ދިވެހިރާއްޖޭގައި ފުރަތަމަ ފަހަރަށް އެކުލަވައިލާ "މޫސުމަށް އަންނަ ބަދަލުތަކާ ގުޅޭ ޖެންޑަރ އެކްޝަން ޕްލޭން" އެކުލަވާލުމާއި ގުޅޭ ވޯކްޝޮޕް ނިންމާލައިފިއެވެ.

މިނިސްޓްރީ އޮފް ޓޫރިޒަމުން އިންތިޒާމުކޮށްގެން މިނިސްޓްރީ އޮފް ސޯޝަލް އެންޑް ފެމީލީ ޑިވެލޮޕްމަންޓާއެކު ކުރިއަށްގެންދިޔަ މި ބައްދަލުވުން ނިންމާލާފައިވަނީ 26 ޖަނަވަރީ 2026 ވަނަ ދުވަހުއެވެ. 

ވޯކްޝޮޕް ރަސްމީކޮށް އިފްތިތާޙުކޮށްދެއްވައި ވާހަކަފުޅުދައްކަވަމުން ޓޫރިޒަމް މިނިސްޓްރީގެ ސްޓޭޓް މިނިސްޓަރ އިބްރިމް މިމްރާހު ވަނީ މޫސުމަށް އަންނަ ބަދަލުތަކުގެ ނޭދެވޭ އަސަރު ފޯރާ ދާއިރާތަކުގެ ތެރޭގައި މިންތީގެ ތަފާތުކުރުންތަކުގެ ސަބަބުން ގޮންޖެހުންތަކާއި، ނުރައްކާތައް ފެންނަން ހުރިކަން ފާހަގަކުރައްވާފައެވެ. މި ދާއިރާތަކުގެ ތެރޭގައި ސިއްހީ ދާއިރާ، ބިނާވެރި ކަމާއި މުސުމީ ކާރިސާތަކުން ރައްކާތެރިވުމުގެ ދާއިރާ، ބޯހިޔާވަހިކަން އަދި އާމްދަނީ ހޯދުމަށް ކުރާ މަސައްކަތްތައް ހިމެނޭކަމަށް ސްޓޭޓް މިނިސްޓަރ ވިދާޅުވިއެވެ. 

ސްޓޭޓް މިނިސްޓަރ ވަނީ މީގެ ކުރިން އެކުލަވާލާފައިވާ ޕްލޭންތަކުގައި އަންހެނުންނަށް ދިމާވާ ގޮންޖެހުންތަކާއި، އެމީހުންގެ ހުނަރުތަކަށް މާބޮޑު ސަމާލުކަމެއް ދީފައިނުވާކަން ފާހަގަކުރެވޭކަމަށެވެ. އަދި ރާއްޖޭގެ ތިންވަނަ ނެޝަނަލީ ޑިޓަރމައިންޑް ކޮންޓްރިބިއުޝަންސް ނުވަތަ ރާއްޖޭގެ ކްލައިމެޓް އެކްޝަން ޕްލޭންގައި އަންހެނުން ބާރުވެރިކުރުވުމަށް ހަރަކާތްތަކެއް ފާހަގަކޮށްފައިވީ ނަމަވެސް، މޫސުމަށް އަންނަ ބަދަލުތަކާ ގުޅޭ ދައިރާތަކުން މީންތީގެ ހަމަހަމަކަން ކަށަވަރުކުރުމަށް ޚާއްސަކޮށްގެން ޕްލޭނެއް އެކުލަވާލެވޭ މިއީ ފުރަތަމަ ފަހަރުކަން ސްޓޭޓް މިނިސްޓަރ ވަނީ ފާހަގަކުރައްވާފައެވެ.

މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުގެ ކްލައިމެޓް ޗޭންޖް ޑިޕާޓްމަންޓުން ތައްޔާރުކުރާ މި އެކްޝަން ޕްލޭނަކީ މޫސުމަށް އަންނަ ބަދަލުތަކުގެ އަސަރުތައް ކުޑަކުރުމަށާއި ހޭނުމުގެ ގޮތުން ރާވާ ރޭވުންތަކުގައި އަންހެނުންނާއި ފިރިހެނުންގެ ދައުރު ހަމަހަމަކޮށް ހިމެނުމަށް މަގުފަހިކޮށްދޭނެ މުހިންމު ޕްލޭނަކަށްވާނެކަން ފާހަގަކުރެއްވިއެވެ.

މި މަސައްކަތު ބައްދަލުވުގައި، ސަރުކާރުގެ އެކި ވުޒާރާތަކުންނާއި، މަދަނީ ޖަމިއްޔާތަކުން އަދި އދ. ގެ އިދާރާތަކުން ބައިވެރިވިއެވެ. ބައިވެރިން ވަނީ ރާއްޖޭގައި މޫސުމަށް އަންނަ ބަދަލުތަކުގެ ސަބަބުން މިންތީގެ ތަފާތުތަކަށް ބިނާކޮށް ކުރިމަތިވާ ނާޒުކު ހާލަތްތަކާ ގޮންޖެހުންތަކާއި ގުޅޭގޮތުން މަޝްވަރާކޮށް، އިސްކަންދޭނެ ދާއިރާތަކަށް އަލިއަޅުފާލާފައެވެ.

މި އެކްޝަން ޕްލޭން އެކުލަވައިލުމުގެ މަސައްކަތް ކުރިއަށްދަނީ "ނެޕް ގްލޯބަލް ނެޓްވޯކް" ގެ ފަންނީ އެހީތެރިކަމާއެކުގައެވެ.