އަހަރުގެ ކޮންމެ ދުވަސްވަރެއްގައިވެސް އުމްރާއަށް ދިއުމަށް މަގުފަހިކޮށްދިނުމަށް "ކުރު އުމްރާ" ޕެކޭޖެއް ހައްޖު ކޯޕަރޭޝަނުން ތައާރަފުކޮށްފިއެވެ. 

އެ ކުންފުނިން ބުނި ގޮތުގައި މި ޕެކޭޖަކީ އަހަރުގެ ތެރޭގައި ލިބޭ ކުރު ޗުއްޓީއެއްގައި ނުވަތަ އެނޫންވެސް ދުވަސްވަރެއްގައި އެކަނި ނުވަތަ އާއިލާއާއި ރަހުމަތްތެރިންނާއެކު އުމްރާވުމަށް ބޭނުންވާ މީހުންނށް ފަސޭހަކަމާއެކު އުމްރާވުމުގެ ހިދުމަތް ދިނުމަށް އެ ކުންފުނިން ތައާރަފުކުރި ޕެކޭޖެކެވެ. 

މި ޕެކޭޖުގެ ދަށުން އުމްރާއަށް ދާނެ ދުވަހެއް އަމިއްލަައަށް އިހުތިޔާރުކުރެވޭނެއެވެ. ކޮންމެހެން އުމްރާ މޫސުމަކާ ދިމާކޮށް އުމްރާވުން ލަޒިމެއް ނުވާނެއެވެ. އަދި މި ޕެކޭޖުގެ ދަށުން ފުރާނެ ދުވަހާއި އެނބުރި އަންނާނެ ދުވަސް އަދި ދަތުރުކުރާނެ ފުލައިޓާއި، ސައުދީގައި ހުންނަ ހޮޓަލާއި އެ ގައުމުގައި ދަތުރުކުރާ އުޅަނދާއި ޒިޔާރަތްކުރާނެ ތަންތަން އަމިއްލައަށް ނިންމޭނެއެވެ. 

އަދި ވިޔަފާރި ދަތުރަކާ ގުޅުވައިގެން އުމްރާއެއް ކުރަން ބޭނުންވާ ފަރާތްތަކަށް ހާއްސަކޮށް، އުމްރާގެ އަޅުކަމަށްފަހު ދުބާއީ ފަދަ ގައުމަކަށް ވިޔަފާރިކޮށްލަން ދިއުމަށް ވިސާވެސް މި ޕެކޭޖުގެ ތެރެއިން ހޯދައިދޭނެއެވެ. 

އުމްރާއަށް ދާން ބޭނުންވާ ފުލައިޓާއި، ފުލައިޓުގެ ކްލާސްގެ އިތުރަށް، އެމީހެއްގެ ފުދުންތެރިކަމާއި ބަޖެޓުގެ ތެރޭގައި ސައުދީގައި ދަތުރުކުރާނެ އިންތިޒާމު ހަމަޖައްސައިދީ ދަތުރުކުރަން ބޭނުންވާ އުޅަނދެއްގައި ދަތުރުކުރެވޭނެ ގޮތް ހަމަޖައްސާނެއެވެ. 

އަދި އެކަނި ޢުމްރާ ކުރަން ބޭނުންވާ ފަރާތްތަކަށާ، ޢާއިލާގެ މެންބަރުން އެކުގައި ޢުމްރާކުރަން ބޭނުންވާ ފަރާތްތަކަށާ، ވަކި ގުރޫޕެއްގެ ގޮތުގައި ޢުމްރާ ކުރަން ބޭނުންވާ ފަރާތްތަކުން ބޭނުންވާ ގޮތްގޮތަށް ދަތުރުގެ އިންތިޒާމުތައް ހަމަޖައްސައިދިނުމާއެކު، އެންމެ ބަލައިލަން ބޭނުންވާ ނުވަތަ ޒިޔާރަތްކުރަން ބޭނުންވާ ހާއްސަ ތަނެއް އޮތްނަމަަ އެތަނަކަށް އެމީހަކަށް ފަސޭހަ ގަޑިތަކެއްގައި ޒިޔާރަތްކުރެވޭނެ އިންތިޒާމުވެސް ހަމަޖައްސައިދޭނެއެވެ. 

ގުރޫޕުތަކާ ނުގުޅި، އެމީހަކު ބޭނުން ގަޑިއެއްގައި ފަސޭހަ ގޮތަކަށް ޢުމްރާގެ އިންތިޒާމުތައް ހަމަޖައްސައިދޭނެއެވެ. އެގޮތުން ޒިޔާރަތްކުރަން ބޭނުންވާ ތަންތަނަށް އެކަނި ދިޔުމާ، ޢުމްރާ ކުރަން ބޭނުން ގަޑިތަކުގައި ޢުމްރާ ކުރެވޭނެ އިންތިޒާމު ހަމަޖައްސައިދޭނެއެވެ. އަދި އުމްރާ ދަތުރުގައި އަމިއްލައަށް އިހުތިޔާރުކުރާ ކަންކަމަށް ވަކިން ފައިސާ ދެއްކުމުގެ ފުރުސަތު އޮންނާނެއެވެ.