ދިވެހިންގެ މިނިވަންކަމާއި ތޮޅެ، ޕޯޗުގީޒުންނާއި ހޮޅީން ދިވެހި ގައުމަށް ދިން އަނިޔާ އިދިކޮޅު އެމްޑީޕީން ވެސް ގައުމަށް ދެމުން އަންނަކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރު މުޙައްމަދު މުޞްޠަފާ އިބްރާހީމް ވިދާޅުވެއްޖެއެވެ.

"އެމްއެމްޓީވީ"ގެ ބޮޑު ޚަބަރު ޕްރޮގްރާމުގައި ވާހަކަފުޅު ދައްކަވަމުން މެމްބަރު ވިދާޅުވީ އެމްޑީޕީގެ ވިސްނުމާއި ފިކުރަކީ އަބަދުވެސް އޭރަކު އޮންނަ ސަރުކާރަކާއި ރައްޔިތުންނަށް ދުއްތުރާކުރުން ކަމަށެވެ.

އެމްޑީޕީގެ ދެ ވެރިކަމެއް ދިވެހި ރައްޔިތުން ދެކެފައިވާއިރު އެ ދެ ފަހަރުވެސް ފެނިގެންދިޔައީ ގައުމު އިނދަޖައްސާލައި، ރައްޔިތުން ބިކަ ކޮށްލައި،ތަރައްގީ ހުއްޓުވާލި ތަންކަމަށް މެމްބަރު ވިދާޅުވިއެވެ.

މެމްބަރު ވަނީ ކުރިއަށް އޮތް އިންތިހާބުގައި ގައުމު ހިންގުމަށް އެމްޑީޕީއަށް އެއްވެސް ފުރުސަތެއް ނުދިނުމަށް ގޮވާލައްވާފައެވެ. އަދި މާޒީގައި ގައުމަށް ދިން އަނިޔާތަކަަށް ބަލާއިރު ޕޯޗުގީޒުންނާއި ހޮޅީން ގައުމަށް ކުރި ފަދަ އަނިޔާ ކުރި ބައެއްގެ ގޮތުގައި އެމްޑީޕީ ސިފަކުރެވޭކަމަށް މެމްބަރު ވިދާޅުވިއެވެ. 

ދައްކަމުން މިދަނީ 50 އަހަރު ރާއްޖޭގައި ތަރައްގީ ހިންގޭނެ ފައިސާގެ ވާހަކަ ކަމަން ހާމަކުރައްވައި އެ ފައިސާއަށް ވީގޮތް އެމްޑީޕީއަށް ބުނެދެވިފައި ނުވާކަމަށް މެމްބަރު ވިދާޅުވިއެވެ. ފަސް އަހަރުގެ ދައުރެއް ނިންމާލި އިރު ގައުމު ދަރަނިވެރިކޮށްލާފައި ދިއުމުން ޕޯޗުގީޒުންނާއި އެމްޑީޕީއާ ދެމެދު މާ ބޮޑު ފަރަގެއް ހުރިކަމަށް ގަބޫލު ނުކުރައްވާކަމަށް މެމްބަރު ވިދާޅުވިއެވެ. 

ކުރިއަށް އޮތް އިންތިހާބުގައި އެމްޑީޕީއަށް ވޯޓު ދީފިނަމަ ލިބޭނެ މޮޅެއް، ފައިދާއެއް ނޯންނާނެކަމަށް ވިދާޅުވެ މެމްބަރު ވަނީ އެމްޑީޕީއަށް އަލުން ޖާގަ ނުދެއްވުމަށް ރައްޔިތުންނަށް ތަކުރާރުކޮށް އިލްމާސްކުރައްވާފައެވެ.