ރާއްޖެ ޓްރާންސްޕޯޓް ލިންކް، އާރްޓީއެލްގެ ޚިދުމަތް ނުލިބޭ އިތުރު އަތޮޅަކަށް އާރްޓީއެލްގެ ހިދުމަތް ފެބްރުއަރީ މަހު ފުޅާކުރުމަށް ތައްޔާރުވަމުން އަންނަ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ބުނެފިއެވެ.

ދަތުރުފަތުރާ މަދަނީ އުދުހުންތަކާ ބެހޭ ވުޒާރާގެ ޑެޕިއުޓީ މިނިސްޓަރ އިބްރާހމް ޔާސިރު "އެމްއެމްޓީވީ"އަށް ވިދާޅުވީ އާރްޓީއެލްގެ ޚިދުމަތް ނުލިބޭ އިތުރު އަތޮޅަކަށް އާރްޓީއެލްގެ ހިދުމަތް ފެބްރުއަރީ މަހު ފުޅަކުރުމަށް ތައްޔާރުވަމުން އަންނަކަމަށެވެ. އަދި ދެން އެންމެ އަވަހަށް ހިދުމަތް ފަށާނެ އަތޮޅުތައް ކަނޑައެޅުމުގެ މަސައްކަތް ވުޒާރާއިން މިހާރު ކުރަމުންދާ ކަމަށް ޔާސިރު ވިދާޅުވިއެވެ.

އާރްޓީއެލްގެ ޚިދުމަތް ރާއްޖޭގައި ދެނީ 6 ޒޯނަކަށް ބަހާލައިގެންނެވެ. މި ޚިދުމަތް މިހާތަނަށް 4 ޒޯނެއްގައި ވަނީ ފަށާފައެވެ. ހިދުމަތް ނުފަށާ އޮތީ، ޒޯން 4 އަދި ޒޯން 3 ގައެވެ. ޒޯން 4ގައި ހިމެނެނީ، މ، ފ، ދ އަދި ލ.އަތޮޅުއެވެ. ޒޯން 3ގައި ހިމެނެނީ ކ، އއ، އދ އަދި ވ. އަތޮޅެވެ. އެންމެ ފަހުން އާރްޓީއެލްގެ ޚިދުމަތް ފެށީ، ތ.އަތޮޅުގައެވެ.

ރާއްޖޭގެ ހުރިހާ އަތޮޅަކަށް އާރްޓީއެލް ޚިދުމަތް ފުޅާކުރުމަކީ ސަރުކާރުގެ އަމާޒެކެވެ. އެ އަމާޒަށް ވާސިލުވުމަށް ބޭނުންވާ ފެރީތައް ބަނދެ އަތޮޅުތަކުގައި ފެރީ ވިއުގަ ގާއިމުކުރުމުގެ މަސައްކަތް އެމްޓީސީސީއާއި ދަތުރުފަތުރާ ބެހޭ ވުޒާރާއިން އަންނަނީ ކުރަމުންނެވެ. 

ރައީސުލްޖުމްހޫރިއްޔާ އަތޮޅުތެރެއަށް ކުރެއްވި ދަތުރުފުޅުގައި ވިދާޅުވެފައިވަނީ މިއަހަަރުގެ މާރިޗު މަހުގެ ނިޔަލަށް ހުރިހާ އަތޮޅެއްގައި އާރްޓީއެލް ފެރީގެ ހިދުމަތް ދީ ނިންމުމަށް ސަރުކާރުން މަސައްކަތް ކުރަމުން ދާކަމަށެވެ.