ENGLISH

04 އޭޕްރީލު 2025

Advertisement

މަސްވެރިންގެ އެންމެ ބޮޑު ކަނބޮޑުވުންތަކަށް ދާއިމީ ޙައްލެއް

10 ޑިސެމްބަރު 2024

|

އާމިނަތު ޔުމްނާ

ރައީސުލްޖުމްހޫރިއްޔާ ކެޔޮޅުންނާއެކު މަޝްވަރާ ކުރައްވަނީ

ރާއްޖޭގެ އެކި ކަންކޮޅު ތަކުގައި މަސްވެރިންގެ ދުވަސް މިއަދު ފާހަގަ ކުރާއިރު، ރައީސް ޑރ. މުޙައްމަދު މުޢިއްޒުގެ ވެރިކަމުގެ ދަށުން، ސަރުކާރުން މި އަގުހުރި ދާއިރާ ދެމެހެއްޓެނިވި، ޒަމާނީ އަދި ފާގަތި މުސްތަޤްބަލަކާ ދިމާއަށް ގެންދިއުމަށް އަންނަނީ ގިނަ މަސައްކަތްތަކެއް ކޮށްދެއްވަމުންނެވެ.

މިދިޔަ އަހަރު މަސްވެރިންނަށް އެންމެ ބޮޑު ހިތްދަތި ކަމެއް ކުރިމަތިވީ، ރިޔާސީ އިންހިތާބުގެ ތެރޭގައި މަސް ގަންނަ އަގު ބޮޑުކޮށް، ކިރުވި މަހަށް ސަރުކާރުން ފައިސާ ނުދީ ލަސްކުމުގެ ސަބަބުންނެވެ. ރައީސް ޑރ. މުޙައްމަދު މުޢިއްޒު ވެރިކަމާއި ހަވާލުވެ ވަޑައިގަތްއިރު، މަސްވެރިންނަށް ނުދީ 250 މިލިއަނަށް ވުރެ ގިނަ ރުފިޔާ ހުއްޓެވެ. އޭގެ ސަބަބުން، އެތައް ޢާއިލާއެއް މާލީ ދަތިތަކާ ކުރިމަތިލާން ޖެހުނެވެ. ކުރީގެ ސަރުކާރުން ގިނަ އަދަދެއްގެ ފައިސާ ޗާޕުކުރި ނަމަވެސް، މި ދަރަނިތައް އަދާކުރެވިފައެއް ނުވެއެވެ.

ރައީސް މުޢިއްޒު ކެޔޮޅުންނާއި ބައްދަލު ކުރެއްވުން

ރައީސް ޑރ. މުޢިއްޒުގެ ސަރުކާރުން 2023 ވަނަ އަހަރުގެ ނޮވެމްބަރު މަހު ވެރިކަމާ ހަވާލުވުމާއެކު، މަސްވެރިންގެ މައްސަލަތަކަށް އަވަސް އަދި ހަރުދަނާ ފިޔަވަޅުތަކެއް އެޅުއްވިއެވެ. ޙާލަތުގެ ނާޒުކުކަން ދެނެގަނެ، ސަރުކާރުން އިސްކަންދިނީ މަސްވެރިންނަށް ނުދެވި ހުރި ހުރިހާ ފައިސާއެއް ދޫކުރުމަށެވެ. ސަރުކާރަށް ކުރިމަތިލާން ޖެހުނު މާލީ ދަތިތަކާއި އެކުވެސް މަސްވެރިންގެ ފައިސާދީ ހަލާސް ކޮށްދެއްވިއެވެ.

"އެންމެ ފަހުން މިދިޔަ 14 ދުވަހު ތެރޭގަ ދައްކަން ހުރި ގާތްގަނޑަކަށް 38 މިލިއަން ރުފިޔާ ޕެންޑިންގ ހުރި، މަސްވެރިންނަށް ދޭން، އެ 38 މިލިއަން ރުފިޔާ މިއަދު ދާދި ދެންމެއަކު ވަނީ މަސްވެރިންގެ އޮޑި ވެރިންނަށް ޖަމާކޮށްދެވިފައި، އެއީ ބީއެމްއެލްގަ އެކައުންޓު ހުރި 196 ބޭފުޅަކަށް 32.4 މިލިއަން ރުފިޔާ، އަދި އެމްއައިބީގަ އެކައުންޓް ހުރި 20 އޮޑިވެރިއަކަށް 5.6 މިލިއަން، މިލިއަން ރުފިޔާ އެއީ މިހާތަނަށް މިދިޔަ ދެފަހަފްތާ ތެރޭގަ ދޭން ހުރި ފައިސާ" - ކ. ގުރައިދޫގައި ވާހަކަ ދައްކަވަމުން ރައީސް ޑރ. މުޢިއްޒު އިއްޔެ ވިދާޅުވި އެވެ.

ކުރިމަގުގައި ފައިސާ ނުދެވި ލަސްވުން ހުއްޓުވުމަށްޓަކައި، ރައީސް މުޢިއްޒު ވަނީ ވައުދު ފުއްދަވާ، ސަރުކާރުން އައު އުސޫލެއް ތަޢާރަފުކޮށްފައެވެ. މިހާރު މަސްވެރިން މިފްކޯއަށް މަސް ކިރާތާ 48 ގަޑިއިރުގެ ތެރޭގައި ފައިސާ ލިބެއެވެ. ފުރަތަމަ ވައުދަށް ގިނަ ބަޔަކު ފާޑުކިއެވެ. މިއީ ކުރެވޭނެ ކަމެއް ނޫން ކަމަށް ބައެއް ފަރާތްތަކުން ދިޔައީ ބުނަމުންނެވެ. ނަމަވެސް މިއަހަރުގެ މަސްވެރިން ދުވާއި ކުރިމަތިލިއިރު، ރައީސް ވަނީ މި ވައުދު ފުއްދަވައި އެކަން އިއުލާން ކުރައްވާފައެވެ.

"އިރާދަކުރެއްވިއްޔާ ދެނެއް ބެކް ލޮގެއް ނާންނާނެ. އަޅުގަނޑުމެން އިއްޔެގަ. ވަރަށް ދުވަހުގެ މަސައްކަތުން. އިއްޔެގަ ވާނީ ވަރަށް މުހިންމު އެގްރީމަންޓެއް ހަދާފައި. އެއީ ފިނޭންސް މިނިސްޓްރީ އާ މިފްކޯއާ ބޭންކް އޮފް މޯލްޑިވްސް އާ، ތިންބައި މީހުންގެ އެގްރިމަންޓެއްގަ އިއްޔެ ސޮއިކުރެވިފަ އިންތިޒާމްތަކެއް ހަމަޖައްސައިފިން، އެއިންތިޒާމްތަކުގެ ނަތީޖާ އަކީ މާދަމައިން ފެށިގެން، ބީއެމްއެލްގަ އެކައުންޓެއް އޮވެއްޖެނަމަ ކޮންމެ މަސް ދޯންޔަކަށް އެދޯންޔަކުން މަސްކިރާތާ 48 ގަޑިއިރުތެރޭގަ ފައިސާ ޖަމާކުރުމުގެ ކަންތައް އެއޮތީ ހަމަޖައްސައިދީފަ " - ރައީސް ޑރ. މުޢިއްޒު

ވެރިކަމުގެ އެއް އަހަރު ދުވަހުގެ ތެރޭގައި މަސްވެރިކަމުގެ ސިނާއަތް ތަރައްޤީކޮށް ބޮޑު ބަދަލެއް ގެނެސްދިން ސަރުކާރަކަށް ހަމަ ޔަޤީނުންވެސް މިސަރުކާރު ވާނެއެވެ.

މިފްކޯ ސަތޭކަޕަސެންޓް ސަރުކާރު ހިއްސާވާ ކުންފުންޏަކަށް ބަދަލުކުރުން

ވެރިކަމާއި ހަވާލުވެ ވަޑައިގެންނެވުމަށް ފަހު މިފްކޯ ހިންގުމުގައި މަސްވެރިންގެ ދައުރު ފުޅާކޮށް މިފްކޯ އަކީ ސަތޭކަ ޕަސެންޓް ސަރުކާރު ހިއްސާވާ ކުންފުންޏަކަށް ބަދަލުކުރެއްވިއެވެ.

މަސްވެރިންގެ ދަފުތަރެއް އެކުލަވާލުމަކީ 2019 ވަނަ އަހަރު އަމަލުކުރަން ފެށި މަސްވެރިކަމާ ބެހޭ ގާނޫނުގެ ދަށުން ކުރަން ޖެހޭ ކަމެއް ކަމަށް ވިޔަސް މިހާތަނަށް އެކަން އޮތީ ނުފަށައެވެ.

"މިހާރު ގަވާއިދު ވެސް ހަދައި ނިމި މި ހަފްތާ ނިމުމުގެ ކުރިން، ބުރާސްފަތި ދުވަހު މަސްވެރިންގެ ދަފްތަރުގެ ޤަވާއިދު ގެޒެޓްކުރެވޭނެ، މިހާރު ދަފްތަރު ރެކޮގްނައިޒްކުރުމުގެ މަސައްކަތް މިނިސްޓްރީން ބޭންކްތަކާ ގުޅިގެން ކުރިއަށް އެބަދޭ " - ރައީސް ޑރ. މުޢިއްޒު

ރައީސް މުޢިއްޒު ވަނީ މަސްވެރިންގެ ޤައުމީ ދަފްތަރު އެކުލަވާލުމުގެ މަސައްކަތް ފައްޓަވާ އަންނަ ބުރާސްފަތި ދުވަހު މަސްވެރިންގެ ދަފްތަރުގެ ޤަވާއިދު ގެޒެޓް ކުރެވޭނެކަން އިއުލާން ކުރައްވާފައެވެ. މި ބަދަލާއެކު މަސްވެރިންނަށް މޯލްޑިވްސް އިސްލާމިކް ބޭންކް އަދި ބޭންކް އޮފް މޯލްޑިވްސްގެ ލޯނުތަކަށް ހުށައެޅުމުގެ ފުރުސަތު ފަހިވާނެއެވެ.

މަސްވެރިންނަށް އިތުރު ލުއި ފަސޭހަތަކެއް ހޯދައި ދިނުމުގެ ގޮތުން، ރާއްޖޭގެ ހަތަރު ރަށަކުން އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ ގޮތް މިއަދުން ފެށިގެން ހަމަޖައްސަވައިދެއްވިއެވެ. ހިންމަފުށި، ކޫއްޑޫ، ފެލިވަރު އަދި އައްޑޫ ސިޓީ ހުޅުމީދޫގެ އެފްއެސްއެމްގެ ސައިޓުތަކުން މިހާރު އެ ޚިދުމަތް ލިބޭނެއެވެ. މީގެ އިތުރުން، ކޫއްޑޫ އަދި ފެލިވަރުގައި ހުރި މިފްކޯގެ އުޅަނދުތަކުން ވެސް އެސްޓީއޯ ރޭޓުގައި ތެޔޮ ލިބޭނެ އިންތިޒާމު ހަމަޖެއްސުމުގެ މަސައްކަތް ކުރަމުންދާ ކަމަށް ރައީސް މުޢިއްޒު ވިދާޅުވިއެވެ.

ތިނަދޫ ކޯލްޑް ސްޓޯރޭޖް

ވެރިކަމުގެ އެއް އަހަރު ދުވަހުގެ ތެރޭގައި މަސްވެރިންގެ އުފެއްދުންތައް އިޝްތިހާރުކޮށް، ވިޔަފާރިން ލިބޭ މަންފާ އިތުރު ކުރުމަށްޓަކައި 100 އިންސައްތަ ސަރުކާރު ހިއްސާވާ ކުންފުންޏެއް އުފައްދަވާ މަސްވެރިކަމުގެ ސިނާއަތަށް އިތުރު ބާރެއް ދެއްވިއެވެ.

ހަމަ އެހެންމެ ހަފްތާ 14ގެ މުހިންމު ވަޢުދުތަކުގެ ތެރެއިން މަސްވެރިކަން ކުރާ ކޮންމެ އޮޑިޔަކުން މަދުވެގެން އެއް ރެސްކިއު ޑައިވަރު ތަމްރީނުކުރުމަށް ކުރެވުނު މަސައްކަތުގެ ފުރަތަމަ ބެޗުގައި މިހާތަނަސް 56 ދޯންޏަކުން 56 ފަރާތެއް ވަނީ ކާމިޔާބުކަމާއެކު ރެސްކިއު ޑައިވަރ ލެވަލްއަށް ތަމްރީނުކޮށްފައެވެ.

ސަރުކާރުގެ މެނިފެސްޓޯގައި ކޮންމެ މަސްވެރިކަމެއްވެސް ބަލައިގަންނާނެ ކަމަށް ބަޔާންކޮށްފައިވާއިރު ފަރުމަސްވެރިކަން ކުރާ ފަރާތްތަކަށް ވެސް ފައިދާ ލިބޭނެ ގޮތްތައް ވަނީ ހަމަޖައްސާދެއްވާފައެވެ. އެގޮތުން ފަރުމަސްވެރިކަން ކުރަން ލޯނު ލިބޭނެ އިންތިޒާމް ހަމަޖައްސަވާދެއްވިއެވެ.

މަސްދޯނިފަހަރުގައި ލޮނުފެނުން މަސްފިނިކުރާ ނިޒާމު ޤާއިމުކުރުމަށް އިސްލާމިކް ފައިނޭންސިންގ ފެސިލިޓީއެއް ދޫކުރަން ފެށުން

މީގެ އިތުރުން، މަސްދޯނި ފަހަރުގައި އާރް.އެސް.ޑަބްލިއު ސިސްޓަމް ހަރު ކުރުމަށް ލޯނު ދޫކުރެވެމުންދެއެވެ. މި ސިސްޓަމްތަކުގެ ސަބަބުން މަސްވެރިންނަށް ދަތުރު މަތީގައި ލޮނު ފެނުން މަސްފިނިކޮށް ބެހެއްޓޭނެއެވެ. މިއީ މަހުގެ ފެންވަރު ރަނގަޅުކޮށް، ބައިނަލްއަޤްވާމީ މާކެޓުގައި ވާދަވެރިކަން އިތުރުކުރުމަށް އެހީތެރިވެދޭނެ ކަމެކެވެ.

މެރިކަލްޗަރ ތަރައްޤީ ކުރުމަށް ބޮޑު ތިލަދުންމަތި (ހދ އަދި ށ އަތޮޅޫ  މެރިކަލްޗަރ ޒޯން ، މާޅޮސްމަޑުލު އުތުރުބުރީ (ރ) އަތޮޅު މެރިކަލްޗަރ ޒޯން، މުލަކުއަތޮޅު (މ) އަތޮޅު މެރިކަލްޗަރ ޒޯން ، އަދި ކޮޅުމަޑުލު (ތ) އަތޮޅު މެރިކަލްޗަރ ޒޯން އަށްރަށާއި ފަރުތައް ހިމަނުއްވާ ވަނީ ކަނޑައަޅުއްވާފައެވެ.

މަސްވެރިކަމުގެ ކޮލެޖު އުފައްދާ ކިޔަވާދޭން ފެށުން

މި ހުރިހާ ފިޔަވަޅު ތަކަކީ ރައީސް މުޢިއްޒުގެ ސަރުކާރުން މަސްވެރިކަމުގެ ދާއިރާއަށް ދެއްވާ ޚާއްޞަ ސަމާލު ކަމުގެ ހެއްކެކެވެ. މިހާތަނަށް އެއްވެސް ސަރުކާރަކުން މަސްވެރި ކަމަށް މިފަދަ އަހައްމިއްޔަތު ކަމެއް ދީފައެއް ނުވެއެވެ.

މަސްވެރިން ބާނާ މަސް ރައްކާ ކުރުމާއި އެ މަސް ދިވެހިރާއްޖޭގައި ޕްރޮސެސް ކުރުމުގެ ކެޕޭސިޓީ ނެތުން ވެފައިވަނީ މަސްވެރި ސިނާއަތުން އެންމެ ފުރިހަމަ ނަފާ ލިބުމަށް ދިމާވެފައިވާ ބޮޑު ގޮން ޖެހުމަކަށެވެ. ޑރ މުޢިއްޒުގެ ސަރުކާރުގައި މަސްވެރި ވުޒާރާއިން އެންމެ އިސްކަމެއް ދެއްވައިގެން ކުރާ އެއް މަސައްކަތަކީ މި ފަސް އަހަރުގެ ތެރޭގައި މަސް ރައްކާ ކުރެވޭ ކެޕޭސިޓީ 25،000 ޓަނަށް އިތުރު ކުރުމާއެކު މަސް ޕްރޮސެސް ކުރާނެ އިތުރު ކާރުޚާނާތައް އެޅުމުގެ މަސައްކަތެވެ.

މި ސަރުކާރު އޮތީ ހަމައެކަނި ކުރުމުއްދަތުގެ ލުޔަކަށް ބަރޯސާ ވެފައެއް ނޫނެވެ. ރައީސް މުޢިއްޒުގެ ތަސައްވުރަކީ ރަށު ކައުންސިލްތަކުން، މަސްގަނޑުކޮށް ރައްކާކުރާ ފެސިލިޓީތައް ހިންގުމުގައި އިސް ދައުރެއް އަދާކުރާ ކުރުމެވެ.

މިދޔަ އެއް އަހަރު ދުވަހުގެ ތެރޭގައި މިފްކޯއިން ވަނީ ހަތް ޝިޕްމަންޓެއްގެ މަސް އެކްސްޕޯޓްކޮށް، 395 މިލިއަން ރުފިޔާގެ އާމްދަނީ ހޯދާފައެވެ.

ގެއްލުމުގައި މަސް ގަތުން ފަދަ ގޮންޖެހުންތަކާ ކުރިމަތިލާން ޖެހުނު ނަމަވެސް، ސަރުކާރުން ދަނީ މިފްކޯގެ ހިންގުން ހަރުދަނާކޮށް، ފައިދާ ހޯދުމަށް ކެނޑި ނޭޅި މަސައްކަތް ކުރަމުންނެވެ. މިގޮތުން މިފްކޯ ހިންގުން ތަޖުރިބާކާރު އާ ސީއީއޯ އަކާއި ވަނީ ހަވާލުކުރައްވައިފައެވެ.

ކިޔުންތެރިންގެ ހިޔާލު