޅުވިއެވެ. ސައީދުވަނީ އިންވެސްޓުމެންޓު ޕްރޮޓެކްޝަން ޕްރޮމޯޝަން އެގްރީމެންޓެއް ޔޫއޭއީއާއެކު ގާއިމުކުރެވި ޔޫއޭއީގެ އިކޮނޮމިކް ޒޯންތަކުގައި ރަޖިސްޓްރީކޮށްފައިވާ ވިޔަފާރިތަކަށް ރާއްޖޭގައި އިންވެސްޓުކުރާއިރު ރައްކާތެރިކަމުގެ އިތުރު ޔަގީންކަމެއް މިހާރު ލިބޭނެކަން އިއުލާނުކުރައްވާފައެވެ. 

އެސްއީޒެޑް ގާނޫނަށް ގެނެވުނު ބަދަލުތަކުގެ ތެރެއިން ޓައުންޝިޕް މަޝްރޫއުތައް އެ ގާނޫނަށް ވަން ނަމަވެސް ގްރީން ޓެކުހާއި ޓީޖީއެސްޓީ ފަދަ ޓެކުސްތަކާއި ބިމު ކުލި ފަދަ އެއްވެސް ކަމެއްގައި ހާއްސަ ލުއިތަކެއް ގާނޫނުގެ ތެރެއިން ހަމަޖައްސައިދީފައިނުވާނެ ކަމުގައި ސައީދު ވިދާޅުވިއެވެ. 

ސިންދަފާތުކުރުމުގެ މަސައްކަތްތަކުގެ ތެރޭގައި ފައިނޭންޝަލް ސެންޓަރާއި އެސްއީޒެޑް ގާނޫނުގެ ދަށުން ހިންގަަން ހުއްދަ ދީފައިވާ އިއާދަކުރަނަވި ހަކަތައިން ކަރަންޓު އުފެއްދުމުގެ މަޝްރޫއު ފަދަ މަސައްކަތްތައް ކުރެވެމުންދާކަން ފާހަގަކުރައްވަމުން ސައީދު ވިދާޅުވީ 2014 ވަނަ އަހަރު ފާސްކުރި އެސްއީޒެޑް ގާނޫނުގެ ދަށުން ފުރަތަމަ ފަހަރަށް އިންވެސްޓުމެންޓަށް ހުއްދަ ދޫކުރީ މި ސަރުކާރުން ކަމަށެވެ. 

ސައީދު ވިދާޅުވީ މި ސަރުކާރުން އިގުތިސާދު ސިންދަފާތުކޮށް ވިލުންތެރިކަން އިތުރުކުރުމަށް ގިނަ މަސައްކަތްރަކެއް ދަނީ ކުރަމުންނެވެ. އަދި އެކަންކަމުގެ ސަބަބުން ކުރިއަށްވުރެ ރާއްޖޭގެ އިގުތިސާދުގެ މައުގިފު ނުވަތަ ޕޮޒިޝަން މިހާރު ރަނގަޅުވެފައިވާކަމަށްވެސް ވިދާޅުވިއެވެ.