ބޭންކު އޮފް މޯލްޑިވްސްގެ ކްރެޑިޓް ކާޑުން ރާއްޖެއިން ބޭރުގެ މުއާމަލާތްތައް ކުރުމަށް މަހަކަށް ކަނޑައަޅާފައިވާ ލިމިޓް އަންނަ މަހުން ފެށިގެން ބޮޑުކުރަން ނިންމައިފިއެވެ.

ކްރެޑިޓް ކާޑުން މަހަކު ބޭނުންކުރެވޭ ޑޮލަރު ލިމިޓު ބޮޑު ކުރުމަށް ސަރުކާރުން ކުރަމުންދާ މަސައްކަތުގެ ތެރެއިން، 1 ފެބްރުއަރީ 2026 އިން ފެށިގެން ބީއެމްއެލްގެ ކްލެސިކް ކާޑުގެ ލިމިޓް 750 ޑޮލަރުން 1400 ޑޮލަރަށް ބޮޑުވާނެކަން އެންމެ ފުރަތަމަ ހާމަކުރެއްވީ މިދިޔަ ސެޕްޓެމްބަރުމަހު ރައީސުލްޖުމްހޫރިއްޔާ ޑރ. މުޙައްމަދު މުއިއްޒެވެ. 

ބޭންކުން ވަނީ އިތުރުން ގޯލްޑް ކާޑުގެ ލިމިޓް 750 ޑޮލަރުން 1500 ޑޮލަރަށް އަދި ޕްލެޓިނަމް ކާޑުގެ ލިމިޓް 1،500 ޑޮލަރުން 3،000 ޑޮލަރަށް ބޮޑުކޮށްފައެވެ. އަދި ކްލެސިކް ކާޑުގެ ލިމިޓް ވަނީ 750 ޑޮލަރުން 1400 ޑޮލަރަށް ބޮޑުކޮށްފައެވެ. 

ބޭންކުން ބުނީ މި އަދަދު ތަކަކީ ކޮންމެ ކަސްޓަމަރަކަށް ޑެބިޓް ކާޑުން ބޭނުންކުރެވޭ ގޮތަށް ހަމަޖައްސާފައިވާ ލިމިޓުގެ އިތުރުން ކްރެޑިޓް ކާޑަށް ހަމަޖައްސާފައިވާ ލިމިޓެއްކަމަށެވެ. 

މިދިޔަ އަހަރުގެ ނޮވެމްބަރު 11 އިން ފެށިގެން ބީއެމްއެލްގެ ޑެބިޓް ކާޑުތަކުން ޕީއޯއެސް މެދުވެރިކޮށް ރާއްޖެއިން ބޭރުން ފައިސާ ދެއްކޭ އަދަދު 500 ޑޮލަރުން 1،000 ޑޮލަރަށް ވަނީ އިތުރުކޮށްފައެވެ.

މީގެ އިތުރުން، ނޮވެމްބަރު 11 އިން ފެށިގެން ވަނީ އެއާލައިންތަކުން ޓިކެޓް ގަތުމަށާއި ރާއްޖެއިން ބޭރުގައި ހޮޓަލަށް ޑެބިޓް ކާޑުން ފައިސާ ދެއްކޭ އަދަދު 3،000 ޑޮލަރަށް ބޮޑު ކޮށްފައެވެ. އަދި ބޭސްފަރުވާ އަށް ހޮސްޕިޓަލަށް ދައްކަން ޖެހޭ ފައިސާ ބޭންކުގައި އެދުމުން ހޮސްޕިޓަލަށް ޑެބިޓް ކާޑުން ފައިސާ ދެއްކޭނެ ގޮތް ވެސް އެ ތާރީހުން ފެށިގެން ވަނި ހަމަޖެހިގެން ގޮސްފައެވެ.

ބީއެމްއެލް ޑެބިޓް ކާޑުތަކުން ރާއްޖޭން ބޭރުގެ މުދަލާއި ހިދުމަތަށް ފައިސާ ދެއްކުމަށް ކުރިން ދީފައި އޮންނަ 250 ޑޮލަރުގެ މަހު ލިމިޓް 500 ޑޮލަރަށް ބޮޑުކުރީ މިދިޔަ ޖުލައި އެކަކުން ފެށިގެންނެވެ.