މާލޭ އުސްފަސްގަނޑު ސަރަހައްދުގައި ތަރައްގީކުރަމުންދާ ސްކޭޓިންގ އެރީނާގެ މަސައްކަތް ނިންމާ، އަންނަ މާރޗް މަހުގެ ތެރޭގައި އެތަން ރަސްމީކޮށް ހުޅުވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިކަން ހާމަކުރެއްވީ، މިއަހަރުގެ ރައްޔިތުންގެ މަޖިލީސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުންނެވެ.

މާލޭގައި ކުރިއަށްދާ މަޝްރޫއުތަކުގެ ތެރޭގައި، އިންލައިން ސްޕީޑް ސްކޭޓިންގ ނުވަތަ ރޯލަރ ސްކޭޓިންގ ރިންގަކާއި އެކު ސްކޭޓް ޕާރކް އެރީނާއެއް ހެދުމުގެ މަސައްކަތް ހިމެނޭ ކަމަށް ރައީސުލްޖުމްހޫރިއްޔާ ވިދާޅުވިއެވެ.

އެންމެ ކުރިއްސުރެ ސްކޭޓިންގ އަށް ދިވެހިރާއްޖޭގައި ތަރުހީބު އޮތް ނަމަވެސް އެ ކުޅިވަރު ކުރިއެރުވުމުގެ ގޮތުން އެކަށީގެންވާ ވަސީލަތްތައް ގާއިމުކުރެވިފައިނުވާކަން ރައީސް ފާހަގަކުރެއްވެވިއެވެ.

މާލޭ އުސްފަސްގަނޑު ސަރަހައްދުގައި ގާއިމުކުރެވޭ މި ސްކޭޓް ޕާކް އެރީނާ ވެގެންދާނީ ދިވެހިރާއްޖޭގައި ސްކޭޓް ކުރުމުގެ ކުޅިވަރު ކުރިއެރުވުމަށް ގެނެވޭނެ ބޮޑު ކުރިއެރުމެއް ކަމަށް ރައީސް ޑރ. މުޙައްމަދު މުޢިއްޒު ވިދާޅުވިއެވެ.

ސްކޭޓިން އެރީނާ ތަރައްގީކުރުމުގެ މަސައްކަތް ފެށުމުގެ ރަސްމިއްޔާތު ބާއްވާފައިވަނީ މިދިޔަ އަހަރުގެ އޮކްޓޫބަރު މަހު ގައެވެ. އެ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެވަޑައިގެންނެވިއެވެ.

ސްޕީޑް ސްކޭޓިން ޓްރެކަކާއި ސްކޭޓް ބޯޑް ޕާކެއް ހިމެނޭ ގޮތަށް ތަރައްގީކުރާ، ސްކޭޓިން އެރީނާގެ އަމަލީ މަސައްކަތް ރަސްމީކޮށް ފައްޓަވައިދެއްވީ ކުޅިވަރާއި ހަށިހެޔޮކަމާބެހޭ ވަޒީރު ޢަބްދުﷲ ރާފިޢު އަދި ރަޝީދު ކާޕެންޓްރީ އެންޑް ކޮންސްޓްރަކްޝަން (އާރު.ސީ.ސީ)ގެ ޑެޕިއުޓީ މެނޭޖިން ޑިރެކްޓަރ އާދަމް ރަހީމްއެވެ.