އިންޑިޔާގެ ވެސްޓް ބެންގަލޯއިން ނިޕާ ވައިރަސް ފެނުމާ ގުޅިގެން އެ ސަރަހައްދަށް ދަތުރުކުރާ ދިވެހިން ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އިލްތިމާސްކޮށްފިއެވެ. 

މިއަދު އެޗްޕީއޭއިން ނެރުނު ބަޔާނެއްގައި ބުނެފައިވަނީ މި ޖަނަވަރީ މަހު ވެސްޓު ބެންގަލޯއިން ނިޕާ ވައިރަހަށް ތިން މީހަކު ޕޮޒިޓިވްވެފައިވާ ކަމަށެވެ. މީގެ ކުރިންވެސް އެ ގައުމުން ނިޕާ ވައިރަހަށް މީހުން ޕޮޒިޓިވްވެގެން ރިޕޯޓުކޮށްފައިވާކަން ފާހަގަކޮށް އެޗްޕީއޭއިން ބުނީ މި ވައިރަހަކީ ޓެރޯޕަސް އާއިލާގެ ވާލުން އަދި އޫރުން އިންސާނުންގެ މެދުގައި ފެތުރޭ ބައްޔެއް ކަމަށެވެ. 

އެގޮތުން މިބާވަތުގެ ވާ ކާފައިވާ މޭވާއާއި ތަރުކާރީ ފަދަ ތަކެތި ބޭނުންކުރުމުން އިންސާނުންނަށް ބަލި ފެތުރޭ ކަމަށާއި، މީގެ އިތުރުން ބަލިޖެހިފައިވާ މީހުންނާ ގާތްކޮށް އުލޭ ފަރާތްތަކަށްވެސް ބަލި ފެތުރުމުގެ ފުރުސަތު އޮންނާނެއެވެ. 

މި ބަލީގެ އަލާމާތްތަކުގެ ތެރޭގައި ހުން އައުމާއި ބޮލުގައި ރިއްސުމާއި، ކެއްސުމާއި، ކަރުގައި ރިއްސުމާއި ނޭވާލާން އުނދަގޫވުން ހިމެނެއެވެ. މީގެ އިތުރުން ބަލި ބޮޑުވަމުންދާ ވަރަަކަށް ބައެއް މީހުންގެ ސިކުނޑިއަށް އަސަރުކޮށް، ވާނުވާ ނޭނގުމާއި، ފިޓުޖެހުން ފަދަ އަލާމާތްތައް ފެންނާނެއެވެ. 

މިބަލި ޖެހޭ ބައެއް މީހުންނަށް އެއްވެސް އަލާމާތެއް ނުފެނިވެސް ހިނގައިދާނެއެވެ. މިބައްޔަށް ވަކި ހާއްސަ ފަރުވާއެއް ނެތްނަމަވެސް ބަލީގެ އަލާމާތްތަކަށް ފަަރުވާ ކުރެވޭކަމަށް އެޗްޕީއޭއިން ބުނެފައިވެއެވެ. 

ވެސްޓު ބެންގަލޯއިން ނިޕާ ވައިރަހަށް ފައްސިވި މީހުންނާ ކޮންޓެކްޓުވެފައިވާ 180 އަށްވުރެ ގިނަ މީހުން ދެނެގަނެ، އެމީހުން މިހާރު ކަރަންޓީނު ކުރެވިފައިވާކަމަށާއި، ކަރަންޓީނުކުރެވިފައިވާ މީހުންގެ ހާލަތު އެގައުމުގެ ކަމާ ބެހޭ އިދާރާތަކުން ގާތުން ބަލަމުންދާކަމަށް އެޗްޕީއޭއިން ބުންޏެވެ. 

އަދި ވެސްޓް ބެންގަލޯއިން މިބަލީގެ އިތުރު ކޭސްއެއް މިއަދާ ހަމައަށް ފެނިފައި ނެތްކަން ފާހަގަކުރަމުން މިކޭސްތަކާ ގުޅިގެން އިންޑިޔާއާގެ އިތުރު އެހެން ސަރަހައްދކޖުން އަދި މި ސަރަހައްދުގެ އެހެން ގައުމަކުންވެސް މި ބަލި ފެނިގެން ރިޕޯޓުކޮށްފައިނުވާކަމަށް އެޗްޕީއޭއިން ބުނެފައިވެއެވެ. 

އެޗްޕީއޭއިން ބުނި ގޮތުގައި މިބަލީގެ ނުރައްކާ ރާއްޖެއަށް އޮތީ ވަރަށް ކުޑަކޮށްކަމަށްވީ ނަަމަވެސް އެ އިދާރާއިން އަންނަނީ ހާލަތު ކައިރިން ބަލަމުންނެވެ. އަދި މި ބައްޔާ ގުޅޭގޮތުން އެއްވެސް ކޭސްއެއް އަދި ކޮންޓެކްޓުވި މީހެއްވެސް ރިޕޯޓުކޮށްފައިނުވެއެވެ. ނަމަވެސް ވެސްޓް ބެންގަލޯއަށް ދަތުރުކުރާ މީހުން އެކަމަށް ސަމާލުވުމަށް އެ އިދާރާއިން އެދިފައިވެއެވެ.