ރައީސުލްޖުމްހޫރިއްޔާގެ ވާދައިގެ ތައްޓަށްކުޅޭ "ޕްރެޒިޑެންޓްސް ކަޕް" ފުޓްބޯޅަ މުބާރާތް ހަ ޓީމާއެކު ކުރިއަށްގެންދިއުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.

އެފްއޭއެމުން ބުނީ، މި އަހަރުގެ މުބާރާތުގެ އޮޓޮމެޓިކް ޖާގަތައް ހަތަރު ޓީމަކަށް ލިބޭނެ ކަމަށެވެ. އެ ޖާގަތައް ލިބޭނީ، މިހާރު ކުރިއަށްދާ ދިވެހި ޕްރިމިއާ ލީގުގެ ތާވަލްގެ އެންމެ ކުރިހޯދާ ހަތަރު ޓީމަށެވެ.

އެގޮތުން، ލީގުގެ އެންމެ ކުރިހޯދާ ހަތަރު ޓީމު ދެ ގްރޫޕަކަށް ބަހާލުމަށްފަހު ތާވަލްގައި ޓީމުތަކަށް ޕޮއިންޓް ލިބިފައިވާ ގޮތަށް، ތަރުތީބުން ސީޑުކުރުމަށް ހަމަޖެހިފައިވާ ކަމަށް އެފްއޭއެމުން ވަނީ ބުނެފައެވެ.

މިއާއެކު، ލީގުގެ އެންމެ ކުރީގައި އުޅޭ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަންގެ އިތުރުން ދެވަނައިގައި އުޅޭ އޮޑި ސްޕޯޓްސް ކްލަބާއި، ނިއު ރޭޑިއަންޑް ސްޕޯޓްސް ކްލަބާއި ބުރު ސްޕޯޓްސް ކްލަބަށް ވަނީ އެ މުބާރާތުން ފުރުޞަތު ލިބިފައެވެ.

"ޕްރެޒިޑެންޓްސް ކަޕް" ގެ އަނެއް ދެ ޖާގަ ލިބޭނީ ދިވެހި ޕްރިމިއާ ލީގުގެ ފަސްވަނައިން ފެށިގެން އަށްވަނައާ ދެމެދު ހިމެނޭ ޓީމުތަކުގެ މެދުގައި ކުޅެވޭ ނޮކްއައުޓް މެޗުތަކަށްފަހު މޮޅުވާ ދެ ޓީމަށެވެ.

މުބާރާތް ރޭވިފައިވާގޮތުން، ދެ ގްރޫޕުން ވެސް އެންމެ ކުރިހޯދާ ދެ ޓީމު ސެމީ ފައިނަލަށް ދަތުރުކުރުމަށްފަހު، ކޮންމެ ގްރޫޕެއްގެ އެއްވަނައާ ދެވަނަ ޓީމުގެ މެދުގައި ކުޅެވޭ ސެމީގެ މި މެޗުތަކުން މޮޅުވާ ދެ ޓީމު ފައިނަލަށް ދަތުރުކުރާނެ އެވެ.

އެންމެ ފަހުން "ޕްރެޒިޑެންޓްސް ކަޕް" ބޭއްވީ 2023 ވަނަ އަހަރު އެވެ. އެ ފަހަރުގެ މުބާރާތުގެ ޗެމްޕިއަންކަން މާޒިޔާ އިން ހޯދީ ފައިނަލުގައި ކްލަބް އީގަލްސް ބަލިކޮށްގެންނެވެ.