ކުރިއަށް އޮތް ލޯކަލް ކައުންސިލު އިންތިހާބުގައި ވާދަކުރުމަށް ކެންޑިޑެސީ ހުށަހެޅުމަށް ކޮންމެ ދުވަހަކު މިހާރު ދީފައިވާ ވަގުތަށް ދެ ގަޑިއިރު އިތުރުކުރުމަށް އިލެކްޝަންސް ކޮމިޝަން (އީސީ)އިން ނިންމައިފިއެވެ. 

އިލެކްޝަންސް ކޮމިޝަނުން ކައުންސިލު އިންތިހާބަށް ކުރިމަތިލުމަށް ހުޅުވައިލީ ހިނގަމުންދާ ޖަނަވަރީ މަހުގެ 17 ވަނަ ދުވަހުއެވެ. އަދި ކެންޑިޑެސީ ހުށަހެޅުމުގެ އެންމެ ފަހުގެ މުހުލަތެއް ކަމުގައި ކަނޑައަޅާފައިވަނީ އަންނަ ފެބްރުއަރީ މަހުގެ އެއްވަނަ ދުވަހެވެ. 

އަދި ކެންޑިޑެސީ ފޯމު ހުށަހަޅާ ވަގުތެއްގެ ގޮތުގައި ކަނޑައަޅާފައވަނީ ހުކުރު ދުވަސް ފިޔަވައި އެހެން ދުވަސްތަކުގެ ހެނދުނު 8:30 އިން މެންދުރުފަހު 3:30 އަށެވެ. އަދި ހުކުރު ދުވަހުގެ މެންދުރުފަހު 3:30 އިން 5:30 އަށެވެ. 

މިއަދު އިލެކްޝަންސް ކޮމިޝަނުން ބުނެފައިވަނީ ފޯމު ހުށަަހަޅަންދޭ ވަގުތު އިތުރުކުރަން ނިންމައި، ކޮންމެ ދުވަހަކުވެސް މިހާރު ދީފައި އޮތް ވަގުތަށް ދެ ގަޑިއިރު އިތުރުކޮށްފައިވާ ކަމަށެވެ. އެގޮތުން ހުކުރު ދުވަސް ނޫން ކޮންމެ ދުވަހެއްގއި ހެނދުނު 8:30 އިން ފެށިގެން މެންދުރުފަހު 5:30 އަށް ކެންޑިޑެސީ ހުށަހެޅޭނެއެވެ. އަދި ހުކުރުދުވަހު މެންދުރަފު 3:30 އިން ރޭގަނޑު 8:00 އަށް ފޯމު ހުށަހެޅޭނެއެވެ. 

މި ބަދަލު ގެނެސްފައިވާއިރު އިލެކްޝަންސް ކޮމިޝަނުން މިހާތަނަށް 1،040 މީހެއްގެ ކެންޑިޑެސީ ބަލައިގަނެފައިވެއެވެ. މީގެ ތެރޭގައި ހިމެނެނީ ސިޔާސީ ޕާޓީތަކުން ހުށަހެޅި 852 ފޯމާއި، އަމިއްލަގޮތުން ހުށަހަޅާފައިވާ 188 ފޯމެވެ.

އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރުމަށް ހުށަހެޅި 817 ކެންޑިޑޭޓުންގެ ފޯމު ބަލައިގަނެފައިވާއިރު މީގެ ތެރޭގައި ހިމެނެނީ ސިޔާސީ ޕާޓީތަކުގެ 692 ފޯމާއި، އަމިއްލަގޮތުން ހުށަހެޅި 125 ފޯމެވެ.