ޓެކްސީ ގަވާއިދަށް އިސްލާހުތަކެއް ގެނެސް ޓެކްސީ ސެންޓަރު ރަޖިސްޓްރީ ކުރުމުގައި ލުއިތަކެއް ދޭން ސަރުކާރުން ނިންމައިފިއެވެ. 

މިކަން ހާމަކުރީ ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން މިއަދު ނެރުނު ބަޔާނެއްގައެވެ. 

އެ ވުޒާރާއިން އާއްމުކުރި ބަޔާނުގައި ބުނީ، ބަދަލު ގެނައީ އެއްގަމު ދަތުރުފަތުރުގެ ނިޒާމު ހަރުދަނާކޮށް ޑްރައިވަރުންނަށް ލުއިފަސޭހަ ގޮތްތަކެއް ހޯދައިދިނުމަށް ކަމަށެވެ. 

އިސްލާހަށް ގެނެސްފައިވާ މުހިއްމު އެއް ބަދަލަކީ، ޓެކްސީ ސެންޓަރެއް ރަޖިސްޓްރީ ކުރުމަށްޓަކައި ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދު 100 އިން 50 އަށް ބަދަލުކުރުމެވެ. މިއީ، އާ ސެންޓަރުތައް އުފައްދައި މާކެޓުގައި ވާދަވެރިކަން އުފެއްދުމާއި އާއްމުންނަށް ލިބޭ ޚިދުމަތުގެ ފެންވަރު ރަނގަޅުކުރުމަށްޓަކައި ގެނެސްފައިވާ މުހިއްމު އިސްލާހެކެވެ. 

ބަދަލުގެ ސަބަބުން، ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރުގައި ވެސް ރަޖިސްޓްރީވެގެން މަސައްކަތްކުރެވޭނެއެވެ. 

ޕޯޓަލް ނުވަތަ އޮންލައިން މޯބައިލް އެޕްލިކޭޝަންތައް ބޭނުންކޮށްގެން ހިދުމަތްދޭނަމަ ވުޒާރާގެ ހާއްސަ ހުއްދައެއް ހޯދަން ޖެހޭނަކަމަށް ވެސް އުސޫލުގައި ހިމަނާފައިވެއެވެ. އެއީ ދަތުރުވެރިންގެ ރައްކާތެރިކަން ކަށަވަރުކުރުމުގެ ގޮތުން ގެނެސްފައިވާ ބަދަލެކެވެ. 

އެ ވުޒާރާއިން ބުނީ، ބަދަލުތައް ގެނައުމުގެ ބޭނުމަކީ ޚިދުމަތް ހޯދާ ފަރާތްތަކަށް ފައިދާވާނެހެން އިތުބާރުހުރި ޒަމާނީ ޓެކްސީ ނިޒާމެއް ރާއްޖޭގައި ގާއިމުކުރުމެވެ. 

ޓެކްސީ ޑްރައިވަރުންގެ ޝަކުވާތަކަށް ހައްލު ހޯއްދަވައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މީގެކުރިން ވަނީ ވިދާޅުވެފައެވެ. 

ޓެކްސީ ގަވާއިދަށް މުހިއްމު އިސްލާހުތަކެއް ގެނެސްފައިވާއިރު، ސަރުކާރުން އަންނަނީ ޓެކްސީ ލައިންގެ ޚިދުމަތް ފަށަން ތައްޔާރުވަމުންނެވެ. އެގޮތުން، ޓެކްސީ ލައިންގައި މަސައްކަތްކުރަން ބޭނުންވާ މުވައްޒަފުންގެ އިންޓަވިއުތައް މިހާރު ވަނީ ކުރިއަށްގެންގޮސްފައެވެ. 

އެއްގަމު ދަތުރުފަތުރުކުރުމުގައި ހުރި ގޮންޖެހުންތައް ނައްތާލުމަކީ ސަރުކާރުގެ ޓެކްސީ ލައިންގެ މުހިއްމު ލަނޑުދަނޑިއެކެވެ. އެގޮތުން، ސަރުކާރުން ފަށާ ޓެކްސީ ލައިންގައި އެންމެ ފުރަތަމަ ބޭނުންކުރާނީ 100 ކާރު ކަމަށް ވުޒާރާއިން ވަނީ ބުނެފައެވެ. 

މާލޭގައި އޮތް ތޮއްޖެހުން ކުޑަކުރުމަށް ސަރުކާރުން އަންނަނީ ކަމާ ގުޅުންހުރި އިދާރާތަކާއެކު މަޝްވަރާތައް ކުރަމުންނެވެ. އަދި، ތޮންޖެހުން ކުޑަކޮސް ޓްރެފިކަށް ލުއި ހޯދުމަށް މިހާރުވެސް މުހިއްމު ކަންތައްތަކެއް ސަރުކާރުން ވަނީ ތަންފީޒުކޮށްފައެވެ.