2024 ވަނަ އަހަރުގެ ސެޕްޓެމްބަރުމަހުގެ 16 ވަނަ ދުވަހުގެ ނިޔަލަށް ތިމާވެއްޓަށް ލިބުނު ގެއްލުމުގެ ބަދަލުގެ ގޮތުގައި ދައުލަތަށް ލިބެންޖެހޭ 930 މިލިއަނަށްވުރެ ގިނަ ރުފިޔާ ނުލިބޭކަމަށް އޮޑިޓު ރިޕޯޓުން ދައްކައިފިއެވެ.

އެ އޮފީހުން މިއަދު އާއްމުކުރި 2019، 2020 އަދި 2022 ވަނަ އަހަރުގެ ތިމާވެއްޓާ ބެހޭ ވުޒާރާގެ ކޮމްޕްލަޔަންސްް އޮޑިޓް ރިޕޯޓުގައިވަނީ ތިމާވެއްޓަށް ލިބޭ ގެއްލުންތަކާއި ގުޅިގެން، ތިމާވެއްޓަށް ލިބޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދުގެ ދަށުން ކޮށްފައިވާ ޖޫރިމަނާތަކުގެ މައްސަލަތަކާއި ގުޅިގެން، 16 ސެޕްޓެންބަރު 2024 ނިޔަލަށް ޖުމްލަ 930,328,480 (ނުވަ ސަތޭކަ ތިރީސް މިލިއަން ތިން ލައްކަ އަށާވީސްހާސް ހަތަރު ސަތޭކަ އަށްޑިހަ) ރުފިޔާ ދައުލަތަށް ލިބެންޖެހޭ ކަމަށެވެ. 

އެ ފައިސާ ދައުލަތަށް އަނބުރާ ހޯދުމަށް ބައެއް ކަންކަން އިސްލާހުކޮށް، ފިޔަވަޅު އެޅުމަށް އޮޑިޓް ރިޕޯޓުގައި ވަނީ ލަފާ ދީފައެވެ. 

އޮޑިޓުގައި ފާހަގަކޮށްފައިވާ އިތުރު މައްސަލަތައް:

*މައިކްރޮސޮފްޓް: ވޮލިއުމް ލައިސެންސް ގަތުމުގައި ފާހަގަވެފައިވާ މައްސަލަތައް

ދައުލަތުގެ ހުރިހާ އިދާރާތަކުގެ މުވައްޒަފުން ބޭނުންކުރުމަށް މައިކޮރޯސޮފްޓް  365 ގެ ހަތަރު ވައްތަރެއްގެ 20,000 (ވިހި ހާސް) ލައިސަންސާއި މި ނޫން އިތުރު ވައްތަރެއްގެ މައިކްރޯސޮފްޓް ޕްރޮޑަކްޓްތައް ހިމެނޭ 21,577 (އެކާވީސް ހާސް ފަސްސަތޭކަ ހަތްދިހަ ހަތެއް) ލައިސަންސް ހިމެނޭހެން ޖުމްލަ 41,577 (ސާޅީސް އެއް ހާސް ފަސްސަތޭކަ ހަތްދިހަ ހަތެއް) ލައިސަންސް ގަތުމަށް، މައިކްރޯސޮފްޓް ކުންފުންޏާ އެކު، އެންސީއައިޓީއިން  24 ޖޫން 2021ގައި ތިން  އަހަރުގެ އެގްރީމެންޓެއްގައި ސޮއިކޮށްފައިވާކަމަށް އޮޑިޓް ރިޕޯޓުގައި ވަނީ ބުނެފައެވެ.

މި އެގްރީމަންޓްގައިވާ ގޮތުން 2021 އިން 2023 އަށް ކޮންމެ އަހަރަކު ޖުމުލަ 42,226,977 (ސާޅީސް ދެ މިލިއަން ދެ ލައްކަ ސައްބީސް ހާސް ނުވަ ސަތޭކަ ހަތްދިހަ ހަތެއް) ރުފިޔާ ދައްކަން ޖެހޭއިރު، ފުރަތަމަ އަހަރަށް ވާ ފައިސާ ދައްކާފައިވަނީ 14 ޑިސެންބަރ 2021 ގައެވެ. އޮޑިޓް ރިޕޯޓުގައި ބުނީ މި އެއްބަސްވުމުގެ ފުރަތަމަ އަހަރަށްވާ 41,577 (ސާޅީސް އެއް ހާސް ފަސް ސަތޭކަ ހަތްދިހަ ހަތެއް) ލައިސަންސްތައް އެންސީއައިޓީއަށް މި އެއްބަސްވުމުގައި ސޮއިކޮށްފައިވާ ތާރީޚު ގައި ލިބިފައިވިނަމަވެސް، 2021 ވަނަ އަހަރު ފައިސާދައްކާފައިވާ ލައިސަންސްތަކުގެ ތެރެއިން ގިނަ ޢަދަދެއްގެ ލައިސަންސް ދައުލަތުގެ އިދާރާތަކާ ހަވާލުނުކުރެވުމުގެ ސަބަބުން ބޭނުން ނުކުރެވިފައި ވާކަމަށެވެ.

އެގޮތުން ހަވާލުނުކުރެވި ބޭނުންނުކުރެވުނު ލައިސަންސްތަކަށް ޖުމުލަ 18,267,515 (އަށާރަ މިލިއަން ދުއިސައްތަ ފަސްދޮޅަސް ހަތް ހާސް ފަސްސަތޭކަ ފަނަރަ) ރުފިޔާ ޚަރަދު ކޮށްފައިވާކަން ފާހަގަކޮށްފައިވެއެވެ. މީގެ އިތުރުން މައިކްރޯސޮފްޓް 365 ނޫން އިތުރު ޕްރޮޑަކްޓްތަކުގެ ތެރެއިން 9,929 (ނުވަ ހާސް ނުވަ ސަތޭކަ ނަވާވީސް) ލައިސަންސް ވަނީ ހަވާލުނުކުރެވިއެވެ. މިއަށް ޖުމްލަ 2,571,326 (ދެ މިލިއަން ފަސްސަތޭކަ ހަތްދިހަ އެއް ހާސް ތިން ސަތޭކަ ސައްބީސް) ރުފިޔާ ޚަރަދު ކޮށްފައިވެއެވެ. 

އެންސީއައިޓީއިން ދައުލަތުގެ އިދާރާތަކުގައި ބޭނުންކުރާ އަދި އިތުރަށް ބޭނުންވާ ސޮފްޓްވެއާރ ލައިސެންސްގެ މަޢުލޫމާތު ހޯދުމަށް 2019 ވަނަ އަހަރުން ފެށިގެން ސާރވޭ ކޮށްފައިވީ ނަމަވެސް، ލައިސަންސްގަތުމުގެ ކުރިން މިފަދަ ޕްރޮޖެކްޓަކަށް އެކަށީގެންވާ މިންވަރަށް މަޢުލޫމާތު ހޯދައި، ނީޑްސް އެސެސްމެންޓް ރިޕޯޓެއް ތައްޔާރުކޮށްފައި ނުވާކަން ވެސް ވަނީ ފާހަގަކޮށްފައެވެ. 

އޮޑިޓްގައިވަނީ އެއް އަހަރުން އަނެއް އަހަރަށް ދައުލަތުގެ އިދާރާތަކާ ހަވާލުކުރެވިފައިވާ ލައިސަންސްތަކުން ބޭނުންކުރާ މިންވަރު ބަލައި މޮނީޓަރ ކޮށްފައި ނުވާކަންވެސް ފާހަގަކޮށްފައެވެ.

*ހޯމް ސޯލަރ ޕްރޮގްރާމްގެ މަޤްޞަދު ހާސިލްކުރެވުނު މިންވަރު އެއްބަސްވުމާ އެއްގޮތަށް މިނިސްޓްރީއިން މޮނިޓަރކޮށް އިވެލުއޭޓްކޮށްފައިނުވުން

ރިޕޯޓުގައި ބުނީ 2021 ވަނަ އަހަރު ފަސް އަހަރުގެ މުއްދަތަކަށް ހޯމް ސޯލަރ ޕްރޮގްރާމު ހިންގުމަށް ފެނަކައާއެކު އެއްބަސްވުމެއްގައި ސޮއިކޮށްފައިވާކަމަށެވެ. 

މި ޕްރޮގްރާމް ހިންގުމަށް ޤާއިމުކޮށްފައިވާ 20,000,000 (ވިހި މިލިއަން) ރުފިޔާގެ ރިވޯލްވިންގ ފަންޑަށް ޖަމާކުރެވޭ ފައިސާގެ ތަފްސީލުތަކާއި، ހޯމްސޯލާ ނިޒާމްތައް ގަންނަ ކަސްޓަމަރުން އޭގެ އަގު ފެނަކައަށް ދައްކަމުންދާ ގޮތުގެ ތަފްސީލު ހިމަނާފައިbނުވާކަމަށް އޮޑިޓު ރިޕޯޓުގައިވަނީ ފާހަގަކޮށްފައެވެ. މި ފަންޑު ޤާއިމުކުރުމަށްފަހު، ފަންޑުން ކޮށްފައިވާ ޚަރަދުތަކާއި ފަންޑަށް ލިބިފައިވާ ފައިސާގެ މަޢުލޫމާތު މޮނީޓަރކޮށް އިވޭލުއޭޓްކޮށްފައި ނުވާކަމަށް ވެސް ބުނެފައިވެއެވެ. 

*ލޯކަލް ކައުންސިލްތަކަށް ހިލޭ އެހީ ދިނުމުގައި މަސައްކަތުގެ އެއްބަސް ހިލާފަށް އަމަލުކޮށްފައިވުން

ވޭސްޓު ކަލެކްޝަން ނިޒާމެއް ގާއިމުކޮށް ކުނި މެނޭޖުކުރުން ހަރުދަނާކުރުމަށް އެހީތެރިކަން ފޯރުކޮށްދިނުމުގެ ގޮތުން ވެހިކަލް ގަތުމުގެ މަސައްކަތް ކުރުމަށް ވުޒާރާއާއި 20 ރަށެއްގެ ކައުންސިލާ ދެމެދު ޖުމްލަ 10.7 މިލިއަން ރުފިޔާގެ އެއްބަސްވުމެއްގައި ސޮއިކޮށްފައިވިޔަސް 2023 ވަނަ އަހަރާ ހަމައަށް އައިއިރުވެސް މި މަސައްކަތްތައް ނިމިފައިނުވާކަން ވަނީ ފާހަގަކޮށްފައެވެ. 

ކައުންސިލްތަކާއެކު ވެފައިވާ އެއްބަސްވުންތަކާ އެއްގޮތަށް މަސައްކަތްތައް ކުރިއަށްދޭތޯ ބަލާފައިނުވާކަން ވެސް އޮޑިޓް ރިޕޯޓުގައިވަނީ ފާހަގަކޮށްފައެވެ.

ވުމާއެކު، މަޝްރޫއުތައް ހިންގުމަށް ވެފައިވާ އެއްބަސްވުންތަކާ އެއްގޮތަށް އެ ކަންކަން ކުރިއަށް ދޭތޯ ބެލުމަށް އޮޑިޓް ރިޕޯޓުގައި ވަނީ ލަފާދީފައެވެ.