ރައީސުލްޖުމްހޫރިއްޔާ އިންތިހާބުކުރުމަށް ނަގާ ވޯޓާއި، ރައްޔިތުންގެ މަޖިލީހުގެ މެންބަރުން އިންތިހާބުކުރުމަށް ނަގާ ވޯޓު އެކުއެކީ ބޭއްވުމަށް ގާނޫނުއަސާސީއަށް ގެންނަން ސަރުކާރުގެ ފަރާތުން ހުށަހަޅާފައިވާ އިސްލާހަށް ރައްޔިތުން ތާއިދު ކުރާ ކަމަށް ޕީއެންސީގެ ޕާލިމަންޓަރީ ގުރޫޕުގެ ލީޑަރު އިބްރާހީމް ފަލާހު ވިދާޅުވެއްޖެއެވެ. 

ކުރިއަށް އޮތް ލޯކަލް ކައުންސިލް އިންތިހާބުގައި ކޮންގްރެސް ޕާޓީގެ ކެމްޕެއިން މެނޭޖަރުކަންވެސް ކުރައްވަމުންގެންދަވާ ފަލާހު މިފަދައިން ވިދާޅުވީ މާފަންނު ދެކުނު ދާއިރާގެ ކައުންސިލު ގޮނޑިއަށް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އެ ދާއިރާގެ ގޮނޑިއަށް ވާދަކުރައްވާ ކެންޑިޑޭޓުންގެ ކެމްޕޭން ޖަގަހަ ހުޅުވުމުގެ ރަސްމިއްޔާތުގައި ވާހަކަދައްކަވަމުންނެވެ. 

ފަލާހު ވިދާޅުވީ ދެ އިންތިހާބު އެއްކޮށްލުމުގެ ސަބަބުން ޕާޓީ ނިޒާމު ފުރިހަމަވެގެންދާކަމަށެވެ.

ޒަމާނުއްސުރެ ހައްލުނުކުރެވިފައި ހުރި، ނުވަތަ ހައްލުކުރަން ވެރިންނަށް ނުކެރުނު މައްސަލަތައް ހައްލު ކޮށްދެއްވަމުން ގެންދަވަނީ އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަމަށް ފަލާހު ވިދާޅުވިއެވެ.

ރައީސުލްޖުމްހޫރިއްޔާ އިންތިހާބުކުރުމަށް ނަގާ ވޯޓާއި، ރައްޔިތުންގެ މަޖިލީހުގެ މެންބަރުން އިންތިހާބުކުރުމަށް ނަގާ ވޯޓު އެކުއެކީ ބޭއްވުމަށް ގާނޫނުއަސާސީއަށް އިސްލާހު ގެނައުމަށް ހުށަހެޅުއްވީ ވެސް ފަލާހެވެ.

ގާނޫނުއަސާސީގެ 110 ވަނަ މާއްދާގެ ދަށުން ރައްޔިތުންގެ މަޖިލީހުގެ މެންބަރުކަމަށް މީހުން ހޮވުމަށް ބާއްވަންޖެހޭ އިންތިޚާބު ބާއްވަންވާނީ، ރައީސުލްޖުމްހޫރިއްޔާއަކު ހޮވުމަށް ބާއްވާ އިންތިޚާބާ އެކުގައިކަމަށް މި ބިލުގައި ހިމަނާފައިވެއެވެ. އަދި ރައްޔިތުންގެ މަޖިލީހުގެ އުމުރަކީ ޑިސެމްބަރު މަހުގެ 1 ވަނަ ދުވަހުން ފެށިގެން ފަސް އަހަރުގެ ގޮތުގައި ކަނޑައަޅައި، މި މުއްދަތު ހަމަވުމާއެކު މަޖިލިސް އުވިގެންދާގޮތަށް އިސްލާހުކުރުމަށް މި ބިލުގައި ބަޔާންކޮށްފައިވެއެވެ.

މީގެއިތުރުން ހިނގަމުންދާ ރައްޔިތުންގެ މަޖިލީހުގެ އުމުރު ހަމަވެގެން މަޖިލިސް އުވުމާއެކު، އަލަށް އިންތިޚާބުކުރާ ރައްޔިތުންގެ މަޖިލީހުގެ ފުރަތަމަ ޖަލްސާ ބާއްވަންވާނީ ޑިސެމްބަރު 1 ވަނަ ދުވަހު ކަމުގައި އިނގުރައިދޫ ދާއިރާގެ މެންބަރު ފަލާހު ހުށަހެޅުއްވި ބިލުގައި ހިމަނާފައިވެއެވެ.

އެ ޤާނޫނުގައި މީގެކުރިން އޮންނަ ގޮތުގައި ރައްޔިތުންގެ މަޖިލީހުގެ އުމުރަކީ މަޖިލިސް އިންތިޚާބު ކުރުމަށްފަހު، ފުރަތަމަ ޖަލްސާ ކުރާ ތާރީޚުން ފެށިގެން ފަސް އަހަރު ދުވަހެވެ. އަދި މި މުއްދަތު ހަމަވުމުން މަޖިލިސް އުވުމާއެކު، އަލަށް އިންތިޚާބުކުރާ ރައްޔިތުންގެ މަޖިލީހުގެ ފުރަތަމަ ޖަލްސާ ބާއްވަންވާނެ ކަމުގައި ބުނެފައިވެއެވެ.

ފަލާހް ހުށަހެޅުއްވި ބިލުގެ ބޭނުމަކީ މަޖިލީހުގެ މެންބަރު ކަމަށް މީހުން ހޮވުމަށާއި ރައީސް ހޮވުމަށް ބާއްވާ އިންތިޚާބު އެކީގައި ބާއްވަން ކަނޑައެޅުން ކަމަށް ބުނެފައިވެއެވެ. އަދި ހަމައެހެންމެ، މަޖިލީހުގެ ދައުރު ނުވަތަ އުމުރު ގުނުމުގެ އުސޫލު އިސްލާހުކޮށް، ޤާނޫނު އަސާސީއަށް ގެންނަން ޖެހޭ އިސްލާހުތައް ގެނައުމަކީ ވެސް އެ ބިލުގެ ބޭނުމެއްކަން ފާހަގަކޮށްފައިވެއެވެ.

މި ބިލު މަޖިލީހަށް ބަލައިގަނެ މިހާރު އޮތީ ކޮމިޓީ މަރުހަލާގައެވެ.