އޭލެވެލްގެ މޭ/ޖޫން އިމްތިހާނުގައި އަމިއްލަ ގޮތުން ބައިވެރިވާން ޑިޕާޓްމަންޓް އޮފް ޕަބްލިކް އެގްޒަމިނޭޝަންސް (ޑީޕީ) އިން ހުޅުވާލައިފި އެވެ.

އަމިއްލަ ގޮތުން އޭލެވެލް އިމްތިހާނުގައި ބައިވެރިވުމަށް މި ހުޅުވާލީ ފަސް އަހަރުގެ މެދުކެނޑުމަކަށްފަހު އެވެ.

އިއުލާނުގައި ބުނެފައިވަނީ، ބައިވެރިވާ ކޮންމެ ކެންޑިޑޭޓެއްގެ އަތުން 3000 ރުފިޔާ ބައިވެރިވުމުގެ ފީއެއްގެ ގޮތުގައި ނެގުމަށް ހަމަޖެހިފައިވާ ކަމަށެވެ. އަދި މީގެ އިތުރުން ބައިވެރިވާ ކޮންމެ މާއްދާއަކަށް ފީ ދައްކަންޖެހޭނެ ކަމަށެވެ.

ޑީޕީން ކުރި އިއުލާނުގައި އިތުރަށް ބުނެފައިވަނީ، އަންނަ މެއި/ޖޫން ގައި ބޭއްވުމަށް ހަމަޖެހިފައިވާ އެޑެކްސެލް އޭލެވެލް އިމްތިހާނުގައި (އަމިއްލަ ގޮތުން) ބައިވެރިވާ ކެންޑިޑޭޓުންނަށް އެޕްލިކޭޝަން ދޫކުރުމާއި ފައިސާ ބަލައިގަތުން 2026 ފެބުރުވަރީ 23 ވާ ހޯމަ ދުވަހުން ފެށިގެން 2026 މާރިޗު 12 ވާ ބުރާސްފަތި ދުވަހުގެ 12:00 ގެ ނިޔަލަށް އެ ޑިޕާޓްމަންޓުން ކުރިއަށް ގެންދާނެ ކަމަށެވެ. ފައިސާ ބަލައިގަތުމުގެ އިންތިޒާމް ހަމަޖެހިފައިވަނީ ބަނޑޭރި ޕޭ ޕޯޓަލް މެދުވެރިކޮށެވެ.

ޑީޕީގެ އިއުލާނާއެކު ސިލަބަހަށް ނަގާ ފީ ވެސް ހިމަނާފައިވެ އެވެ.

ޔުނިޓް: 1 2،080 ރުފިޔާ

ޔުނިޓް: 2 4،160 ރުފިޔާ

ޔުނިޓް: 1 830 ރުފިޔާ

ޔުނިޓް: 2 1،660 ރުފިޔާ

ޔުނިޓް: 3 2،490 ރުފިޔާ

ޔުނިޓް: 4 3320 ރުފިޔާ

ޔުނިޓް: 5 4150 ރުފިޔާ

ޔުނިޓް: 6 4980 ރުފިޔާ

އޭލެވެލް އިމްތިހާނު އަމިއްލަ ގޮތުން ހެދުމުގެ ފުރުސަތު ހުޅުވާލީ، ރާއްޖޭގައި އެ އިމްތިހާން ހުއްޓާލުމާއި ގުޅިގެން އިމްތިހާން ހަދަން ބޭނުންވާ ކެންޑިޑޭޓުން، ރާއްޖޭން ބޭރަށް ދަތުރުފަތުރުކުރުމަށާއި ހުރުމުގެ ޚަރަދަށް އެކަނި ވެސް، އެވްރެޖްގޮތެއްގައި 30،000 ރުފިޔާ އަށް ވުރެ ގިނަ ފައިސާ ޚަރަދުވާކަން ތަފާސްހިސާބުތަކުން މިނިސްޓްރީއަށް ފާހަގަކުރެވިގެންނެވެ. އަދި އެތަކެއް ދަރިވަރުންގެ ކަންބޮޑުވުންތަކަށް ހައްލެއް ހޯދާ ދިނުމުގެ ގޮތުންނެވެ.