ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބަށް ހުށަހެޅި 1،040 ފޯމު ބަލައިގަނެފައި ވާކަމަށް އިލެކްޝަންސް ކޮމިޝަނުން ބުނެފިއެވެ.

ކޮމިޝަނުން އާއްމުކުރި އެންމެ ފަހުގެ ހިސާބުތަކަށް ބަލާއިރު މީގެ ތެރޭގައި ހިމެނެނީ ސިޔާސީ ޕާޓީތަކުން ހުށަހެޅި 852 ފޯމާއި، އަމިއްލަގޮތުން ހުށަހަޅާފައިވާ 188 ފޯމެވެ. 

މީގެ ތެރެއިން ޝަރުތު ހަމަނުވާތީ ސިޔާސީ ޕާޓީތަކުން ހުށެހެޅި 142 ފޯމާއި  އަމިއްލަގޮތުން ހުށަހެޅި 94 ފޯމު ބަލައިނުގަންނަ ކަމަށް ކޮމިޝަނުން ވަނީ ބުނެފައެވެ. އަދި ކެންޑިޑަސީ ގަބޫލުނުކުރުމުގެ ސަބަބުން ސިޔާސީ ޕާޓީތަކުން 84 ، އަމިއްލަގޮތުން 49، ޖުމުލަ 133 ފޯމު އަލުން ހުށަހަޅާފައިވާކަމަށް ވެސް އީސީން ހާމަކޮށްފައިވެއެވެ. 

އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރުމަށް ހުށަހެޅި 817 ކެންޑިޑޭޓުންގެ ފޯމު ބަލައިގަނެފައިވާއިރު މީގެ ތެރޭގައި ހިމެނެނީ ސިޔާސީ ޕާޓީތަކުގެ 692 ފޯމާއި، އަމިއްލަގޮތުން ހުށަހެޅި 125 ފޯމެވެ. 

އިލެކްޝަންސް ކޮމިޝަނުން މައުލޫމާތުދީފައިވާ ގޮތުގައި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރުމަށް ލާފައިވާ 161 ފޯމެއް ވަނީ ޝަރުތު ހަމަނުވާ ކަމަށް ކަނޑައަޅާފައެވެ. މީގެ ތެރޭގައި ހިމެނެނީ ސިޔާސީ ޕާޓީތަކުގެ 103 ފޯމާއި، އަމިއްލަގޮތުންލީ 58 ފޯމެވެ.

ކެންޑިޑަސީ ގަބޫލުނުކުރުމުގެ ސަބަބުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިހާބަށް، ސިޔާސީ ޕާޓިތަކުގެ 54 ފޯމާއި، އަމިއްލަގޮޮތުން ލާފައިވާ 32 ފޯމާއިއެކު، ޖުމުލަ 86 ފޯމުވަނި އަލުން ލާފައެވެ. 

މިއަހަރު ބާއްވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ކުރިމަތިލާން ހުޅުވާލާފައިވަނީ މި މަހުގެ 17 އިން ފެށިގެން އަންނަ ފެބްރުވަރީ އެއް ވަނަ ދުވަހުގެ ނިޔަލަށެވެ.މިފަހަރުގެ އިންތިޚާބުގައި 225 ދާއިރާއަކަށް މެންބަރުން އިންތިޚާބުކުރާނެއެވެ. ކައުންސިލް މެންބަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނާ އެކު އެއީ 1356 ކެންޑިޑޭޓުންނެވެ.

އިންތިޚާބުގައި އަތޮޅުތަކުގައި 321 ވޯޓު ފޮށި ބަހައްޓާއިރު ސިޓީ ތަކާއި މާލެ ސަރަޙައްދު ހިމެނޭގޮތަށް 240 ވޯޓު ފޮށި ބަހައްޓާނެ އެވެ. 

ސިނާއީ މަސައްކަތްކުރާ ރަށްތަކުގައި 3 ވޯޓު ފޮށި ބަހައްޓާއިރު، ޖަލުތަކުގައި 5 ވޯޓު ފޮށި ބަހައްޓަން ވަނީ ނިންމައިފަ އެވެ. ރިސޯޓުތަކުގައި ބަހައްޓާނީ 50 ވޯޓު ފޮށި ކަމަށް އިލެކްޝަންސްއިން ވަނީ ބުނެފައެވެ. 

ރާއްޖޭން ބޭރުގައި މިފަހަރު ވޯޓު ފޮށި ބަހައްޓަނީ މެލޭޝިއާ އަދި ސްރީ ލަންކާގަ އެވެ. އެގޮތުން މެލޭޝިއާއިން ކުއަލަލަންޕޫރުގައި ބަހައްޓާއިރު ލަންކާގައި ވޯޓު ފޮށި ބަހައްޓަނީ ކޮލަމްބޯގައެވެ.

އިލެކްޝަންސް އިން އާއްމުކޮށްފައިވާ މަޢުލޫމާތުގައި ވާގޮތުން، މިއަހަރުގެ އިންތިޚާބުގައި 294،937 މީހުންނަށް ވޯޓުލުމުގެ ޙައްޤު ލިބިގެންވެއެވެ. އެއީ 144،527 އަންހެނުންނާއި 150،410 ފިރިހެނުންނެވެ.