ނ. ފޮއްދޫގައި ސަރުކާރުން އިމާރާތްކުރާ ސިއްހީ މަރުކަޒުގެ ފައުންޑޭޝަން އެޅުމުގެ މަސައްކަތުގެ ތެރެއިން ކޮންކްރީޓް ކާސްޓިންގެ މަސައްކަތް ކުރިއަށްދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ. 

މި މަސައްކަތުގެ އެންމެ ފަހުގެ މައުލޫމާތު ހިއްސާކޮށް އެމްޓީސީސީއިން ބުނީ އިމާރާތުގެ ފައުންޑޭޝަން އެޅުމުގެ ކުރިން އަޅަންޖެހޭ ކޮންކްރީޓް ކާސްޓިން އެޅުމުގެ މަސައްކަތް ބާރު މިނެއްގައި ކުރިއަށްދާކަމަށެވެ. ކޮންކްރީޓް ކާސްޓިންގެ 95 އިންސައްތަ މަސައްކަތް މިހާތަނަށް ނިމިފައިވާކަމަށް އެކުންފުނިން ބުނެފައިވެއެވެ. 

ފޮއްދޫ ސިއްހީ މަރުކަޒުގެ ބިންގާ އަޅައި، މަސައްކަތުގެ އަމަލީ މަސައްކަތް ފަށާފައިވަނީ ރައީސުލްޖުމްހޫރިއްޔާ ޑރ މުހައްމަދު މުއިއްޒު މިދިޔަ އަހަރު ނ. އަތޮޅަށް ކުރެއްވި ދަތުރުފުޅުގެ ތެރެއިން ޖުލައި މަހުގެ 23 ވަނަ ދުވަހުއެވެ. ސިއްހީ މަރުކަޒުގެ ބިންގާ އަޅުއްވައިދެއްވީ ސިއްހީ ވަޒީރު އަބްދުﷲ ނާޒިމް އިބްރާހީމެވެ.

ސަރުކާރުން އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫއަކީ 26.8 މިލިއަން ރުފިޔާގެ މަޝްރޫއެކެވެ. މި މަޝްރޫޢުގެ ދަށުން 16 އެނދުގެ ސިއްހީ މަރުކަޒެއް 360 ދުވަހުގެ ތެރޭގައި ނިންމުމަށް ވަނީ ހަވާލުކޮށްފައެވެ.