އަންނަ އޮކްޓޯބަރު މަހުގެ ތެރޭގައި ބާއްވަން ނިންމާފައިވާ " ދިވެހިންގެ އުފެއްދުންތެރިކަމުގެ މައުރަޒު" ގައި ބައިވެރިވާން ބޭނުންވާ ފަރާތްތަކަށް ނަން ނޯޓު ކުރުމުގެ ފުރުސަތު މި މަހުގެ ތެރޭގައި ހުޅުވާލާނެ ކަމަށް އިގްތިސާދީ ތަރައްގީއާ ވިޔާފާރިއާ ބެހޭ ވަޒީރު މުޙައްމަދު ސައީދު ވިދާޅުވެއްޖެ އެވެ. 

މިއަދު ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައި ވަޒީރު ވަނީ މި އަހަރު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ކަނޑައަޅުއްވާފައިވަނީ ރާއްޖޭގެ އުފެއްދުންތެރިކަމުގެ އަހަރުގެ ގޮތުގައި ކަމަށް ވިދާޅުވެފަ އެވެ. 

މިއަހަރުގެ ދިވެހިންގެ އުފެއްދުންތެރިކަމުގެ މައުރަޒު ކުރިއަށްދާނީ އަންނަ އޮކްޓޯބަރު މަހުގެ 23 އިން އެ މަހުގެ ނިޔަލަށެވެ. 

މިއަހަރުގެ ރިޔާސީ ބަޔާނުގައި، ރައީސް މުއިއްޒު ވަނީ މި އަހަރަކީ "އުފެއްދުންތެރިކަމުގެ އަހަރު" ގެ ގޮތުގައި ކަނޑައަޅުއްވައި އެކަން އިއުލާނު ކުރައްވާފަ އެވެ.

ދިވެހިންގެ އުފެއްދުންތެރިކަމުގެ މައުރަޒުގެ ހަރަކާތްތަކާ ބެހޭގޮތުން އިގްތިސާދީ ވުޒާރާއިން ނެރުނު ބަޔާނެއްގައި ބުނެފައިވަނީ މިއަހަރުގެ މައުރަޒު ކުރިއަށް ގެންދިއުމަށް ހަމަޖެހިފައިވަނީ ދިވެހި އުފެއްދުންތެރިންގެ އުފެއްދުންތައް ދައްކާލެވޭފަދަ މައުރަޒަކާއެކު، ދިވެހިންގެ މަސައްކަތްތެރިކަމަށް އައިސްފައިވާ ކުރިއެރުމުގެ އިތުރުން އުފެއްދުންތެރިކަމަށް އައިސްފައިވާ ތަރައްޤީ އާއި ކުރި އެރުން ފެންނާނެ ފަދަ ގޮތަކަށް ކަމަށެވެެެ.

އިއުލާނުގައި އިތުރަށް ބުނެފައިވަނީ، މިފަހަރުގެ މައުރަޒުވެސް އިންތިޒާމް ކުރެވިގެންދާނީ ، ގިނަ ފަރާތްތަކަކަށް ބައިވެރި ވުމުގެ ފުރުޞަތު ފަހިވެގެންދާ ގޮަތަށް ކަމަށެވެ. އަދި މައުރަޒުގައި ބައިވެރި ވުމުގެ ފުރުޞަތާއި، މައުރަޒުގެ އުޞޫލުތައް މާރޗް މަހުގައި އާންމުކޮށް އިޢުލާނު ކުރެވޭނެ ކަމަށް ވެސް ވަނީ ބުނެފަ އެވެ.

މިދިޔަ އަހަރު "ދިވެހިންގެ އުފެއްދުންތެރިކަމުގެ މައުރަޒު" ބާއްވާފައިވަނީ މެއި މަހުގެ 23 އިން 31 އަށެވެ. މި މައުރަޒަށް އާންމުންގެ ވަރަށް ބޮޑު ތަރުހީބެއް ވަނީ ލިބިގެން ގޮސްފަ އެވެ.