ހުޅުމާލެ ތިންވަނަ ފިޔަވަހިން ގޯތި ލިބުނު މީހުންނަށް އައު ރަޖިސްޓްރީއެއް ހަދައިދީ އަދި ގުޅިފަޅުން ގޯތި ލިބުނު މީހުންނަށް އެގްރީމަންޓުގައި ސޮއި ކުރުމަށް އަނެއްކާވެސް އިތުރު ފުރުސަތެއް ދީފި އެވެ.

ގެދޮރުވެރިކަމާއި ބިނާރާ ބެހޭ ވުޒާރާއިން މިއަދު ގެޒެޓުކުރި އިއުލާނުގައި ބުނީ ހުޅުމާލެ ތިން ވަނަ ފިޔަވަހީގެ ލޭންޑް ޔޫސް ޕްލޭންއަށް ގެނެވުނު ބަދަލާގުޅިގެން، ކުރިން ބިންވެރިޔާ ސްކީމުގެ ދަށުން ހުޅުމާލެ ތިން ވަނަ ފިޔަވަހިން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަން ބަދަލުވެފައިވާކަމަށެވެ. މި ބަދަލާ އެއްގޮތަށް މިދިޔަ މަހުގެ 20 ވަނަ ދުވަހު ގޯތި ލިބުނު މީހުންގެ މެދުގައި އަލުން ގުރުނަގައިފައި ވާކަމަށް ވުޒާރާއިން ވަނީ ބުނެފައެވެ.

މި ބަދަލާ ގުޅިގެން، ގޯތި ލިބޭ ފަރާތްތަކަށް ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓްރީ" ބާޠިލުކޮށް، އައު ބަންޑާރަ ގޯތީގެ ރަޖިސްޓްރީ ދޫކުރުމަށް ހަމަޖެހިފައިވާކަމަށް ވަނީ ބުނެފައެވެ. އަދި މިހާތަނަށް ގޯތީގެ ރަޖިސްޓްރީ ޙަވާލުކޮށްފައިނުވާ ފަރާތްތަކަށް ގޯތީގެ ރަޖިސްޓްރީ ހަވާލުކުރުމާއި ގޯތި ޙަވާލުކުރުމުގެ އެއްބަސްވުމުގެ ސޮއިކުރުމަށްވެސް ހަމަޖެހިފައިވާކަމަށް ވުޒާރާއިން ވަނީ ބުނެފައެވެ.

އިއްޔެއިން ފެށިގެން އަންނަ މާޗުމަހުގެ 15 ވަނަ ދުވަހުގެ ނިޔަލަށް "ހިޔާވެހި ޕޯޓަލް" މެދުވެރިކޮށް "ބަންޑާރަ ގޯތީގެ ރަޖިސްޓްރީ" އާ ޙަވާލުވުމަށް އެޕޮއިންޓްމަންޓްއަށް އެދުމުގެ ފުރުޞަތު ހުޅުވާލާފައިވާކަމަށް ވުޒާރާގެ އިއުލާނުގައިވެއެވެ. 

މީގެ އިތުރަށް ގުޅިފަޅުގެ އައު ލޭންޑް ޔޫސް ޕްލޭނަށް އައި ބަދަލާ ގުޅިގެން، މިއަދާ ހަމައަށް އެއްބަސްވުމުގައި ސޮއިކޮށް ގޯތީގެ ރަޖިސްޓަރީއާ ޙަވާލުވެފައި ނުވާ ފަރާތްތަކަށް އިތުރު ފުރުޞަތެއް ދިނުމަށް ނިންމާފައިވާކަންވެސް ވުޒާރާއިން ވަނީ ހާމަކޮށްފައެވެ. އެމީހުންނަށް ހިޔާވަހި ޕޯޓަލް މެދުވެރިކޮށް އެޕޮއިންޓްމަންޓަށް އެދުމުގެ ފުރުޞަތު ވަނީ ހުޅުވާލާފައެވެ. 

ހިޔާވެހި ޕޯޓަލުން އެޕޮއިންޓްމަންޓްއަށް އެދޭއިރު ހުށަހަޅަންޖެހޭ ލިޔެކިޔުންތައް:

ބިންވެރިޔާ ސްކީމުގެ ދަށުން ޖުމްލަ 9،001 ގޯތި ދޫކުރުމަށް ވަނީ ނިންމާފައެވެ. އޭގެ ތެރެއިން ގިނަ ގޯތިތައް މިހާރު ވަނީ ހަވާލުކޮށް ނިންމާފައެވެ.