މި އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ 98.7 އިންސައްތަ ފަތުރުވެރިން އައީ ވެލާނާ އިންޓަނޭޝަނަލް އެއާޕޯޓަށްކަން ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ. 

އެމިނިސްޓްރީން އާއްމުކޮށްފައިވާ ތަފާސްހިސާބުތަކަށް ބަލާއިރު، ރާއްޖެއަށް ޖަނަވަރީ އެއްވަނަ ދުވަހުން ފެށިގެން 26 ޖަނަވަރީގެ ނިޔަލަށް 185،735 ފަތުރުވެރިން އައިސްފައިވެއެވެ. ނިމުނު އަހަރުގެ އެ މުއްދަތުގައި އައިސްފައިވަނީ 178،150 ފަތުރުވެރިންނެވެ. އެހެންކަމުން މި އަހަރުގެ އެ މުއްދަތުގައި އައި ފަތުރުވެރިންގެ އަދަދުވަނީ 4.3 އިންސައްތަ އިތުރުވެފައިވެއެވެ. 

ޖަނަަވަރީ މަހުގެ މިހާތަނަށް އެންމެން ގިނަ ފަތުރުވެރިން ރާއްޖެއަށް އައީ މި މަހުގެ 11 ވަނައަށްވީ އާދީއްތަ ދުވަހުއެވެ. އެ ދުވަހު މުޅިއަކު 9،596 ފަތުރުވެރިން ރާއްޖެއަށް އައިސްފައިވެއެވެ. ޖަނަވަރީ އެކަކުން ފެށިގެން 26 ވަނަ ދުވަހުގެ ނިޔަލަށް އެވެރެޖުކޮށް ކޮންމެ ދުވަހަކު 7،144 ފަތުރުވެރިން އައިސްފައިވެއެވެ. 

މި މުއްދަތުގައި ރާއްޖެއަށް ފަތުރުވެރިންގެ ތެރެއިން 183،438 ފަތުރުވެރިން އައިސްފައިވަނީ ވެލާނާ އިންޓަނޭޝަނަލް އެއާޕޯޓަށެވެ. ދެން އެންމެ ގިނަ ފަތުރުވެރިން އައީ މާފަރު އިންޓަނޭޝަނަލް އެއާޕޯޓަށެވެ. އެ އެއާޕޯޓަށް 672 ފަތުރުވެރިން އައިއިރު، ހަނިމާދޫ އިންޓަނޭޝަނަލް އެއާޕޯޓަށް 535 ފަތުރުވެރިން އައި ގަން އިންޓަނޭޝަނަލް އެއާޕޯޓަށް 523 ފަތުރުވެރިން އައިސްފައިވެއެވެ. ދ.ކުޑަހުވަދޫ އެއާޕޯޓަށް 227 ފަތުރުވެރިން އދި އދ.މާމިގިލީގައި ހިންގާ ވިލާ އިންޓަނޭޝަނަލް އެއާޕޯޓަށް 342 ފަތުރުވެރިން އައިސްފައިވެއެވެ. 

ޖަނަވަރީ މަހުގެ މިހާތަނަށް އެންމެ ގިނައިން ފަތުރުވެރިން އައީ ރަޝިޔާއިންނެވެ. އެގައުމުން 25،530 ފަތުރުވެރިން އައިއިރު، ދެވަނައަށް އެންމެ ގިނަ ފަތުރުވެރިން އައި އިޓަލީވިލާތުން 19،916 ފަތުރުވެރިން އަދި ތިންވަނައަށް އެންމެ ގިނަ ފަތުރުވެރިން އައި އިނގިރޭސިވިލާތުން 16،573 ފަތުރުވެރިންް އައިސްފައިވެއެވެ. 

ރާއްޖެއަށް ޒިޔާރަތްކުރި ފަތުރުވެރިންގެ ތެރެއިން 127،667 ފަތުރުވެރިން ނުވަތަ 68.7 އިންސައްތަ މީހުން ޒިޔާރަތްކުރީ ރިސޯޓުތަކަށެވެ. އަދި ގެސްޓު ހައުސްތަކަށް އައީ 48،908 ފަތުރުވެރިންނެވެ. އެއީ ޖުމްލަ ފަތުރުވެރިންގެ 26.3 އިންސައްތައެވެ. 

ރާއްޖެއަށް އަންނަ ފަތުރުވެރިންގެ ތެރެއިން 98 އިންސައްތައަށްވުރެ ގިނަ ފަތުރުވެރިން ވެލާނާ އިންޓަނޭޝަނަލް އެއާޕޯޓަށް އަންނައިރު، ނިމުނު އަހަރުގެ ޖުލައި މަހުން ފެށިގެން އެއާޕޯޓުގެ އައު ޓާމިނަލުން ހިދުމަތްދޭން ފަށާފައިވެއެވެ. އަދި މިހާރު ރާއްޖެއަށް ދަތުރުކުރާ ހުރިހާ އެއާލައިނަކަށް ހިދުމަތް ދެމުންދަނީ އައު ޓާމިނަލުންނެވެ. 

އައު ޓާމިނަލާއެކު ވެލާނާ އިންޓަަނޭޝަނަލް އެއާޕޯޓުން ފަސިންޖަރުންނަށް ދޭ ހިދުމަތުގެ ފެންވަރު ވަރަށް ބޮޑަށް ރަނގަޅުވެފައިވާއިރު، މި ޓާމިނަލަކީ އަހަރަކު ހަތް މިލިއަން ފަތުރުވެރިންނަށް ހިދުމަތް ދެވޭ ފެންވަރަށް ގާއިމުކޮށްފައިވާ ޓާމިނަލެކެވެ. 

ހަނިމާދޫ އިންޓަނޭޝަނަލް އެއާޕޯޓަށް އަންނަ ފަތުރުވެރިންގެ އަދަދު ކުރިއާ އަޅާބަލާއިރު އިތުރުވެފައިވާއިރު، އެ އެއާޕޯޓަކީ އިންޑިޔާގެ އެގްޒިމް ބޭންކުގެ ލައިން އޮފް ކްރެޑިޓެއްގެ ދަށުން ބިނާކޮށްފައިވާ ޒަމާނީ ވަސީލަތްތައް ހުރި އެއާޕޯޓެކެވެ.