ކުރިއަށް އޮތް ލޯކަލް ކައުންސިލު އިންތިހާބުގައި މާލޭ ސިޓީގެ މޭޔަރުކަމަށް ވެރިކަންކުރާ ޕީޕަލްސް ނޭޝަނަލް ކޮންގްރެސް ޕާޓީގެ ފަރާތުން ވާދަކުރައްވާ ކެންޑިޑޭޓު މޫސާ އަލީ ޖަލީލާއި އޭނާއާއެކު މާލޭގެ އެކި ދާއިރާތަކަށް ވާދަކުރައްވާ ކެންޑިޑޭޓުން އިންތިހާބުވުމުން ސިޓީ ކައުންސިލުގެ ހިދުމަތްތައް އެތައް ގުނައެއް ހަލުއިވެގެންދާނެ ކަމުގައި ރައްޔިތުންގެ މަޖިލީހުގެ މައްޗަންގޮޅީ އުތުރު ދާއިރާގެ މެންބަރު އިބްރާހީމް މުޙައްމަދު ވިދާޅުވެއްޖެއެވެ. 

އެމްއެމްޓީވީގެ "ދިވެހީންގެ ރާއްޖެ" ޕްރޮގުރާމުގައި ބައިވެރިވެވަޑައިގެން ދެއްކެވި ވާހަކަފުޅުގައި އޭނާގެ ދާއިރާގެ ކައުންސިލު ގޮނޑިއަށް ވާދަކުރައްވާ ކެންޑިޑޭޓު އާދަމް އަދީމު ތައާރަފުކޮށްދެއްވަމުން މެންބަރު ވިދާޅުވީ އަދީމަކީ މޫސާ އަލީ ޖަލީލު ފަދައިން ޔުނިފޯމް ބޮޑީއެއްގައި 25 ވަރަކަށް ހިދުމަތްކުރައްވައި ވަރަށް ގިނަ ތަޖުރިބާތައް ހާސިލުކުރައްވާފައިވާ، ސުލޫކީ ހަމަތަކުގައި ހިފަހައްޓަވާ، ފަންނީ ގާބިލުކަންވެސް ލިބިވަޑައިގެން ހުންނެވި ބޭފުޅެއް ކަމަށެވެ. 

މެންބަރު ވިދާޅުވީ ރައްޔިތުންނަށް މުހިއްމު ހިދުމަތްތަކެއް ފޯރުކޮށްދިނުމަށް ކެންޑިޑޭޓުން އިހުތިޔާރުކުރާއިރު، އެ ކެންޑިޑޭޓެއްގެ ފަސްމަންޒަރަށް ބަލަންޖެހޭ ކަމަށެވެ. އެގޮތުން އެ ކެންޑިޑޭޓެއްގެ އިލްމީ ގާބިލުކަމާއި ތަޖުރިބާއާއި ހިދުމަތުގެ ޓްރެކް ރެކޯޑާއި، އެމީހެއްގެ އަހުލާގަކީ ބަލަންޖެހޭ ކަންކަން ކަމުގައެވެ. މެންބަރު ފާހަގަަކުރެއްވި ގޮތުގައި މި ހުރިހާ މިންގަނޑަކުން މިނެކިރުމުން މާލޭ ސިޓީ ކައުންސިލުގެ މައްޗަންގޮޅީ އުތުރު ދާއިރާގެ ގޮނޑިއަށް ވާދަކުރައްވާ ކެންޑިޑޭޓުންގެ ތެރެއިން އެންމެ ގާބިލު އަދި އެންމެ އެކަށީގެންވާ ބޭފުޅަކީ ކޮންގުރެސް ޕާޓީގެ ކެންޑިޑޭޓު އާދަމް އަދީމެވެ. 

"އަޅުގަނޑު ހަމަ ޗެލެންޖުކޮށްފައި ދަންނަވާނަން، އަޅުގަނޑުމެންގެ ދާއިރާއިން ޖުމްލަ ގޮތެއްގައި މިނިކުންނަ ހުރިހާ ކެންޑިޑޭޓުންގެ ތެރެއިން ރައްޔިތުން އިހުތިޔާރުކުރައްވައިފިނަމަ އެންމެ ރަނގަޅު ކެންޑިޑޭޓު ކަމުގައި ދަންނަވަން،" މެންބަރު ވިދާޅުވިއެވެ. 

މެންބަރު އިބްރާހީމް ވިދާާޅުވީ ކައުންސިލުގެ އެފެޝިއެންސީ އޮޑިޓެއް ހަދައިފިނަމަ، ކައުންސިލުގެ މަސައްކަތްތައް ކުރިއަށްދަނީ މިޒަމާނާ އެކަށޭނެ ގޮތެއްގައި ނޫންކަން ސާފުކޮށް އެނގޭނެ ކަމަށެވެ. ކައުންސިލުގެ އެފިޝިއަންސީ އިތުރުކުރުމަށް އެންމެ މުހިއްމީ ޑިސިޕްލިންކަން ފާހަގަކުރައްވަމުން މެންބަރު ވިދާޅުވީ މޫސާ އަލީ ޖަލީލުގެ މޭޔަރުކަމެއްގަައި ކައުންސިލަށް ގެންނަވާނެ އެންމެ ބޮޑު ބަދަލަކީ ޑިސިޕްލިން ނުވަތަަ ވަކި ސުލޫކީ ހަމަތަކެއްގެ ތެރެއިން އިންތިޒާމީ ގޮތެއްގައި މަސައްކަތްކުރެެއްވުން ކަމަށެވެ. 

ސަރުކާރާ ގުޅިގެން ރައްޔިތުންނަށް ހަލުއިކަމާއެކު ހިދުމަތްތައް ފޯރުކޮށްދިނުމަށް ހަދަންޖެހޭ ހިސާބުތައް ހެދުމާއެކު، ފަރުމާކޮށް އެކުލަވައިލަންޖެހޭ އިންތިޒާމުތައް އެކުލަވައިލުމަކީ އިދާރީ ހިންގުމުގެ ތަޖުރިބާ ހުރެގެން، އެކަމުގެ ޑިސިޕްލިންވެސް ހުރެގެން ނޫނީ ކުރެވޭނެ ކަމެއް ނޫން ކަމަށް މެންބަރު ވިދާޅުވިއެވެ. އެގޮތުން ކޮންގުރެސްގެ މޭޔަރަލް ކެނޑިޑޭޓު މޫސާ އަލީ ޖަލީލަކީ އަދި މައްޗަންގޮޅީ އުތުރު ދާއިރާއަށް ވާދަކުރައްވާ ކެންޑިޑޭޓު އާދަމް އަދީމަކީ އެ ޑިސިޕްލިން ހުރި ބޭފުޅުން ކަމުގައި މެންބަރު ފާހަގަކުރެއްވިއެވެ. 

"އަޅުގަނޑު ދަންނަވާނީ އާދަމް އަދީމް ފަދަ ކައުންސިލަރުން މޫސާ އަލީ ޖަލީލު ފަދަަ މޭޔަރުން ވަންނަވައިފިއްޔާ، ވަރަށް ބޮޑު ޓްރާންސްފޮމޭޝަންއެއް އަންނާނޭ. ގާނޫނީ ގޮތުން ކައުންސިލަށް މަތިކޮށްފައިވާ މައި ސަރުކާރުން ދޭން ބޭނުންވާ ހިދުމަތްތައް ރައްޔިތުންނަށް ރިފްލެކްޓުކުރުމުގައި އާދަޔާ ހިލާފް ސްޕީޑެއް އަންނާނޭ،" މެންބަރު ވިދާޅުވިއެވެ. 

މެންބަަރު ވިދާޅުވެފައިވަނީ ކުރިއަށް އޮތް ކައުންސިލު އިންތިހާބުގައި މާލޭ ސިޓީގެ ކައުންސިލުގެ މޭޔަރުކަމަށް ވާދަކުރައްވާ މޫސާ އަލީ ޖަލީލާއި އާދަމް އަދީމު ފަދަ ބޭފުޅުން ކައުންސިލަށް އިންތިހާބުވެވަޑައިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެދިވަޑައިގަންނަވާ ދުވެލީގައި ކައުންސިލުގެ މަސައްކަތްތައް ތަރުތީބުކުރެއްވުމުން ހަލުއިކޮށް ހިދުމަތްތައް ރައްޔިތުންނަށް ވާސިލުކޮށްދެއްވޭނެ ކަމަށެވެ.