މ. މުލަކުގައި ތަރައްގީކުރަމުންދާ ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތްތަކުގެ ތެރެއިން ބިން އެއްވަރުކުރުމުގެ މަސައްކަތްކުރުމަށް ތައްޔާރުވަމުންދާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ބުނެފިއެވެ.

ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން، މުލަކުގައި ތަރައްގީކުރާ ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތްތަކުގެ އަދާހަމަ ހިއްސާކުރަމުން އާރްޑީސީން ބުނީ، މިހާރު ކުރިއަށްދަނީ ބިން އެއްވަރުކުރުމާއި، މެއިން ހޯލްގައި ފްލޯ ސްލެބްގެ މަސައްކަތްތައް ފެށުމުގެ ގޮތުން ކުރަންޖެހޭ މަސައްކަތްތައް ކަމަށެވެ.

މުލަކުގެ ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތަކީ، މަޑުޖެހިފައި ނުހިނގާ އޮތް މަސައްކަތަކަށްވުމުން މިދިޔަ އަހަރުގެ ތެރޭގައި އެ މަޝްރޫޢުގެ މަސައްކަތްތައް ކުރުމަށް އާރްޑީސީއާ ވަނީ ހަވާލުކޮށްފައެވެ. މި މަސައްކަތް ނިންމުމަށް ހަމަޖެހިފައިވަނީ މި އަހަރުގެ ތެރޭގައެވެ.

މިއީ ރަށްރަށުގެ ރައްޔިތުންގެ މެދުގައި ސިއްހީ ދުޅަހެޔޮކަމާއި އިޖުތިމާއީ ދުޅަހެޔޮކަން ދެމެހެއްޓުމަށް ގާއިމުކުރެވޭ ކުޅިވަރުގެ މުހިއްމު ވަސީލަތްތަކެކެވެ.

ރާއްޖޭގެ މީހުން ދިރިއުޅޭ ހުރިހާ ރަށެއްގައި ފިޓްނަސް އެންޑް ރެކްރިއޭޝަން ސެންޓަރުތައް ގާއިމުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެކެވެ.