ސާކު ސަރަހައްދުގެ ފުރަތަމަ ފުޓްސަލް މުބާރާތުގައި ހުރިހާ ޓީމެއް ބަލިކޮށް ސާފް ފުޓްސަލް މުބާރާތުގެ ތަށި ކާމިޔާބުކުރި ދިވެހި ގައުމީ ޓީމު މާލެއަށް އައުމުން ވަރަށް ހޫނު މަރުހަބާއެއް ކިޔައިފިއެވެ.

ބެންކޮކުގައި އޮތް މުބާރާތުގެ ތަށި ކާމިޔާބުކުރި ޓީމަށް ވެލާނާ އިންޓަނޭޝަނަލް އެއާޕޯޓުގެ ވީއައިޕީ ޓާމިނަލުން މަރުހަބާ ވިދާޅުވީ ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއާއި، ފުޓުބޯޅަ ދާއިރާގެ އިސްވެރިންނާއި، އެ ކުޅުންތެރިންގެ އާއިލާތަކުންނެވެ. 

އެއާޕޯޓުގައި ޓީމަށް މަރުހަބާ ކިޔުމަށްފަހު، ބަހުގައި ޓީމު މާލެއަށް އައުމުން ސޯޝަލް ސެންޓަރު ސަރަހައްދުން ޓީމަށް ހޫނު މަރުހަބާއެއް ކިޔާފައިވެއެވެ. އެއަށްފަހު ލޮރީއެއްގައި ޓީމު މިހާރު ދަނީ ޓީމަށް މަރުހަބާ ކިޔުމަށް ހަމަޖެހިފައިވާ އާޓިފިޝަލް ބީޗު ސަރަހައްދަށެވެ. 

އެ ސަރަހައްދުގައި ގިނަ އަދަދެއްގެ މީހުން އެއްވެ ތިބިއިރު، އެތަނުގައި އޮތް މަރުހަބާ ކިޔުމުގެ ހަރަކާތްތަކުގެ ތެރޭގައި ހަވާ އެރުވުންވެސް އޮންނާނެއެވެ. އެ ހަރަކާތްތަކުގައި ވީހާވެސް ގިނަ ބަޔަކު ބައިވެރިވުމަށް ކުޅިވަރާ ބެހޭ ވުޒާރާއިން އެދިފައިވެއެވެ. 

މި މުބާރާތުގައި ރާއްޖެއިން ރެކޯޑު ކާމިޔާބެއް ހޯދިއިރު، ފުޓްސަލް ގައުމީ ޓީމު މުބާރާތަށް ތައްޔާރުވުމަށް ޗައިނާގައި ހާއްސަ ކޭމްޕިން ހަރަކާތެއް ކުރިއަށްގެންދިޔައެވެ. އަދި މި މުބާރާތާ ދިމާކޮށް ފުޓްސަލް ގައުމީ ޓީމުގެ ކޯޗުކަމށް އުޒްބަކިސްތާނަށް ނިސްބަތްވާ ތަޖުރިބާކާރު ކޯޗެއް ގެނެސްފައިވެއެވެ. 

ރާއްޖޭގެ ގައުމީ ޓީމުން މުބާރާތުގައި ދެއްކި ކުޅުމަކީ އާދަޔާ ހިލާފު މޮޅު ކުޅުމެއްކަން ފާހަގަކޮށް މި ސަރަހައްދުގެ އެހެނިހެން ގައުމުތަކުގެ ކޯޗުންނާއި ކުޅުންތެރިންނާއި ސަޕޯޓަރުންގެ އިތުރަށް މި ސަރަހައްދުގެ ކުޅިވަރު ތަހުލީލުކުރާ އެނަލިސްޓުންގެ ތާރީފު ޓީމަށް ލިބިފައިވެއެވެ.