ސްވިމިންގ އެސޯސިއޭޝަން އޮފް މޯލްޑިވްސް އިން ހުޅުމާލޭގައި ގާއިމުކުރަމުން އަންނަ ބައިނަލްއަގުވާމީ އެކުއެޓިކް ކޮމްޕްލެކްސްގެ މަސައްކަތްތަކުގެ ތެރެއިން މިހާރު ކުރިއަށްދަނީ މައި ޕޫލް ރޭވުމުގެ މަސައްކަތްތައް ކަމަށް ކުޅިވަރާއި ހަށިހެޔޮކަމާ ބެހޭ ވުޒާރާ އިން ބުނެފިއެވެ.

ހުޅުމާލޭ ސްޕޯޓްސް ކޮމްޕްލެކްސް އިމާރާތާއި ޖެހިގެން އޮންނަ ބިމުގައި ގާއިމުކުރަމުން އަންނަ އެކުއެޓިކްސް ކޮމްޕްލެކްސްގެ މަސައްކަތްތައް ކުރިއަށްދާ ގޮތް، ކުޅިވަރު ވަޒީރު ޢަބްދުﷲ ރާފިޢު ވަނީ ބައްލަވާލައްވައިފައެވެ.

ހަތަރު ބުރި އަށް އިމާރާތްކުރުމަށް ހަމަޖެހިފައިވާ މި އެކުއެޓިކް ކޮމްޕްލެކްސް ތައްޔާރުކުރަނީ އެންމެ ޒަމާނީ ވަސީލަތްތަކާއެކު ސްވިމިންގެ ތަމްރީންތައް ކުރިއަށްގެންދެވޭނެ ގޮތަށެވެ.

މި ކޮމްޕްލެކްސް ނިމިގެންދާއިރު، އޮލިމްޕިކް ސައިޒުގެ (50 މީޓަރު ދިގުމިނުގެ، ފުޅާ މިނުގައި 25 މީޓަރުގެ) ޕޫލެއްގެ އިތުރުން ވޯލްޑް އެކުޓިކްސް ސަޓިފައިޑް ޑައިވިންގ ޕޫލަކާއި، 1200 މީހުންނަށް ކުޅިބަލަން ތިބެވޭނެ އިންތިޒާމްތައް ވެސް ހަމަޖެހިފައި ހުންނާނެ އެވެ.