ކޮންގްރެސް ޕާޓީގެ ޓިކެޓުގައި މާލޭގެ މޭޔަރުކަމަށް މިފަހަރު ކުރިމަތިލައްވާ ނިޝާން އަސްކަރީ ވެރިކަމުގެ އިއްޒަތުގެ ވެރިޔާ މޭޖާ ޖެނެރަލް (ރިޓަޔާޑް) މޫސާ އަލީ ޖަލީލަށް ވޯޓު ދޭންވީ 1988 ވަނަ އަހަރުގެ ނޮވެމްބަރު މަހުގެ ތިން ވަނަ ދުވަހު ދިވެހިންގެ މިނިވަންކަމުގެ ދިފާއުގައި ނިކުތް ޓީމުގެ ކޮމާންޑަރަށް ވާތީކަމަށް މާފަންނު ދެކުނު ދާއިރާގެ މެންބަރު އަބްދުﷲ ރިފާއު (ބޮޗޭ) ވިދާޅުވެއްޖެއެވެ. 

މެމްބަރު މިފަދައިން ވިދާޅުވީ މާފަންނު ދެކުނު ދާއިރާގެ ކައުންސިލު ގޮނޑިއަށް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އެ ދާއިރާގެ ގޮނޑިއަށް ވާދަކުރައްވާ ކެންޑިޑޭޓުންގެ ކެމްޕެއިން ޖަގަހަ ހުޅުވުމުގެ ރަސްމިއްޔާތުގައި ވާހަކަދައްކަވަމުންނެވެ. 

ފަހުގެ ތާރީހެއްގައި ރާއްޖޭގެ މިނިވަންކަން ނިގުޅައިގަތުމަށް ދިން ހަމަލާގެ ހަނދާންތައް އައު ކުރައްވައި މެމްބަރު ވިދާޅުވީ ދިވެހިން މޫސާ އަލީ ޖަލީލު ދަންނަނީ އެދުވަހު ދެއްކެވި ހިކުމަތްތެރިކަމާއި ބިރުކުޑަކަމުން ކަމަށެވެ. އަދި ޒުވާން ޖީލު މިހާ ހިސާބަށް ގެނެސްދިނުމުގައި އެ ދުވަހު މޫސާ އަލީ ޖަލީލު ދެއްކެވި ކެރުންތެރިކަން ފުދޭކަމަށް މެމްބަރު ވިދާޅުވިއެވެ. މޫސާ އަލީ ޖަލީލަށް ވޯޓު ދޭންޖެހޭ ސަބަބުތަކުގެ ތެރޭގައި އެ ދުވަހު ސިފައިންގެއިން ބޭރަށް ނިކުތް ރެކޮނިސަންސް (ރެކީ) ޕެޓްރޯލްގެ ކޮމާންޑަރަކަށް މޫސާ އަލީ ޖަލީލު ހުންނެވުން އެކަނި ފުދޭކަމަށް މެމްބަރު ވިދާޅުވިއެވެ. 

ޕީއެންސީގެ ފަރާތުން މާލޭ ސިޓީ ކައުންސިލަށް ވާދަކުރާ ހުރިހާ ކެންޑިޑޭޓުންނަކީ ވެސް މިފަދަ ގާބިލު ބައެއްކަން ފާހަގަކޮށް މާލޭ ސިޓީ ކައުންސިލްގެ މެޖޯރިޓީ ޕީއެންސީއަށް ދިނުމަށް މެމްބަރު ވަނީ އިލްތިމާސްކޮށްފައެވެ. 

ރޭގެ ރަސްމިއްޔާތުގައި މޫސާ ޢަލީ ޖަލީލްއާ ގުޅޭގޮތުން މެންބަރު ވާހަކަދެއްކެވިއިރު، "އެކްސް" ޕޯސްޓެއްގައި ވެސް މެމްބަރު ރިފާއު ވަނީ، ގައުމަށްޓަކައި މޭ އައްޑަނައަކަށް ދިއްކޮށްލި ބޭފުޅަކު ގައުމަށް ގައްދާރު ނުވާނެކަން ޔަގީންކުރައްވާކަމަށް ވިދާޅުވެ މޫސާ އަލީ ޖަލީލަށް ވޯޓު ދެއްވުމަށް ގޮވާލައްވާފައެވެ.