ޞިއްޙީ ވުޒާރާއިން މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ޙަވާލުކޮށްގެން ރާއްޖެ ގެނެސްފައިވާ އެމްބިއުލަންސްތައް 27 ރަށަކަށް ފޮނުވާފައިވާކަމަށް އެކުންފުނިން ބުނެފިއެވެ. 

އެމްޕީއެލްއިން ވަނީ 56 އެމްބިއުލަންސް ގެނެސްފައެވެ. އެ އެމްބިއުލަންސްތައް ފޮނުވުމުގެ މަސައްކަތް އެމްޕީއެލްއިން ފެށީ ޖަނަވަރީ 19 ވަނަ ދުވަހުއެވެ. 

އެމްޕީއެލްއިން "އެކްސް" ގައި އިއްޔެ ކުރި ޕޯސްޓުގައި ބުނީ މިހާތަނަށް 27 ރަށަކަށް އެމްބިއުލަންސް ފޮނުވާފައިވާ ކަމަށެވެ. އަދި، ބާކީ ރަށްތަކަށް އެމްބިއުލަންސް ފޮނުވުމުގެ މަސައްކަތް ކުރަމުންގެންދާ ކަމަށް އެމްޕީއެލްއިން ބުނެފައިވެއެވެ. އެމްޕީއެލްއިން ބުނީ ކަނޑައަޅާފައިވާ ރަށްތަކަށް އެމްބިއުލަންސްތައް ވަރަށް އަވަހަށް ފޮނުވާނެ ކަމަށެވެ. 

ސަރުކާރުން އެމްބިއުލަންސް ގެނައުމުގެ މަސައްކަތް ފެށީ ބައެއް ރަށްތަކުގައި އެ ޚިދުމަތް ނުލިބި ބަލި މީހުން އުފުލުމުގައި ރަށްރަށުގެ ރައްޔިތުން ބޮޑެތި ދަތިތަކާ ކުރިމަތިލާން ޖެހޭތީއެވެ. އަދި، އެމްބިއުލަންސް ހުރި ރަށްރަށުގައި ވެސް އެމްބިއުލަންސް ރަނގަޅަށް ނުބެލެހެއްޓޭތީ އެމްބިއުލަންސްތައް ހުރީ ބަދަލުކުރަން ޖެހިފައެވެ. 

ރަށްތަކަށް އެމްބިއުލަންސް ގެންނަން ސަރުކާރުން ނިންމާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، މިދިޔަ އަހަރުގެ ސެޕްޓެމްބަރު 25 ވަނަ ދުވަހު ތ. އޮމަދޫގައި ދެއްކެވި ވާހަކަފުޅުގައެވެ. އެދުވަހު ރައީސުލްޖުމްހޫރިއްޔާ ވިދާޅުވީ، އެމްބިއުލަންސް ބޭނުންވާ ގިނަ ރަށްތަކެއް ހުރުމާއެކު ސަރުކާރުން އެކަމަށް ހައްލެއް ގެނެސްދެއްވާނެ ކަމަށެވެ. އަދި، އެމްބިއުލަންސްތައް ގެނައުމުގެ މަސައްކަތް ސަރުކާރުން ފަށާފައިވާކަން އެދުވަހު އޮމަދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވިދާޅުވިއެވެ.