ނ. ވެލިދޫގައި ސީ އެމްބިއުލާންސްގެ ޚިދުމަތް މިއަދު ފަށައިފިއެވެ. 

ވެލިދޫގައި ސީ އެމްބިއުލާންސްގެ ޚިދުމަތް ރަސްމީކޮށް ފެށީ މިއަދު ހަވީރު އެރަށުގައި ބޭއްވި ޚާއްޞަ ރަސްމިއްޔާތެއްގައެވެ. 

ރަސްމިއްޔާތު ޝަރަފްވެރިކޮށްދެއްވީ ދިފާޢީ ވުޒާރާގެ ނައިބު ފާޠިމަތު މިޒުނާ ޢަލީ އެވެ. ދިފާޢީ ވުޒާރާގެ އިސްވެރިންގެ އިތުރުން، އެކި ވުޒާރާތަކުގެ އިސްވެރިން އަދި ވެލިދޫ ޞިއްޙީ މަރުކަޒުގެ އިސްވެރިންނާއި އެރަށު މުއައްސަސާތަކުގެ އިސް ބޭފުޅުން ރަސްމިއްޔާތުގައި ބައިވެރިވިއެވެ. 

ވެލިދޫގައި ސީ އެމްބިއުލާންސްގެ ޚިދުމަތް ފައްޓަވައިދެއްވާނެކަމަށް މިދިޔަ އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ. މިއަދުގެ ރަސްމިއްޔާތުގައި ވާހަކަދައްކަވަމުން ޑެޕިއުޓީ މިނިސްޓަރ މިޒުނާ ވިދާޅުވީ، ރައީސްގެ ވަޢުދުފުޅާ އެއްގޮތަށް ޚިދުމަތް ފެށުމަށްޓަކައި، އެމަނިކުފާނުގެ ފަރާތްޕުޅުން ފުރިހަމަ އެއްބާރުލުން ލިބިވަޑައިގެންނެވި ކަމަށެވެ. 

ނ. އަތޮޅުގައި ފަތުރުވެރިކަން ފުޅާވެފައިވާތީއާއި ވެލިދޫގައި ފަތުރުވެރިކަން ކުރިއަރާފައިވުމަކީ ވެސް އެރަށަށް ސީ އެމްބިއުލާންސްގެ މުހިއްމުކަން ބޮޑުވި ސަބަބެއް ކަމުގައި މިޒުނާ ވިދާޅުވިއެވެ. 

މިޒުނާ ވިދާޅުވީ ވެލިދޫގައި ފެށި ސީ އެމްބިއުލާންސްގެ ޚިދުމަތާ އެކު އަތޮޅުގެ ރަށްތަކަށް ވެސް ބޮޑެތި ލުއިތަކެއް ލިބިގެން ގޮސް، އަވަސް ފަރުވާގެ ނިޒާމެއް ކަށަވަރުވުމުން އިންވެސްޓަރުންގެ މެދުގައި ލިބޭ އިތުބާރު ބޮޑުވެގެންދާނެ ކަމަށެވެ. 

މީގެ ކުރިން ނ. އަތޮޅުގައި ސީ އެމްބިއުލާންސް އޮޕަރޭޓްކުރަނީ ހަމައެކަނި މަނަދޫގައެވެ. އެންމެ ސީ އެމްބިއުލާންސެއް އޮތުމުން އަތޮޅުގެ ރަށްތަކަށް ބޭނުންވާ ފެންވަރުގައި ޚިދުމަތެއް ނުދެވެއެވެ. ވެލިދޫގައި މި ޚިދުމަތް ފެށުމާއެކު ކައިރި ރަށްތަކަށް ލިބޭ ޚިދުމަތް ފަސޭހަވެގެންދާނެއެވެ. 

ސަރުކާރުން އަންނަނީ މިއަހަރުތެރޭ އިތުރު 9 ރަށެއްގައި މުޅިން އަލަށް ފެށުމުގެ މަސައްކަތް ކުރަމުންނެވެ. އަދި، ޚިދުމަތް މެދުކެނޑިފައިވާ ރަށްތަކުގައި އެ ޚިދުމަތް ފެށުމަށް ވެސް އަންނަނީ މަސައްކަތްކުރަމުންނެވެ.