ރާއްޖޭގެ ހުރިހާ ރަށެއްގައި ލެބޯޓަރީ ހިދުމަތް ފެށުމަށް ސަރުކާރުން ކުރަމުން އަންނަ މަސައްކަތުގެ ތެރެއިން ގިނަ އަދަދެއްގެ ލެބޯޓަރީ ޓެކްނީޝަނުން ހޯދުމަށް މިއަދު އިއުލާނުކޮށްފިއެވެ.

ހެލްތު މިނިސްޓްރީން އިއުލާނުކުރި ގޮތުގައި މިއަދު އިއުލާނުކުރީ ހުރިހާ ރަށެއްގަައި ލެބޯޓަރީ ގާއިމުކުރުމަށް ސަރުކާރުން ކުރަމުންދާ މަސައްކަތުގެ ތެރެއިން މި އަހަރުގެ ފުރަތަމަ ތިން މަހަށް ބޭނުންވާ ލެބް ޓެކްނީޝަނުން ހޯދުމަށެވެ. އެގޮތުން ސަރުކާރުންވަނީ އެކި ރަށްރަށުގެ ހެލްތު ސެންޓަރުތަކަށާއި ހޮސްޕިޓާތަކަށް ބޭނުންވާ 60 ލެބް ޓެކްނީޝަނުން ހޯދުމަށް އިއުލާނުކޮށްފައެވެ. 

ބިދީސީންނަށް ކުރިމަތިލެވޭ ގޮތަށް ލެބް ޓެކްނީޝަނުންގެ މަގާމަށް ކުރިމަތިލުމަށް ހުޅުވައިލި ފުރުސަތު އަންނަ ހަފުތާގެ އަންގާރަ ދުވަހާ ހަމައަށް އޮންނާނެއެވެ. 

ލެބް ޓެކްނީޝަނުންގެ އިތުރަށް ސިއްހީ ހިދުމަތް ފުޅާކުރުމަށް ބޭނުންވާ މިންވަރަށް ދިވެހި ނަރުހުން ނުލިބޭތީ ބިދޭސީ 50 ނަރުހެއް ހޯދުމަށްވެސް އިއުލާނުކޮށްފައިވެއެވެ. ސަރުކާރުން އަންނަނީ ރަށްރަށުގައި ދެވޭ ސިއްހީ ހިދުމަތް ފުޅާކުރުމަށް އިންސާނީ ވަސީލަތް ހޯދުމުގެ ގިނަ މަސައްކަތްތަކެއް ކުރަމުންނެވެ. 

މިދިޔަ ހުކުރު ދުވަހު "ތަރުޖަމާނާ އެކު" ޕޮޑްކާސްޓުގައި ބައިވެރިވެވަޑައިގެން ހެލްތު މިނިސްޓަރު އަބްދުﷲ ނާޒިމު ފާހަގަކުރެއްވި ގޮތުގައި ފެންވަރު ރަނގަޅު ބޭސްފަރުވާ ފޯރުކޮށްދިނުމަށް ހަރުދަނާ ޑައިގްނޯސްޓިކް ނިޒާމެއް އޮންނަންޖެހެއެވެ.

އަދި އޭނާ ފާހަގަކުރެއްވި ޑައިގްނޯސްޓިކް ނިޒާމު ހަރުދަނާކޮށް އެ ހިދުމަތް ފުޅާކުރުމުގެ ކުރިން މި އަހަރުގެ ނިޔަލަށް ހުރިހާ ރަށެއްގައި ލެބޯޓަރީ ގާއިމުކުރުމަށް ސަރުކާރުންވަނީ ނިންމާފައެވެ. އެ މަސައްކަތުގެ ތެރެއިން ނިމުނު ޑިސެންބަރު މަހުވެސް ހަތަރު ރަށެއްގައި ލެބޯޓަރީ ހިދުމަތް ފަށާފައިވެއެވެ. 

ލެބޯޓަރީ ޓެކްނީޝަނަކަށް އަސާސީ މުސާރައިގެ ގޮތުގައި 5،610 ރުފިޔާ އަދި ސާވިސް އެލަވެންސްގެ ގޮތުގައި 2،500 ރުފިޔާ އަދި އެކޮމަޑޭޝަން އެލަވެންސްގެ ގޮތުގައި 3،000 ރުފިޔާއާއި ފުޑް އެލަވެންސްގެ ގޮތުގައި ލިބޭ 1،800 ރުފިޔާއާއެކު ޖުމްލަ 12،910 ރުފިޔާގެ އުޖޫރައެއް ލިބޭނެއެވެ. 

ސަރުކާރުން އަންނަނީ ލެބޯޓަރީ ހިދުމަތުގެ އިތުރަށް އެހެނިހެން ބައެއް ހިދުމަތްތައްވެސް ފުޅާކުރުމުގެ މަސައްކަތްކުރަމުންނެވެ. އެގޮތުން އާބަން މަރުކަޒުތަކުގައި ސީޓީ ސްކޭން އަދި ހުރިހާ ސަރަހައްދީ ހޮސްޕިޓަލެއްގައި އެމްއާރްއައި ސްކޭން ހެދުމުގެ ހިދުމަތް ދިނުމަށް މަސައްކަތްކުރަމުންދާއިރު، ޑައިލަސިސްގެ ހިދުމަތް ފުޅާކުރުމުގެ ބޮޑު މަޝްރޫއެއް ސަރުކާރުން ދަނީ ހިންގަމުންނެވެ.