ސަރުކާރުން ރައްޔިތުންނަށް ދެމުންދާ ހިދުމަތަކަށް އެ ސަރުކާރެއް ޖަވާބުދާރީކުރުވާނީ ކިހިނެތްތޯ ސުވާލު އުފައްދަވައި، ތަރައްގީއަށް ހުރަސްއެޅުމަކީ އެފަދައިން އިދިކޮޅު ފަރާތްތަކުން އަމަލުކުރުން ކަމަށް މާފަންނު އުތުރު ދާއިރާގެ ކައުންސިލް ގޮނޑިއަށް ޕީއެންސީގެ ފަރާތުން ވާދަކުރައްވާ ކެންޑިޑޭޓު އަހުމަދު ފައިޞަލް ވިދާޅުވެއްޖެ އެވެ.

ކޮންގްރެސް ޕާޓީން ރާއްޖޭގެ މީޑިއާތަކުގެ ޒަރީއާއިން ކުރިއަށްގެންދާ ކެމްޕެއިން ޕްރޮގުރާމް "ދިވެހީންގެ ރާއްޖެ" ޕްރޮގުރާމުގައި ބައިވެރިވެވަޑައިގެން ވާހަކަފުޅުދައްކަވަމުން ފައިޞަލް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ރައްޔިތުންނަށް ވެވަޑައިގެންނެވި ވައުދުތައް ފުއްދުމަށްޓަކައި ކައުންސިލުތަކުގެ އެއްބާރުލުން ވަރަށް މުހިންމު ކަމަށެވެ. 

އިދިކޮޅު ކެންޑިޑޭޓުންނަށް އިންތިހާބުގައި މެޖޯރިޓީ ދީފިނަމަ ސަރުކާރުން ބޭނުންވާ ތަރައްގީ ގެނައުމުގައި ދަތިތަކާ ކުރިމަތިވާނެކަމަށާއި އިދިކޮޅު ފަރާތްތަކުން އިންތިހާބަށް ނުކުންނަނީ ވެސް އެ ވިސްނުމުގައިކަމަށް ފައިޞަލް ވިދާޅުވިއެވެ.

މާލޭގެ މޭޔަރުކަމުގެ ދެވަނަ ދައުރެއް ހޯދުމަށް މިހާރު ކެމްޕެއިން ކުރައްވާ އެމްޑީޕީގެ މޭޔަރު އާދަމް އާޒިމްއާއެކު މަސައްކަތްކުރަން ފަސޭހައެއް ނުވާނެކަމަށާއި، މާލެ ތަރައްގީކުރުމުގެ ވިޝަންއެއް އާޒިމްގެ ލީޑަރޝިޕްގައި ނުގެންގުޅުއްވާކަމަށް ފައިޞަލް ވިދާޅުވި އެވެ. 

މާލެ ތަރައްގީކުރަން ބޭނުންވަނީ މާލޭގެ މޭޔަރަކަށް ރައީސް ޑރ. މުއިއްޒު ހުންނެވި އިރު އެ ކުރެއްވި މަސައްކަތް ކުރާނޭ ފަދަ ލީޑަރަކާއި ކައުންސިލަރުން ކަމަށް ފައިޞަލް ވިދާޅުވި އެވެ. އަދި މާލޭގެ ރައްޔިތުން ބޭނުންވާ ތަރައްގީ ހޯދައިދެވޭނީ ޕީއެންސީއަށް ކަމަށް ވިދާޅުވެ، ފައިޞަލް ވަނީ މާލޭ ސިޓީ ކައުންސިލުގެ ގޮނޑިތައް ސަރުކާރަށް ދިނުމަށް ގޮވާލައްވާފަ އެވެ.