މިއަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު މިދިޔަ އަހަރު ރާއްޖެ އައި ފަތުރުވެރިންގެ އަދަދަށް ވުރެ އިތުރު ވެއްޖެ ކަމަށް ޓޫރިޒަމް މިނިސްޓަރ އިބްރާހިމް ފައިޞަލް ވިދާޅުވެއްޖެއެވެ.

ފައިސަލް ކުރެއްވި އެކްސް ޕޯސްޓެއްގައި ވިދާޅުވީ މި ލަނޑުދަނޑި ހާޞިލު ހުރެވުނީ ފަތުރުވެރިކަމުގެ އިންޑަސްޓްރީގެ މަސައްކަތުންނާއި ރާއްޖެ އަންނަ ފަތުރުވެރިންގެ އެހީތެރިކަމާއެކު ކަމަށެވެ.

ފަތުރުވެރިކަމާ ބެހޭ މިނިސްޓްރީގެ ތަފާސް ހިސާބުތަކުން ދައްކާ ގޮތުގައި، އިއްޔެ ރޭ ދަންވަރާއި ހަމައަށް އައިއިރު، މިދިޔަ އަހަރު އައި ފަތުރުވެރިންގެ އަދަދާ އެއްހަމަނުވެ އޮތީ، ހާހެއްހާ މަދު އަދަދެކެވެ. މިދިޔަ އަހަރު ރާއްޖެ ޒިޔާރަތްކުރީ 1.87 މިލިއަން ފަތުރުވެރިންނެވެ. 

ޓޫރިޒަމް މިނިސްޓްރީން އަންދާޒާކުރާ ގޮތުގައި ދެ މިލިއަން ފަތުރުވެރިންގެ އަމާޒު މިމަހުގެ ފަހު ހަފުތާއަށް އެޅެންވާއިރު ހަމަވާނެ އެވެ. މިހާރު އެވަރެޖްކޮށް ދުވާލަކު 5،700 ފަތުރުވެރިން ރާއްޖެ އަންނަ ކަމަށް ރެކޯޑުތަކުން ދައްކައެވެ.