އަސާސީ ކާބޯތަކެތީގެ ގޮތުގައި ސަރުކާރުން ކަނޑައަޅާފައިވާ 23 ބާވަތުގެ ކާނާ ދުނިޔޭގެ ކޮންމެ ތަނެއްގައި ހުއްޓަސް ގެނެސް ހެޔޮ އަގުގައި، މޫސުމަށް ކޮންމެ ކަހަލަ ބަދަލެއް އައި ނަމަވެސް މެދުކެނޑުމެއް ނެތި ރައްޔިތުންނަށް ލިބޭނެ އިންތިޒާމު ހަމަޖައްސަވާނެ ކަމުގައި އިގުތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ. 

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އަސާސީ ކާބޯތަކެއްޗާ ގުޅޭ ގޮތުން ނޫސްވެރިޔަކު ކުރި ސުވާލަށް ޖަވާބުދެއްވަމުން ސައީދު ވިދާޅުވީ އަސާސީ ކާބޯތަކެތީގެ ގޮތުގައި ކަނޑައަޅާފައިވާ ދިހަ ބާވަތުގެ މޭވާއާއި ދިހަ ބާވަތުގެ ތަރުކާރީގެ އިތުރަށް އާއްމުކޮށް ބޭނުންކުރާ ތިން ބާވަތުގެ ކާނާއަކީ ރާއްޖޭގެ ކޮންސިއުމާ އިންޑެކްސްއާއި ތަފާސްހިސާބާ ބެހޭ ގައުމީ އިދާރާއިން ފޯރުކޮށްދީފައިވާ މައުލޫމާތަށް ބަލައި ގޭބީސީތަކުން އެންމެ ގިނައިން ބޭނުންކުރާ ކާނާގެ ބާވަތްތަކަށް ބަލައިގެން އެކުލަވައިލެވިފައިވާ ލިސްޓެއް ކަމަށެވެ. 

އިތުރަށް ސައީދު ވިދާޅުވީ 1950 ގެ އަހަރުތަކުން ފެށިގެން މި ސަރުކާރާ ހަމައަށް ރާއްޖޭގެ ސަރުކާރުތަކުން އަސާސީ ކާނާގެ ގޮތުގައި ބަލަމުންއައީ ކާޑުގެ ބާވަތްތައް ކަމަށެވެ. ނަމަަވެސް ރައްޔިތުންގެ ބޭނުންތަކާއި ދިރިއުޅުމުގެ ހާލަތަށް އައި ބަދަލުތަކަށް ބައްލަވައި ރައީސް ނިންމެވީ އަސާސީ ކާނާގެ ގޮތުގައި ސަރުކާރުން ބަލަމުންއައި ބާވަތްތައް އިތުރުކޮށް އެ ބާވަތްތައް ރައްޔިތުންނަށް ދެމެހެއްޓެނެވި ގޮތެއްގައި ހެޔޮ އަގެއްގައި ލިބޭނެކަން ކަށަވަރުކުރެއްވުމަށް ކަމަށެވެ. 

އިތުރަށް ސައީދު ފާހަގަކުރެއްވީ މިހާރު ސަރުކާރުން ނިންމާފައިވަނީ އަސާސީ ކާނާގެ ގޮތުގައި ކަނޑައަޅާފައިވާ 23 ބާވަަތުގެ ކާނާ ދުނިޔޭގެ ކޮންމެ ތަނެއްގައި ހުއްޓަސް ރާއްޖެއަށް ގެނެސް ހެޔޮ އަގުގައި ރައްޔިތުންނަށް ފަސޭހައިން ލިބޭނެ އިންތިޒާމު ހަމަޖައްސަން ކަމަށެވެ. 

"މިހާރު ސަރުކާރުގެ ސިސްޓަމް ވޯކްކުރާ ގޮތަކީ މި 23 ބާވަތް ދުނިޔޭގެ ކޮންމެ ތަނެއްގައި ހުއްޓަސް ގެނެސްގެން އެއިރެއްގައި ލިބޭ އެންމެ ހެޔޮ އަގެއްގަައި ފަސޭހައިން ރައްޔިތުންނަށް ފޯރުކޮށްދިނުން،" ސައީދު ވިދާޅުވިއެވެ. 

ފަސޭހައިން މި މުދާ ލިބޭނެކަން ކަށަވަރުކުރުމުގެ ގޮތުން މުދާ ރައްކާކުރުމާއި އެއް ތަނުން އަނެއް ތަނަށް މުދާ ގެންދިއުމުގައި ހަރުދަނާ އިންތިޒާމުތަކެއް ހަމަޖެއްސުމަށް ގިނަ މަސައްކަތްތަކެއް ކުރަމުން އަންނަ ކަމަށެވެ. އެގޮތުން މިހާރު އެމްޕީއެލް މެދުވެރިކޮށް ބަނދަރުތަކާ ހަމައަށް މުދާ އުފުލާނެ ހާއްސަ ރޫޓުތަކެއް ކަނޑައަޅާފައިވާކަމަށް ސައީދު ވިދާޅުވިއެވެ.

އޭނާ ވިދާޅުވީ އެމްޕީއެލްއިން ބަނދަރުތަކާ ހަމައަށް މުދާ އުފުލި ނަމަަވެސް ރަށްތަކަަށް މުދާ ފޯރުކޮށްދިނުމުގެ މސައްކަތްކުރާ އަމިއްލަ ލޮޖިސްޓިކްސް ވިޔަފާރިތަކަށް އެ ދާއިރާގައި މަސައްކަތްކުރުމުގެ ޖާގަ އޮންނާނެ ކަމަށެވެ. 

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިފަހުން އެމަނިކުފާނު ގެންދަވަނީ ކާނާގެ ރައްކާތެރިކަން ކަށަވަރުކުރައްވައި، ރާއްޖެ ކާބޯތަކެއްޗަށް ނުޖެހޭނެ ގޮތަށް އިންތިޒާމުތައް ހަމަޖެއްސެވުމަށް ގިނަގުނަ މަސައްކަތްތަކެއް ކުރައްވަމުންނެވެ.