މި އަހަރުގެ އެސްއެސްސީ އަދި އޯލެވެލް އިމްތިހާނު ޖުމްލަ 8،000 އަށްވުރެ ގިނަ ދަރިވަރުންނާއެކު މިއަދު ފަށައިފިއެވެ. 

އެޑިއުކޭޝަން މިނިސްޓްރީން މިއަދު މައުލޫމާތު ދިން ގޮތުގައި އޯލެވެލް އިމްތިހާނު މިއަހަރު 267 މަރުކަޒެއްގައި ކުރިއަށްގެންދާނެއެވެ. ފުރަތަމަ އިމްތިހާނެއްގެ ގޮތުން މިއަދު ކުރިއަށްގެންދިޔައީ އިސްލާމް މާއްދާގެ އިމްތިހާނެވެ. 

މި އަހަރުގެ އިމްތިހާނުގައި ޖުމްލަ 8،218 ދަރިވަރުން ޓެސްޓު ހެދުމަށް ހަމަޖެހިފައިވާއިރު، އެއީ އަތޮޅު ތެރޭގެ 246 މަރުކަޒަކާއި މާލޭގެ 21 މަރުކަޒެއްގެ ދަރިވަރުންނެވެ. ޓެސްޓުތައް ނިމޭނީ އަންނަ މާރިޗު މަހުގައިކަމަށްވެސް އެޑިއުކޭޝަން މިނިސްޓްރީން ބުނެފައިވެއެވެ. 

މި އަހަރު ގްރޭޑު ދިހައެއް ނިންމާ ދަރިވަރުންގެ އޯލެވެލް އިމްތިހާނު އޮކްޓޯބަރު މަހުގެ ތެރޭގައި ފެށުމަށްވަނީ ހަމަޖެހިފައެވެ. 

މިއަހަރު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވައުދުފުޅާ އެއްގޮތަށް ސްކޫލުތަކުގެ ފެށުން އަހަރުގެ ކުރީކޮޅަށް ބަދަލުކޮށް ބޮޑު ޗުއްޓީ އަހަރުގެ ފަހުކޮޅަށްވާނެ ގޮތަށް ބަދަލުކޮށްފައިވެއެވެ. މިއާއެކު މިހާރު ދިރާސީ އަހަރު ކުރިއަށްދާނީ މާލީ އަހަރާ އެއްކީލަކޮށެވެ. 

ފާއިތުވި އަހަރު އޯލެވެލް އިމްތިހާނުގައި 8،362 ދަރިވަރުން ބައިވެރިވެފައިވެއެވެ. އެހެންކަމުން މި އަހަރު އޯލެވެލް އިމްތިހާނު ހަދާ ދަރިވަރުންގެ އަދަދު ކުރީ އަހަރަށްވުރެ މަދެވެ.