ށ. ބިލެތްފަހި ބަނދަރު ތަރައްގީކުރުމުގެ 94 އިންސައްތަ މަސައްކަތް ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.

ޑިޒައިން އެންޑް ބިލްޑް އުސޫލުން ބިލެތްފަހި ބަނދަރު ތަރައްގީކުރުމުގެ މަސައްކަތް އެމްޓީސީސީއިން ކުރިއަށްގެންދާއިރު، މަސައްކަތުގެ އެންމެ ފަހުގެ މައުލޫމާތު ހިއްސާކޮށް އެމްޓީސީސީއިން ބުނީ މިހާރު ކުރިއަށްދަނީ ބަނދަރުގެ ބޭރު ތޮށިލުމުގެ މަސައްކަތް ކަމަށެވެ. 

މި މަޝްރޫއުގެ ދަށުން 50،376 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 181 މީޓަރުގެ ސަރަހައްދެއްގެ އެއްގަމު ތޮށިލުމާއި، 170 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 434 މީޓަރުގެ ސަރަހައްދެއްގައި ބޭރު ތޮށިލުމާއި، 1،565 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމުގެ އިތުރުން މަގުބައްތި އަދި ނެރުބައްތި ހަރުކުރުމަށް ވަނީ ހަމަޖެހިފައެވެ. 

މި މަސައްކަތް އެމްޓީސީސީއާ ހަވާލުކޮށްފައިވަނީ 28.42 މިލިއަން ރުފިޔާއަށެވެ.