ކުއްލި ޙާލަތުގައިދިޔަ އެމްބިއުލާންސްއަށް ޖާގަ ނުދީ އޮތީ މުދާ ބާލަން އޮތް ޕިކަޕު ދުއްވި މީހާގެ މައްސަލަ ބަލަމުންދާ ކަމަށް ކަމާބެހޭ އިދާރާތަކުން ބުނެފި އެވެ.

ކުއްލި ޙާލަތުގައިދިޔަ އެމްބިއުލާންސްއަށް ޖާގަ ނުދީ ޕިކަޕެއްގައި ހުރި މުދާތައް ހުސްކުރާ މަންޒަރު ފެންނަ ވީޑިއޯއެއް އާންމުވެ ވަރަށް ގިނަ ބަޔަކު ދަނީ އެކަން ކުރި މީހާއަށް ފާޑުކިޔަމުންނެވެ. ޕިކަޕު އެ ސަރަޙައްދުން ދިޔައީ އޭގައި ހުރި ހުރިހާ މުދަލެއް ބާލާފަ އެވެ. އޭރު ފަހަތުގައި އެމްބިއުލާންސް އޮވެ ސައިރަން އަޅާތާ އެތައް އިރެއް ވެއްޖެ އެވެ.

އެމްބިއުލާންސްގެ ސައިރަންގެ އަޑު ޕިކަޕު ޑްރައިވަރަށް ނީވޭ ކަމަށް ހީކޮށް ސައިރަންގެ އަޑު ގަދަވިވެސް ކުރި އެވެ. ނަމަވެސް ޖާގަ ދޭން ދެކޮޅު ހަދާ ގަސްތުގައި އެ ޑްރައިވަރު މަޑުކޮށްގެން އޮތީ ޕިކަޕުން ހުރިހާ މުދަލެއް ބާލާ ނިމެންދެނެ އެވެ.

އަދި ޕިކަޕުން މުދާތައް ހުސްކޮށް ދުއްވާލަމުން "އެހެން {ޖާގަ} ނުދެވޭނެ އޭ.. މިއީ މުދަލޭ" ޑްރައިވަަރަކަށް އިން މީހާ ބުނާ އަޑުވެސް އާންމުވެފައިވާ ވީޑިއޯއިން އިވެ އެވެ.

އެކަމާއި ގުޅިގެން ބަލަން ޖެހޭ ކަންކަން ކަމާގުޅޭ އިދާރާތަކުން ދަނީ ބަލަމުންނެވެ. ދަތުރުފަތުރާއި ބެހޭ ވުޒާރާއިން ބުނީ އެ މައްސަލަ ސަމާލު ކަމަށް އައިސްފައިވާ ކަމަށެވެ. އަދި އެކަމާއި ގުޅިގެން ބަލަން ޖެހޭ ކަންކަން ބަލާނެ ކަމަށް ވެސް ބުންޏެވެ.

ފުލުހުން ވެސް އެ މައްސަލަ ސަމާލު ކަމަށް އައިސްފައިވާ ކަމަށް ބުނެފަ އެވެ.

ކުއްލި ޙާލަތުގައިދާ އެމްބިއުލާންސްއަށް ޖާގަ ނުދީ ވެހިކަލް ދުއްވާ މައްސަލަ މި ފަހުން ވަނީ ބޮޑުވެފަ އެވެ. މިއީ އިންސާނިއްޔަތާއި ވެސް ޚިލާފު ވަރަށް ނާތަޙުޒީބު އަމަލެކެވެ. އެފަދަ ކަންކަން ކުރާ މީހުންގެ މައްސަލަ ބަލާ ހަރުކަށި ފިޔަވަޅު އެޅުމަށް އާންމުން ގެންދަނީ ގޮވާލަމުންނެވެ.